Zasoneka Yoane 19:1-42
19 I bosi, Pilato ovovese makesa babaka Yesu yo kunwanda.+
2 Makesa bavangidi kolowa ya nsende, bamvuikidi yo vana ntu, bamvuikidi mpe nlele wa se kia nduwa;*+
3 bayizanga vana kena, oku vo: “Kiambote kiaku, e Ntinu a Ayuda!” Bakwamanene kunwanda mpe e mbata vana lose.+
4 Pilato ovaikidi diaka kuna mbazi, ubavovese vo: “Tala, imvaikisi kwa yeno, kimana nuazaya wo vo kimwene ngielele ko muna yandi.”+
5 Dianu vo, Yesu ovaikidi kuna mbazi, ovuete kolowa ya nsende ye nlele wa se kia nduwa. Pilato ubavovese vo: “Tala, o muntu!”
6 Kansi, nganga zambuta yo makesa vava bamwene, bavovele muna nding’angolo vo: “Kamanikwa vana nti! Kamanikwa vana nti!”*+ Pilato ubavovese vo: “Numbaka yeno kibeni, nuamvonda,* kadi kimwene ngielele ko muna yandi.”+
7 Ayuda bamvutwidi vo: “Tuna yo nsiku, muna nsiku wau, i kafwete fwila,+ e kuma kadi uyikitwidi se mwan’a Nzambi.”+
8 O Pilato vava kawidi dina bavovele, omwene kikilu o wonga,
9 okotele diaka muna lûmbu lwa nguvulu, ovovese Yesu vo: “Akweyi watuka e?” Kansi Yesu kamvene mvutu ko.+
10 Dianu, Pilato umvovese vo: “Kuzolele kumpovesa ko e? Kuzeye wo ko vo ngina ye wisa kiakuyambula, ngina mpe ye wisa kia kuvonda?”*
11 Yesu umvutwidi vo: “Kwadi kala nkutu ye wisa omu mono ko, kele vo kwavewa kio ko kuna ntandu. Muna kuma kiaki ndiona ungiekwele kwa ngeye, sumu diampwena kena diau.”
12 Muna kuma kiaki, Pilato ovavidi una kalenda kunyambulwila, kansi Ayuda bavovele muna nding’angolo vo: “Avo oyambwidi muntu ndioyo, ku nkundi a Kaisa ko. Konso ona uyikitwidi se ntinu, Kaisa katelamene.”+
13 Pilato vava kawidi e mvovo miami, otwese Yesu kuna mbazi, ovuende vana kunda kia lufundisu, vana fulu kiyikilwanga vo Matadi Malelama, muna Kiyibere, Ngabata.
14 Lumbu kia Nkubam’a+ Nduta kiakala; muna tezo kia ola ya sambanu.* Ovovese Ayuda vo: “Nutala, ntinu eno!”
15 Kansi, bavovele muna nding’angolo vo: “Unkatula! Unkatula! Umanika vana nti!”* Pilato ubavovese vo: “Nga yavonda o ntinu eno?” Nganga zambuta bavutwidi vo: “Ke tuna ye ntinu ankaka ko, Kaisa kaka.”
16 I bosi, unyekwele kwa yau kimana bamvondela vana nti.+
Muna kuma kiaki, babongele Yesu.
17 Yandi kibeni onete nti andi ampasi,* wele vana fulu kiyikilwanga vo Ku-valanganza kia ntu,+ muna Kiyibere vo Ngolongota.+
18 Kûna bankomene vana nti,+ kumosi yo wantu wole, mosi kuna sambu dimosi, wankaka kuna sambu diankaka, o Yesu vana kati.+
19 Pilato osonekene mpe e sono yo sia yo vana ntandu a nti ampasi.* Yavovanga vo: “Yesu wa musi Nazarete wa Ntinu a Ayuda.”+
20 Ayingi muna Ayuda batangidi e sono yayi, e kuma kadi e fulu bakomena Yesu vana nti lukufi kiakala ye mbanza, e sono yasonekenua muna nding’a Kiyibere, Kilatini ye Kingerekia.
21 Kansi, nganga zambuta za Ayuda bavovese Pilato vo: “Kusoneki ko vo ‘Ntinu a Ayuda,’ soneka edi kavova vo: ‘Omono i Ntinu a Ayuda.’”
