Tuku 32:1-32
32 Yakobo wele muna nzil’andi, e mbasi za Nzambi ziwananene yandi.
2 Vava kabamwene, Yakobo ovovele vo: “Ekiaki i vu kia Nzambi!” Muna diadi oyikidi e fulu kiokio vo Makanaimi.*
3 Yakobo otumini anati a nsangu kuna ntwal’andi kwa Esau wa mpangi andi, kuna nsi ya Seyire,+ kuna zunga kia* Edome,+
4 ubakanikini vo: “Owu nuvova kwa Esau wa mfumu ame: ‘I wau wuwu kavovele o Yakobo wa ntaudi aku: “Kolo kiayingi nzingidi* yo Labani.+
5 Mbakidi ngombe, mabuluku, mameme, ntaudi zamakento ye zamakala;+ ntwikidi e nsangu zazi kwa mfumu ame kimana yavua e dienga ova meso maku.”’”
6 Kuna kwalanda, anati a nsangu bavutukidi kwa Yakobo, bavovele vo: “Tumonanene yo Esau wa mpangi aku, olweke yo wantu 400 kawanana yaku.”+
7 Yakobo omwene wonga yo telamwa moyo.+ Ovambanese wantu bena yandi mu buka yole, kumosi ye mameme ye ngombe ye samo.
8 Yakobo ovovele vo: “Avo Esau onuanisi buka kimosi, ozevo e buka kiakaka kikala ye lau dia tina.”
9 I bosi, Yakobo ovovele vo: “E Nzambi a se diame Abarayama, Nzambi a se diame Isaki, e Yave, ngeye wampovesa vo: ‘Vutuka kuna nsi aku, kuna kwa yitu yaku, omono ikulunga-lunga,’+
10 kifwanukini walakazi wau wawonso ko ngatu kwikizi kiaki osongele kwa ntaudi aku,+ kadi vava yasauka e Yodani yayi, nkau kaka yakala wau, owau nkitukidi se buka yole.+
11 Idodokele, umpuluza+ vana moko ma Esau wa mpangi ame, wonga wandi ngina wau, kadi olenda kundwanisa+ kumosi ye ngudi yo wan’au.
12 Ngeye wavova vo: ‘Omono ikulunga-lunga, ikitula e mbongo aku nze senge dia mbu, edi ke dilendi nkutu tangakana ko.’”+
13 Yakobo olele vana. I bosi, ovambwidi eyaka lekwa muna vua kwandi se lukau lwa Esau wa mpangi andi:+
14 Nkombo 200 zankento, nkombo 20 za makoko, mameme 200 mankento, mameme 20 mamakoko,
15 samo 30 ziyemekanga wan’au, ngombe 40 zankento, ngombe 10 za makoko, mabuluku 20 mankento, mabuluku 10 ma makoko.+
16 Ovene yo kwa ntaudi zandi, konso kambi dilend’e kambi diankaka, ovovese ntaudi zandi vo: “Nuvita oku ntwala oyeno, nusisa tini vana vena kambi edi ye dina.”
17 Okanikini mpe ona wantete vo: “Avo owanane yo Esau wa mpangi ame, kayuvula vo: ‘Nani uvuidi, akweyi okwendanga, e bulu ina kuntwal’aku yanani?’
18 umvovesa vo: ‘Ya ntaudi aku Yakobo. Olwalu i lukau katwikidi kwa Esau+ wa mfumu ame, oyandi mpe olweke alandi.’”
19 Yakobo okanikini mpe oyu wanzole, wantatu ye awonso balendenge ye makambi vo: “Vava nuwanana yo Esau, nuzayisa mambu mama.
20 Nufwete kumvovesa mpe vo: ‘O ntaudi aku Yakobo olweke alandi.’” Kadi wavova muna ntim’andi vo: ‘Avo intwikidi ntete lukau muna kunlembeka o ntima,+ nanga otoma kuntambula vava tumonana.’
21 Muna kuma kiaki, e ntaudi zawonso bakedi yo lukau bele aviti, kansi oyandi olele vana katungila e saba.
22 Muna fuku wauna, obongele akento andi wole,+ ntaudi zandi zole zamakento+ yo wan’andi 11 amakala bena vo aleke, osaukidi vana sau dia Yaboke.+
23 Muna mpila yayi, Yakobo ubanete yo kubasaula o nkoko,* osawidi mpe yawonso kakedi yau.
24 Kuna kwalanda, Yakobo osidi yandi mosi. I bosi, muntu mosi oyantikidi nuana yandi yavana o kuma kwakiá.+
25 Vava muntu kamwene vo kalendele sunda Yakobo ko, unsimbidi vana yikilu dia sina dia kulu; e sina dia kulu dia Yakobo difisukidi ekolo kanuenenge yandi.+
26 I bosi, umvovese vo: “Ungiambula ngienda, kadi o kuma se kukia.” Yakobo umvutwidi vo: “Kikuyambula ko wenda, yavana okunsambula.”+
27 O muntu oyuvuidi Yakobo vo: “E nkumbu aku nani?” Oyandi vo: “Yakobo.”
28 Umvovese vo: “E nkumbu aku ke Yakobo diaka ko, kansi Isaele,*+ kadi onuene yo Nzambi+ yo wantu, ongeye osundidi.”
29 Yakobo ovovele vo: “Dodokolo, unzayisa e nkumbu aku.” Kansi o muntu ovutwidi vo: “Ekuma oyuvulwidi e nkumbu ame?”+ Muna diadi, unsambwidi vavana.
30 Muna kuma kiaki, Yakobo oyikidi e fulu kiokio vo Peniele,*+ kadi ovovele vo: “Mbwene Nzambi o mantalani, kansi kifwidi ko.”*+
31 O mwini wayantika vaika vava kaviokele muna Penuele,* kansi tedinga katedinganga* mu kuma kia sina dia kulu.+
32 Ekiaki ikuma o wana Isaele, yamu wau ke bedilanga mwanzi a sina dia kulu ko, owu ukalanga vana vayikakiana e sina dia kulu, kadi o muntu vana vayikanena dia sina dia kulu kwa Yakobo kasimba, muna mwanzi a sina dia kulu.
Mvovo vana yand'a lukaya
^ Ina ye nsasa vo: “Ndo Zole.”
^ Mvovo wa sina: “kuna londe lwa.”
^ Yovo “nzingidi se nzenza.”
^ Yovo “mvuila.”
^ Ina ye nsasa vo: “Nuana yo (Zizidila) Nzambi” yovo “Nzambi onuene.”
^ Ina ye nsasa vo: “Zizi kia Nzambi.”
^ Mvovo wa sina: “kansi moyo ame uvukidi.”
^ Yovo “Peniele.”
^ Yovo “kinsoto kayendanga.”
