O Mvangi eto utusundidi e ngangu. Nze Se dianzodi, okutulunga-lunganga. Vana ntandu, ka tuvanga ko kimana twayituminanga. (Yeremiya 10:23) Muna kuma kiaki, nze una mwana kevwilanga luludiku lwa mase o mfunu, yeto awonso luludiku lwa Nzambi tuvwanga o mfunu. (Yesaya 48:17, 18) E nkanikinu mia Nkand’a Nzambi i lukau katuvana Nzambi muna kutufila.—Tanga 2 Timoteo 3:16.

E nsiku ye nkanikinu mia Yave mikutulonganga e mpila tulenda kadila ye zingu kiambote owau ye kutusonga una tulenda vwila zingu kiakwele mvu kuna sentu. Wau vo Nzambi watuvanga, diambote mu landa luludiku lwandi.—Tanga Nkunga 19:7, 11; Lusengomono 4:11.

E nkanikinu mia Nkand’a Nzambi i malongi masina mena mo. Kuna diak’esambu, e nsiku i mambu masikididi tusimwanga. (Nsiku 22:8) Tufwete sadila umbakuzi muna zaya nkia nkanikinu tulenda sadila muna diambu tubwidilu. (Ngana 2:10-12) Kasikil’owu, Nkand’a Nzambi ukutulonganga vo moyo lukau lwa Nzambi. Nkanikinu wau ulenda kutusadisa kuna salu, kuna nzo ye vava tukangalanga. O zaya nkanikinu wau dikutusadisa mu lembi sia e zingu kieto yovo kia muntu akaka mu vonza.—Tanga Mavangu 17:28.

Yesu wayika nkanikinu miole misundidi o mfunu. Nkanikinu wantete usonganga ekani dia zingu kieto, i sia vo, zaya  ­Nzambi, kunzola yo kunsadila ye kwikizi kiawonso. Tufwete sungamenanga nkanikinu wau muna nzengo zawonso tubakanga. (Ngana 3:6) Awana bezingilanga ngwizani ye nkanikinu wau bekitukanga se akundi a Nzambi, bekalanga ye kiese kiasikila ye besinga vwa moyo a mvu ya mvu.—Tanga Matai 22:36-38.

Nkanikinu wezole ukutusadisanga mu kala ye ngwizani ambote y’akaka. (1 Korinto 13:4-7) O lemvokela nkanikinu wau wezole divavanga vo twatanginina una Nzambi kekadilanga yo wantu.—Tanga Matai 7:12; 22:39, 40.

Nsiku mia Nkand’a Nzambi milonganga esi nzo una balenda siamisina o zola. (Kolosai 3:12-14) E Diambu dia Nzambi disadisanga mpe esi nzo muna kubalonga nkanikinu wakaka vo, e longo lufwete kwamanana yavana mosi muna yau kefwa.—Tanga Etuku 2:24.

Avo tulemvokela e nkanikinu mia Nkand’a Nzambi, tulenda taninwa muna mpasi za zingu yo kala ye luvuvamu lwa ntima. Kasikil’owu, e mfumu za salu beyangalelanga asadi ana belemvokelanga nkanikinu mia Nkand’a Nzambi mivovelanga fu ya nkal’ambote ye fululu muna salu. (Ngana 10:4, 26; Ayibere 13:18) Diambu dia Nzambi dikutulonganga mpe vo twaluta yangalelanga lekwa ina vo yamfunu kumosi ye ngwizani eto yo Nzambi ke mu mavwa ko.—Tanga Matai 6:24, 25, 33; 1 Timoteo 6:8-10.

O lemvokela nkanikinu mia Nkand’a Nzambi dilenda tanina vimpi weto. (Ngana 14:30; 22:24, 25) Kasikil’owu, o zingila ngwizani ye nsiku mia Nzambi misimanga kolwa malavu dikututaninanga muna yimbevo ye sumbula. (Ngana 23:20) Yave oyambulanga vo twanua malavu mankolwa, kansi tufwete nwina muna tezo. (Nkunga 104:15; 1 Korinto 6:10) E nsiku mia Nzambi mikututwasilanga nluta kadi mikutulonganga twakeba mavangu ye ngindu zeto. (Nkunga 119:97-100) Kansi, Akristu akieleka ke belemvokelanga kaka nkanikinu mia Nzambi ko mu kuma kia nluta mikubatwasilanga. Bevanganga wo muna kembelela Yave.—Tanga Matai 5:14-16.