22 Pilato ovutwidi vo: “Dina nsonekene, ke difwete sobwa ko.”
23 Vava makesa bamene koma Yesu vana nti, babongele mvuatu miandi, bakayanese mio muna tini yá, konso kesa ye tini kiandi, babongele mpe kinkutu kiandi. Kansi e kinkutu kiakondwa nswiku tuka kuna ntandu yamuna yanda, baya kimosi kaka.
24 Bavovanene vo: “Ke tutiazuni kio ko, tutelela kio e nkas’a mienze twazaya kana nani ovua kio.”+ Ediadi diavangama muna lunganesa e sono kiavovanga vo: “Bakayane mvuatu miame, batelele kinkutu kiame e nkas’a mienze.”+ Makesa i diau kikilu bavangidi.
25 Vana ndambu a nti ampasi* a Yesu, vatelamene ngudi andi+ ye ngudi andi a nleke; Maria wa nkaz’a Kelopa yo Maria Mandala.+
26 Vava Yesu kamwene ngudi andi ye nlongoki ona ketoma zolanga+ otelamene vana ndambu, ovovese ngudi andi vo: “E nkento, o ndioyu i mwan’aku!”
27 I bosi, ovovese nlongoki vo: “O ndioyu i ngudi aku!” Tuka muna ntangwa yayina o nlongoki unète kuna nzo andi.
28 I bosi, o Yesu wau kazeye wo vo mawonso malunganene kala, muna lunganesa e sono, ovovele vo: “Vuina ngina diau.”+
29 Vakedi mvungu wazala ye vinyu ya ngani. Basomekene e vusu diazala ye vinyu ya ngani muna nti a isopo,* batukikidi dio muna nu’andi.+
30 Vava katambwidi e vinyu ya ngani, Yesu ovovele vo: “Dilunganene!”+ oyenzekele ntu, ofwidi.*+
31 Wau vo lumbu kia Nkubama+ kiakala, o mavimbu muna lembi kala muna nti ampasi+ yamuna Lumbu kia Vundu, (kadi e lumbu kiakina Lumbu kia Vundu kianene),+ Ayuda balombele kwa Pilato vo batolola e malu mau, o mavimbu makatulwa vana nti.
32 Dianu vo, makesa bezidi, batolwele e malu ma wantu wole ana bakomeno vana ndambu andi.
33 Kansi wau balueke kwa Yesu, bamwene vo ofwidi kala, dianu vo ke batolwele malu mandi ko.
34 Kansi, kesa dimosi otobwele luvati lwandi muna dionga,+ vana vau vavaikidi menga yo maza.
35 Ndiona wamona wo osidi umbangi, o umbangi wandi waludi, ozeye wo vo mana kavovele maludi, kimana oyeno mpe nuakwikila.+
36 Kieleka, o mama mavangamene kimana e sono eki kialungana: “Kana visi kiandi kimosi ke kitoloka ko.”+
37 E sono kiakaka mpe kivovanga vo: “Betala ndiona batobwele.”+
38 I bosi, Yosefe wa musi Arimataya, ona wakala nlongoki a Yesu kuna nsweki mu kuma kia wonga wa Ayuda,+ olombele kwa Pilato kakatula e vimbu dia Yesu, Pilato umvene o nswa. Wizidi katula e vimbu diandi.+
39 Nikodemo,+ ona wateka kwiza kwa Yesu muna fuku, otwese mô yasangwa e alowe, tezo kia yilo 33.*+
40 Babongele e vimbu dia Yesu, bazingidi dio muna nlele mia lino ye má yansunga,+ mun’owu wa fu kia Ayuda kia zika mvumbi.
41 Mpatu yakala vana fulu kina kavondelwa,* muna mpatu yayina mwakala ye ziami kiampa,*+ kina ke kiasilu nkutu muntu ko.
42 Wau vo lumbu kia Nkubam’a+ Ayuda kiakala, basidi e vimbu dia Yesu muna ziami kiakala lukufi.
Mvovo vana yand'a lukaya
^ Yovo “mbwaki.”
^ Yovo “Kavondelwa vana nti! Kavondelwa vana nti!”
^ Yovo “nuamvondela vana nti.”
^ Yovo “kuvondela vana nti?”
^ I sia vo, tezo kia ola ya 12 mu mwini.
^ Yovo “Umvondela vana nti!”
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Yovo “oyambwidi fulumuna.”
^ Yovo “kavondelwa vana nti.”
^ Yovo “ziami kia luyindulu.”
