Vana Mongo a Olive, Yesu otele kingana kia mienze kumi ye kia talanta. Nkia mvutu kavene muna kiuvu kia antumwa mu kuma kia ngiz’andi ye mbaninu a tandu kiaki? Yesu ubavene mvutu muna kingana kiansuka katele, kingana kia mameme ye nkombo.

Yesu otuntidi e sungididi kia wantu, ubavovese vo: “O Mwan’a muntu vava kekwiza muna nkembo andi ye mbasi zandi zawonso, ovuanda vana kunda kiandi kia nkembo.” (Matai 25:31) Kondwa lukatikisu, Yesu osongele vo e kingana kiaki yandi kivovele. Yesu nkumbu miayingi kekukiyikilanga vo “Mwan’a muntu.”—Matai 8:20; 9:6; 20:18, 28.

Nkia ntangwa e kingana kiaki kilungana? Kilungana vava Yesu kekwiza “muna nkembo andi” kumosi ye mbasi yo vuanda “vana kunda kiandi kia nkembo.” Yesu wavovele kala mu kuma kia “Mwan’a muntu okwiza muna matuti ma zulu yo nkuma yo nkembo anene” kumosi ye mbasi zandi. Nkia ntangwa divangama? “Vava kifokoka kaka e mpasi za lumbu yayina.” (Matai 24:29-31; Maku 13:26, 27; Luka 21:27) Ozevo, e kingana kiaki kilungana kuna sentu vava Yesu kekwiza muna nkembo andi. Nkia mambu kevanga?

Yesu ovovele vo: “O Mwan’a muntu vava kekwiza . . . , e zula yawonso ilungalakana vana kena, ovambula wantu nze una mvungudi kevambulwilanga mameme ye nkombo. Osia mameme kuna koko kwandi kwalunene, kansi e nkombo kuna koko kwalumonso.”—Matai 25:31-33. 

Mu kuma kia mameme mesiwa kuna sambu diambote, Yesu ovovele vo: “I bosi, o Ntinu ovovesa awana bena kuna koko kwandi kwalunene vo: ‘Nwiza, yeno nwasambulwa kwa Se diame, nwavuila e Kintinu kina nwakubikilwa tuka kuna semo dia nza.’” (Matai 25:34) Ekuma mameme besongelwa e dienga kwa Ntinu?

O Ntinu ovovele vo: “Kadi yamona nzala, oyeno nwakumpana madia; yamona e vuina, oyeno nwakundwika. Yakala nzenza, oyeno nwakuntambula; yakala e nkonga, oyeno nwakumvuika. Yayela, oyeno nwakwiza kuntala. Yakala muna pelezo, oyeno nwakwiza kunkingula.’ O mameme mama, “akwa unsongi,” bayuvuidi kana aweyi bavangila o mambu mama mambote, Yesu ubavutwidi vo: “Konso ntangwa nwavanga wo kwa ndiona wandwelo muna mpangi zame, kwa mono nwavanga wo.” (Matai 25:35, 36, 40, 46) O mambu mama mambote ke bavangidi mo ku zulu ko, kadi ke kukalanga mbevo ko ye ke kufwangwa nzala ko. O mambu mama bavangidi mo kwa mpangi za Kristu ova ntoto.

Adieyi tuvova mu kuma kia nkombo zisilu kuna lumonso? “I bosi, [o Ntinu] ovovesa awana bena kuna koko kwandi kwalumonso vo: ‘Nukatuka oku ngina, oyeno nwavewa tumbu kia tiya twa mvu ya mvu twakubikilwa Nkadi ampemba ye mbasi zandi. Kadi yamona nzala, yeno ke numpani madia, yamona vuina, yeno ke nundwiki. Nzenza yakala, yeno ke nuntambula; nkonga yakala, yeno ke numvuiki; yayela yo siwa muna pelezo, yeno ke nwizi kuntala.’” (Matai 25:41-43) E nkombo bafwanukini e mfundisa yayi, kadi ke basadisi mpangi za Kristu ko ova ntoto. 

Antumwa babakwidi vo lufundisu lwalu lusinga twasa nsambu za mvu ya mvu kumosi mpe ye mfwilu miayingi. Yesu ovovese nkombo vo: “Kieleka inuvovese vo, konso ntangwa nwalembi wo vanga kwa ndiona wandwelo muna mpangi zame, kwa mono nwalembi wo vanga.’ Yau bekwenda kuna lufwasu lwa mvu ya mvu, kansi ansongi kuna moyo a mvu ya mvu.”—Matai 25:45, 46.

E mvutu zina Yesu kavene kwa ntumwa zandi zisadisi alongoki andi bayindula mambu mayingi mekubasadisa mu toma fimpa e ngindu zau yo mavangu mau.