Elekana wa mwisi Isaele akento wole kakala yau, Ana yo Penina. Kansi, Ana i nkento katoma zolanga. Penina wasevanga Ana wau vo kawutanga ko. Penina wana ayingi kawuta. Konso mvu, Elekana wanatanga esi nzo andi mu kwenda sambila Yave kuna saba kiakala kuna Silo. Lumbu kimosi vava bakala kuna saba, wamona vo Ana wa nkento ona katoma zolanga wakendalala kakala. Wavova vo: ‘E Ana dodokolo, yambula dila. Mono i nkaz’aku. Zola itoma kuzolanga.’

Kuna kwalanda, Ana wayenda samba va fulu kia yandi kaka. Wakwamanana dila ekolo kadodokelanga Yave kimana kansadisa. Wasia nsilu vo: ‘E Yave, avo umpene o mwana, kwa ngeye ikumvana, okusadila muna zingu kiandi kiawonso.’

Vava Ele wa Ngang’ambuta kamona Ana wanikunanga o nua lembi tumbula e ndinga, wabanza vo malavu kakolelo. Ana wavutula vo: ‘Ve, e mfumu ame, kikolelo malavu ko, mu mpasi ngina. Kwa Yave isambanga kimana kansadisa.’ Ele wabakula vo diambi kavanga. Wavovesa Ana vo: ‘Yambula vo Nzambi kavana kina olombele.’ Ana  wayangalala kikilu yo vutuka kuna nzo. Ke vavioka mvu amvimba ko, wawuta o mwana yo kumvana e nkumbu a Samuele. Nga olenda yindula e kiese kamona o Ana?

Ana kavilakana ko nsilu kasia kwa Yave. Vava Samuele katauka, wantwasa kuna saba kimana kasadila kûna. Wavova kwa Ele vo: ‘Ndioyo i mwana yalombanga muna sambu. Imvene kwa Yave e zingu kiandi kiawonso.’ Elekana yo Ana bayendanga kingula Samuele konso mvu yo kuntwasila mvuatu wampa. Muna lusadisu lwa Yave, Ana wawuta diaka wana tatu amakala ye wana wole amakento.