Yesu, Petelo yo Yakobo vava bakulumukini kuna mongo, bawananene ye ndong’ayingi. Diambu dina vo. Asoneki bazungidi alongoki a Yesu, bayantikidi kubafidisa e mpaka. O nkangu usivikidi wau bamwene Yesu, bele kunkayisa. Yesu ubayuvuidi vo: “Nkia diambu nukubafidisilang’e mpaka?”—Maku 9:16.

Yakala dimosi vana vena ndonga ofukamene vana tandisi a Yesu, ovovele vo: “E Nlongi, itwasìdi mwan’ame kadi mwand’ambi kena wau wankitula se baba. Konso kuna umbakidi, ukumbwisanga vana ntoto, ovaikisang’e fulu-fulu muna nua yo kwetes’o meno yo kunyoyesa. Ndombele kwa alongoki aku bavaikisa wo, kansi ke balendele wo ko.”—Maku 9:17, 18.

Dilenda kala vo asoneki mu veza bena alongoki a Yesu, kadi ke balendele vaikisa nkuya ko una muna mwan’a toko, nanga mu kubaseva bena. O Yesu vana fulu kia vana e mvutu kwa yakala okundodokelanga, ovovese nkangu vo: “E mbandu yakondwa lukwikilu yo bendomoka, yamu nkia kolo ikwamanana kala yeno? Yamu nkia kolo izizidila mavangu meno?” O Yesu kwa asoneki kavovele e mvovo miami miankuma, kadi batokanese alongoki andi wau kakedi vo ko. I bosi, Yesu ovilwidi e ndose kwa se dia mwana, umvovese vo: “Untwasa ova ngina.”—Matai 17:17.

Vava e toko difinamene Yesu, o nkuya una muna yandi umbwisisi va ntoto, oyantikidi tikuka. Ovindumukini va ntoto, e fulu-fulu dimvaikidi omu nua. O Yesu oyuvuidi kwa se diandi vo: “Tuka nkia kolo dikumbwilanga ediadi?” O se ovutwidi vo: “Tuka muna kinsedia, nkumbu miayingi ukumbwisanga vana tiya ye muna maza kimana wamvonda. O se ododokele Yesu vo: “Avo olenda vanga diambu, utufwil’e nkenda, utusadisa.”—Maku 9:21, 22.

O se dia mwana odimbuidi e vuvu, kadi kana nkutu alongoki a Yesu ke balendele kunsadisa ko. Vava o Yesu kawidi e mvovo mia se dia mwana, umvuvikidi o ntima mu mvovo emi: “Ekuma ovovele vo, ‘Avo olenda’! Kadi mawonso malendakana kwa ndiona okwikilanga.” Vana vau, o se dia mwana okazidi, oku vo: “Ngina ye lukwikilu! Unsadisa muna dina nkondelo lukwikilu!”—Maku 9:23, 24.

Yesu omwene e ndonga ikwizanga mu ntinu kwa yandi. Vana meso ma wantu awonso Yesu otumbidi o nkuya, oku vo: “E mwanda wankitula se baba ye fwa matu, ivovese, umvaika, kunkoti diaka ko!” Vava o nkuya uvaikanga, o mwana okazidi yo zakama. Okedi nze yandi ofwidi. Ndonga vava bamwene dio, bavovele vo: “Ofwidi!” (Maku 9:25, 26) Kansi Yesu osimbidi koko kwa mwana, otelamene, “osasukidi tuka muna ntangwa yayina.” (Matai 17:18) O nkangu utomene sivika wau bamwene dina Yesu kavangidi.

Muna lumbu yavioka, alongoki a Yesu bavaikisa nkuya vava batumwa kwa Yesu benda samuna e nsangu zambote. Vava bakotele muna nzo imosi, alongoki bayuvuidi Yesu vo: “Ekuma oyeto ke tulendele wo vaikisila ko?” Yesu ubavutwidi vo, ke balendele ko kadi ke bena yo lukwikilu ko. Ubavovese vo: “E mwand’a mpila yayi mu sambu kaka ulenda vaikila.” (Maku 9:28, 29) Diavavanga vo bakala yo lukwikilu lwasikila yo lomba o nkum’a Nzambi muna sambu muna lenda vaikisa nkuya wau.

Muna fokola e moko, Yesu ovovele vo: “Kieleka inuvovese vo, avo lwina ye lukwikilu nze disu dia mutade, nuvovesa mongo wau vo, ‘Yaluka ova yo kwenda kuna,’ uyaluka, ke vekala diambu dina ke nulenda vanga ko.” (Matai 17:20) Kieleka, o lukwikilu luvuidi nkuma.

E mpasi yo mambu mana mekakidilanga wantu balembi sadila Yave malenda moneka nze mongo wandá. Kansi avo tuna yo lukwikilu, tulenda sunda e mambu mama mampasi.