Mvu miayingi miviokele kala tuka Yesu kavubilwa, otomene zayakana kwa wantu. Mafunda ye mafunda ma Ayuda bamwene kala masivi mandi, e nsangu za salu kiandi zimwanganene mu nsi yawonso. Owau, kuna Nkinzi a Saba, (yovo Sudi) muna Yerusaleme, wantu ayingi mukumvava bena.

Konso muntu ngindu zaswaswana kena zau mu kuma kia Yesu. Akaka bavovele vo: “Muntu ambote kwandi.” Ankaka bavutwidi vo: “Ve. Ndonga kevukumunanga.” (Yoane 7:12) Mawonso mama bavovele mo muna lumbu yantete ya nkinzi. Kansi ke muntu ko una yo unkabu wa vovela Yesu vana meso ma ndonga, kadi o nkangu umwene wonga wa mfumu za Ayuda.

Vava kiavioka yak’e lumbu ya nkinzi, Yesu wizidi muna tempelo. Wantu ayingi basivikidi e mpil’andi ya longela. Kasidi tanga sikola za kirabini ko. Dianu vo, Ayuda bayuvuidi vo: “Ondioyu, aweyi kazayidi e Sono, wau kalembele tanga sikola?”—Yoane 7:15.

Yesu ubavutwidi vo: “Mana ilonganga ke mame ko, ma ndiona wantuma kaka. Avo muntu ozolele vanga luzolo lwandi, ozaya kana vo e longi dia Nzambi yovo dia mono kibeni.” (Yoane 7:16, 17) Malongi ma Yesu ngwizani mena yo Nsiku a Nzambi, ye dia sazu mu bakula vo ozolele twasa nkembo kwa Nzambi ke kwa yandi kibeni ko.

Yesu ubayuvuidi vo: “O Mose kanuvana Nsiku ko e? Kansi vava nwina ke mosi ko walemvokela Nsiku. Ekuma nuzolele kumpondela?” Akaka vana vena ndonga, nanga awana batukidi muna mbanza zankaka, ke bazeye diambu diadi ko. Kuna kwa yau, ke vena kuma ko mu vonda nlongi ambote nze Yesu. Babenze vo o ntu andi ke una toma sala ko, i dianu kavovele wo. E ndonga ivutwidi vo: “Nkuya una wau. Nani ozolele kuvonda?”—Yoane 7:19, 20.

Mvu umosi ye ndambu uviokele kala tuka mfumu za Ayuda bavavila vonda Yesu vava kawuka muntu muna lumbu kia Vundu. Owau, Yesu ubadidi kiuvu kibafididi mu yindula yo bakula o bâla kwau kwa ntima. Ovovele vo, muna Nsiku mwasonama vo mwan’a yakala avo owutukidi, kafwete zengwa muna lumbu kianana, kana nkutu vo kiele betela ye lumbu kia Vundu. Ubayuvuidi vo: “O muntu, avo ozengwa muna lumbu kia vundu muna lembi kulula Nsiku a Mose, ekuma numfungidi makasi mandudi wau yasasula muntu muna lumbu kia vundu e? Nuyambula fundisa mfundis’a ndose, kansi nufundisa kaka mfundis’a unsongi.”—Yoane 7:23, 24.

Esi Yerusaleme, ana bazeye diambu diadi bavovele vo: “Ke yandi ko bevavanga [ayadi] o vond’e? Kansi, tala! mu vova kena va meso ma ndonga, yau ke bamvovesa diambu. Ayadi, nga bazeye wo vo yandi kieleka i Kristu e? Muntu ndioyo, tuzeye kuna katuka; kansi o Kristu vava kekwiza, ke muntu ko ozaya kuna ketuka.” Ekuma o nkangu ke ukwikilanga ko vo Yesu yandi i Kristu?—Yoane 7:25-27.

Ekolo bena muna tempelo, Yesu ubavutwidi vo: “Nunzeye, nuzeye mpe kuna yatuka. Kiayizila mu kani dia mono kibeni ko, kansi Ndiona wantuma waludi, oyeno ke nunzeye ko. Omono inzeye, kadi kwa yandi ntukidi, yandi mpe wantuma.” (Yoane 7:28, 29) Vava bawidi e mvutu za Yesu zatoma kiá, bazolele kunkanga, bansia muna pelezo yovo bavonda. Kansi, makani mau mafungidi, kadi e ntangw’a lufwa lwa Yesu ke yafwene ko.

Wantu ayingi batomene kwikila muna Yesu. Kadi wakangalele vana ntandu a mbu, wadingidikidi e tembwa, wadikidi mafunda ma wantu muna mbolo zakete ye mbizi, wawukidi mbevo, wadiatisi makoka, watemwene meso ma mpofo, wawukidi akwa wazi yo fula nkutu mafwa. Dianu vo, bena ye kuma kiasikila muna yuvula vo: “O Kristu vava kekwiza, nga sinsu yayingi kevanga ivioka ina kavangidi ondioyu e?”—Yoane 7:31.

Afarisi wau bawidi o nkangu bevovanga mawonso mama, oyau ye mbuta za nganga batumini makesa benda kanga Yesu.