Yesu osadidi kingana kimosi muna songa kwa alongoki andi e fu kina bafwete kala kiau. Bafwete kuyimwena nze yingiana-ngiana, bayikulula yo lembi vava e tunda. Alongoki bafwete tambula kingiana-ngiana kiaki muna nkumbu a Yesu mu songa vo Yesu batambwidi.’—Matai 18:5.

Wau vo alongoki mpaka bafilanenenge kana nani muna yau osundidi onene, vava bawidi e mvovo mia Yesu bayindwidi vo tumba kabatumbidi. I bosi Yoane wa ntumwa ozayisi Yesu diambu dimosi divangamene, ovovele vo: “E Nlongi, tumwene muntu ovaikisanga nkuya muna nkumbu aku, tunsimini, kadi kekutulandanga ko.”—Luka 9:49.

Nga Yoane oyindulanga vo antumwa kaka bena ye wisa kia wuka wantu yo vaikisa e nkuya? Avo i wau, aweyi o Nyuda ndioyo kalendele vaikisila mianda miambi? Yoane oyindwidi vo muntu ndioyo kalendi vanga mavangu ma nkuma ko wau vo kena ntwadi ko yo Yesu ye ntumwa zandi.

Yoane osivikidi vava Yesu kavovele vo: “Ke nunsimi ko, kadi ke vena muntu ko ovanganga mavangu mankuma muna nkumbu ame olenda kungikila e mbi. Kadi konso ona olembi kutusia kitantu, ku sambu dieto kena. Konso ona okunuvana kopo dia maza wau vo kwa Kristu nuvuilu, kieleka inuvovese vo, ke vidisa nkutu nsendo andi ko.”—Maku 9:39-41.

Muna kolo kiaki, ke dina mfunu ko kwa muntu ndioyo mu kangala yo Kristu muna songa vo ku sambu dia Yesu kena. E nkutakani ya Akristu ke yavangamene ko. Kana una vo muntu ndioyo ke kangalanga yo Yesu ko, e diadi ke disongele ko vo Yesu kebangikanga yovo mu nsambil’a luvunu kena. Nanga o muntu ndioyo lukwikilu kena lwau muna nkumbu a Yesu. Kadi e mvovo mia Yesu misongele vo, o muntu ndioyo kevidisa nsendo andi ko.

Kuna diak’e sambu, dia vonza diadi kala kele vo muntu ndioyo kata e sakuba muna mvovo ye mavangu ma zintumwa. I bosi Yesu ovovele vo: “Kansi, konso ona otesese sakuba kwa mosi mun’awaya andwelo bena ye lukwikilu, diambote kavuikwa e tadi muna nsingu nze dina dizietomonwangwa kwa buluku yo dimunwa muna mbu.” (Maku 9:42) Yesu ovovele diaka vo alandi andi bafwete zenga kana nkutu koko, kulu yovo dunguna disu kele vo dibatesese sakuba. Diambote nkutu vo muntu kadunguna kikwa kia nitu andi kimana kakota muna Kintinu kia Nzambi, ke mu tatidila kio ko yo tubwa kuna Ngeena (Dimb’a Imoni). Antumwa bazeye o ndimba wau una lukufi ye Yerusaleme, vana fuku diyokelwanga e titi. Dianu vo, babakwidi vo e fulu kiaki lufwasu lwa mvu ye mvu kisunzulanga.

Yesu ubalukisi diaka vo: “Nuyikenga nwalembi veza mosi mun’awaya andwelo; kadi inuvovese vo e mbasi zau kuna zulu ntangwa zawonso zitalanga e ndose a Se diame.” Nga o wantu “awaya andwelo” mfunu kikilu bena kwa Se diandi e? Yesu obongele nona kia muntu una ye 100 mameme, kansi ovidisi dimosi. Muntu ndioyo osisidi 99, wele vavi e meme divididi, vava kasolwele dio oyangalele dio kikilu lutila 99. I bosi Yesu okudikidi vo: “Ke luzolo lwa Se diame ko una kuna zulu vo vavila kana nkutu mosi mun’awaya andwelo.”—Matai 18:10, 14.

Nanga Yesu oyindwidi e moko kia ntumwa zandi bafilanenenge mpaka kana nani osundidi onene, Yesu ubavovese vo: “Nukala yo mungwa omo yeno kibeni, nukala yo luvuvamu yeno ye yeno.” (Maku 9:50) O mungwa madia utomesanga. O mungwa, i sia vo mvovo mia ngemba ke mitwasanga mpaka ko, luvuvamu mitatidilanga. Vo i mpaka ke zitatidilanga luvuvamu ko.—Kolosai 4:6.

Ezak’e ntangwa diambu diampasi dilenda bwila alongoki, Yesu ubasongele una balenda dio singikila. Ovovele vo, “Avo mpangi aku usumukini, wenda kunsonga o bi wandi vana va yeno wole kaka. Avo uwididi, obakidi mpangi aku.” Adieyi ovanga avo kawididi ko? Yesu ovovele vo, “Nata muntu mosi yovo nwole kimana muna kimbangi kia wantu wole yovo atatu, mawonso malenda sikidiswa.” Avo e diambu ke disingikilu ko, bafwete dio vova kwa “nkutakani,” i sia vo kwa akuluntu ana bena ye mbebe ya kubasadisa mu baka e nzengo. Adieyi ovanga avo nsumuki kazolele kwandi wa ko? “Yambula kakala kwa ngeye nze mwisi zula ye mvakulwisi a mpaku,” i sia vo wantu ana ke bawizananga ko ye Ayuda.—Matai 18:15-17.

Akuluntu muna nkutakani bafwete landanga e nkanikinu mia Nkand’a Nzambi. Avo bamwene vo nsumuki ngielele kena yau ye kafwete vewa tumbu, e nzengo zazi ‘zikangama mpe kuna zulu.’ Kansi avo bamwene vo mosi munkondwa kuma, e nzengo zazi ‘zikutululwa mpe kuna zulu.’ E nkanikinu miami miau misadilwa muna nkutakani ya Akristu vava isikidiswa. Ekolo akuluntu bekala fimpa o mambu ma mpila yayi, Yesu ovovele vo: “Vana vakutakene nwole yovo ntatu muna nkumbu ame, omono ngina vana.”—Matai 18:18-20.