Tuku 9:1-29
9 Nzambi osambwidi Noa yo wan’andi, ubavovese vo: “Nuwutana yo wokela, nuzadisa o ntoto.+
2 E vangwa yawonso yamoyo ina ova ntoto, yawonso itilumukanga muna zulu, yawonso ikiyanga ova ntoto ye mbizi zawonso za kalunga, wonga zikala kunumona. Owau yawonso iveno vana moko meno.*+
3 E vangwa yawonso yamoyo ina ova ntoto inuvene yo se madia.+ Inuvene yawonso, wauna yanuvanina e mvudi a nkunzu.+
4 Kansi, vo i bulu kina yo menga mandi,+ mena vo i moyo andi, ke nudie kio ko.+
5 Vana ntandu, konso ona obungula menga meno, mena vo i moyo eno, vava ivava mo. Avo bulu, kifwete fwa. Avo muntu, o muntu ndioyo kafwete futa muna vana o moyo andi, wau vo mpangi eno.+
6 Konso muntu obungula menga ma kwandi, o menga mandi mpe mebungulwa kwa muntu ankaka,+ kadi o muntu mu fwaniswa kia Nzambi kavangilwa.+
7 Vo i yeno, nuwutana yo wokela, nusayana ova ntoto.”+
8 I bosi, Nzambi ovovese Noa yo wan’andi vo:
9 “Owau nkangidi yeno e kangu+ kumosi ye mbongo eno ikunulandila,
10 ye vangwa yawonso yamoyo ina yeno, nuni, bulu, vangwa yawonso yamoyo ina yeno ova ntoto, yawonso ivaikidi muna nzaza—e vangwa yawonso yamoyo ina ova ntoto.+
11 Elo, nsikidisi e kangu diame yo yeno: Kisinga fwasa diaka vangwa yawonso yamoyo* mu maza ma kizalu ko, ngatu twasa diaka kizalu mu fwasa o ntoto.”+
12 Nzambi ovovele diaka vo: “Ekiaki i sinsu kia kangu nkangidi yo yeno ye vangwa yawonso yamoyo ina yeno, muna mbandu zawonso zikwiza.
13 Nsidi e nkongolo ame muna matuti, ikala se sinsu kia kangu nkangidi yo ntoto.
14 Vava itwasa matuti muna zulu, e nkongolo imoneka muna matuti.
15 Isungamena e kangu diame nkangidi yo yeno, ye vangwa yawonso yamoyo ya mpila zawonso; o maza ke mekituka diaka kizalu ko mu fwasa e vangwa yawonso.*+
16 E nkongolo ivaika muna matuti, omono imona yo, isungamena e kangu diakwele mvu nkangidi ye vangwa yamoyo ya mpila zawonso ina ova ntoto.”
17 Nzambi ovovese diaka Noa vo: “Ekiaki i sinsu kia kangu nkangidi ye vangwa yawonso ina ova ntoto.”+
18 Seme, Kami yo Yafete+ i wan’a Noa ana bavaika muna nzaza. Kuna kwalanda, Kami wawuta Kenani.+
19 Yau ntatu i wan’a Noa. Wantu awonso ova ntoto muna yau bawutukila yo sayana+ mwawonso.
20 Noa oyantikidi vata o ntoto, okunini mpatu a vinyu.
21 Vava kanuini e vinyu, okolelo, osidi e kimpene muna saba kiandi.
22 Kami wa se dia Kenani, omwene kimpene kia se diandi Noa, osamwini wo kwa mpangi zandi zole kuna mbazi.
23 I bosi, Seme yo Yafete babongele yunga, batudidi kio vana mavembo mau, bele lunima-lunima. Bafukidi e kimpene kia se diau ekolo e ndose zau zitalanga kwakaka, ke bamwene kimpene kia se diau ko.
24 Vava Noa kasikamene muna nkolw’a vinyu, ozeye dina kavangilu kwa mwan’andi ansuka,
25 Noa ovovele vo:
“Kenani+ osibilu.
Yambula kakituka se ntaudi* a mpangi zandi.”+
26 Noa ovovele diaka vo:
“Yambula Yave wa Nzambi a Seme kakembelwa,Vo i Kenani kakituka se ntaudi+ a Seme.
27 Yambula Nzambi kavana Yafete zunga kianene,Kazingila muna saba ya Seme.
Yambula Kenani kakituka mpe ntaudi a Yafete.”
28 Kuna nim’a Kizalu,+ Noa wazinga diaka mvu 350.
29 Ozevo, e mvu miawonso mia zingu kia Noa 950, i bosi ofwidi.
Mvovo vana yand'a lukaya
^ Yovo “isilu kuna nsi a wisa kieno.”
^ Mvovo wa sina: “nitu zawonso.”
^ Mvovo wa sina: “nitu zawonso.”
^ Mvovo wa sina: “ntaudi a zintaudi.”
