Kaisa Auguseto wa ntinu a Roma, osikidisi vo wantu awonso bafwete kuyisonekesa. Muna kuma kiaki, Yosefe yo Maria bele kuna mbanz’a Beteleme, kuna sude ya Yerusaleme.

Wantu ayingi bena muna Beteleme mu kuyisonekesa. Yosefe yo Maria, wau balembele solola fulu kia leka mu kuma kia ndonga, balwakidi mu mpak’a mabuluku ye bulu yankaka. Yesu i mûna kawutukidi. Maria otomene kumvuika ye kunzinga vana nlele, i bosi untudidi vana dikilwa kia bulu.

Tulenda vova vo Nzambi osadidi Kaisa Auguseto mu vana o nsiku wa kuyisonekesa. Ekuma? E kuma kadi disadisi kimana Yesu kawutukila muna Beteleme, vata dia Davidi wa nkulu andi. Tuka kolo, e Sono yasakula vo Beteleme i mbanza iwutukila o Ntinu wasilwa o nsilu.—Mika 5:2.

Kieleka, o fuku wau wamfunu kikilu! Kuna nzanza, o ntemo utemene buka kia avungudi. O ntemo wau i nkembo a Yave! Mosi muna mbasi za Yave ovovese avungudi vo: “Ke numoni wonga ko, tala, nsangu zambote inutwasidi, ezi zimwesa nkangu awonsono e kiese. Kadi o unu kuna vata dia Davidi i nuwutukìlu mvuluzi, una vo i Kristu wa Mfumu. Ekiaki i sinsu kwa yeno: “Numon’e kimwana-mwana kizingilu o nlele, kilekeso muna dikilwa kia twelezi.” Vana vau, mbasi zankaka zizidi, zivovele vo: “Nkembo kwa Nzambi muna kayè, ova nsi luvuvamu muna akwa dienga.”—Luka 2:10-14.

E mbasi vava zikatukidi, avungudi bavovazianini vo: “Yambula twenda kuna Beteleme, twamona dina divangamene, dina tuzayisu kwa Yave.” (Luka 2:15) Bele mu nzaki, basolwele Yesu wa nsedia vana fulu bavoveso kwa mbasi. Wau avungudi basamwini wantu dina bavoveso kwa mbasi, awonso bawidi dio basivikidi. Maria oyangalele yo lunda mawonso mama muna ntim’andi.

O unu, wantu ayingi bekwikilanga vo Yesu kia 25 kia ngonde a Desemba kawutuka. Kansi, muna zunga kia Beteleme, e ngonde a Desemba, nsungi a mvula, kiozi ye wunge diayingi. Muna ngonde yayi, avungudi yo mameme ke balekanga mu nzanza ko. Ke diadi lendakana ko kwa Ntinu a Roma kalomba kwa nkangu wankolamenanga bavanga nkangalu wandá muna ngonde yayi yampasi mu kwenda kisonekesa. E ziku isonganga vo, Yesu mu lubantiku lwa ngonde a Okutoba kawutuka.