Lumbu kimosi muna fuku, Ntinu Nebukandesa walota e ndozi. E ndozi yayi yantokanesa kikilu yo kumvempola o tulu. Wabokelesa nganga za mpandu yo kubavovesa vo: ‘Nunzayisa e nsas’a ndozi ame.’ Bavova vo: ‘E ntinu, utuzayisa e ndozi olotele.’ Kansi, Nebukandesa wabavovesa vo: Ve! Yeno nufwete kunzayisa e ndozi ndotele, avo ke wau ko vonda ikunuvonda.’ Bamvovesa vo: ‘Utuzayisa mana olotele, i bosi yeto tuvanina mo e nsasa.’ Nebukandesa wavova vo: ‘Yeno awonso vuna nuzolele kumvuna. Nunzayisa mana ndotele.’ Bavovesa ntinu vo: ‘Ke vena muntu ko una moyo olenda mo kuzayisa. Dina olombele ke dilendakana ko.’

Bebukandesa wafunga kikilu makasi. Wakanikina vo akwa ngangu awonso muna nsi bavondwa. Akaka muna yau i Daniele, Saderake, Misake ye Abedengo. Daniele walomba fintangwa kwa ntinu. I bosi, yandi ye akundi andi basamba kwa Yave yo lomba vo kabasadisa. Adieyi Yave kavanga?

Muna mona meso, Yave wasonga e ndozi a Nebukandesa kwa Daniele yo kunzayisa e nsas’andi. Muna lumbu kialanda, Daniele wayenda kwa selo kia ntinu yo vova vo: ‘Kuvondi kana mosi ko mun’akwa ngangu. Mono ndenda sasila e ndozi kalotele o ntinu.’ Selo kiaki wanata Daniele kwa Nebukandesa. Daniele wavovesa ntinu vo: ‘Nzambi usengomwene oma ma kusentu. E ndozi olotele i yayi: ‘Wamona teke kiampwena kiakala yo ntu a wolo, e tulu kiandi yo moko ma palata, e vumu yo matungi ma malu mansongo, e tambi yandi ya ndambu tadi, ndambu tûma. I bosi, vadungunwa e tadi muna mongo dina diawandama e  teke muna tambi. E teke kiakosomonwa yo vevomonwa kwa tembwa. E tadi diakituka se mongo ampwena yo zala e nza.’

I bosi, Daniele wavova vo: ‘Eyayi i nsas’a ndozi aku: E kintinu kiaku i ntu a wolo. E palata, i kintinu kikulandila. Vekala ye kintinu kimosi kikala nze nsongo kina kiyala e nza yawonso. E kintinu kina kilanda, ngolo kikilu kikala nze tadi. Kuna kulanda, kintinu kivambaneswa, e ndambu yankaka ikala e ngolo nze tadi, e ndambu yankaka ke ikala ngolo ko nze tûma. E tadi dina diakituka se mongo, i Kintinu kia Nzambi. Kikosomona yintinu yawonso yo yala yakwele mvu.’

Nebukandesa wafukamena Daniele yo vova vo: ‘Nzambi aku usengomwene ndozi yayi. Ke vena Nzambi ofwanane yandi ko.’ Vana fulu kia vonda Daniele, Nebukandesa wankitula se mfumu vana vena akwa ngangu awonso ye nyadi a zunga kiawonso kia Babele. Nga omwene una Yave kavanina e mvutu za sambu kia Daniele?