Ke tufutanga nzimbu ko kw’awana bevitang’o ntu muna nkutakani eto. Kansi, nze una wavangama vava nkutakani ya Akristu yayantika, akuluntu azikuka ‘bedikilanga dibundu dia Nzambi.’ (Mavangu 20:28) Akuluntu awaya azikuka muna mwanda, yau bevitang’o ntu muna nkutakani yo vungula ekambi ‘ke mu komenwa ko, kuna zolela kaka. Ke mu ndandu zalembi songa ko, muna mvevo a ntima kaka.’ (1 Pet. 5:1-3) Nkia salu besalanga muna wete dieto?

Bekutulunga-lunganga yo Kututanina. Akuluntu bevananga luludiku yo sadisa ampangi muna nkutakani bakwamanana finama Yave. Wau bazeye wo vo Nzambi wabavana kiyekwa kiaki kiamfunu, akuluntu ke bevavanga kimfumu ko vana vena mpangi zau, kansi bekutusadisanga twakala e nkal’ambote ye kiese. (2 Korinto 1:24) Nze una mvungudi ketoma lunga-lunganga konso ememe diandi, akuluntu mpe bevavanga zaya konso mpangi muna nkutakani.—Ngana 27:23.

Bekutulonganga una tulenda vangila luzolo lwa Nzambi. Konso lumingu, akuluntu befilanga malongi mu nkutakani muna kumika lukwikilu lweto. (Mavangu 15:32) Mpangi zazi, bevitang’o ntu muna salu kia umbangi muna kutukubika mu mpila zawonso za sila umbangi.

Bekasakesanga konso muntu mu yeto. Muna lungisa nsatu za mwanda za konso muntu mu yeto, akuluntu bekutukingulanga muna nzo zeto yovo mun’Eseka dia Kintinu mu kutusadisa yo kutufiaulwisa muna mwanda.—Yakobo 5:14, 15.

Vana ntandu a salu yawonso besalanga muna nkutakani, ndonga muna akuluntu awaya, besalanga mpe salu ya yau kibeni muna lungisa nsatu za esi nzo zau, mawonso mama ntangwa yayingi mevavanga. Akuluntu awaya befuntukanga mu kuma kieto, tufwete kubazitisanga.—1 Tesalonika 5:12, 13.

• Nkia salu besalanga akuluntu muna nkutakani?

• Akuluntu aweyi besadisilanga konso muntu mu yeto?