LONGI DIA 22
Aweyi Olenda Samunuina e Nsangu Zambote kwa Akaka?
Yamu wau mambu mayingi kala olongokele muna Bibila. Nanga olenda yindula vo: ‘Wantu awonso bafwete wá e nsangu zazi!’ Dialudi vo wantu awonso nsangu zazi bavuidi o mfunu! Kana una vo i wau, olenda mona o wonga wazayisa kwa akaka mana olongokanga. Yambula twafimpa una olenda sundila o wonga yo kala ye kiese kia samuna e nsangu zambote zina muna Bibila.
1. Aweyi olenda zayisila kwa yitu ye akundi aku mana olongokanga?
Alongoki a Yesu bavova vo: “Ke tulendi yambula vova mana twamona yo wá ko.” (Mavangu 4:20) Alongoki batoma zolanga mana balongwanga kwa Yesu, muna kuma kiaki bazola mo zayisa kwa wantu ayingi. Nga ongeye mpe i wau omonanga? Avo i wau omonanga, sadila konso lau mu zayisa kwa yitu ye akundi aku mana olongokanga. Kansi, vangila wo kuna ngemba.—Tanga Kolosai 4:6.
Tala zaka ndekwa olenda sadila mu yantika e moko
-
Vava omokenanga ye yitu yaku, olenda vova vo: “Mu lumingu lwalu, diambu diamfunu yalongokele.”
-
Olenda sadila sono kimosi mu kasakesa nkundi aku oyelele yovo una ye ntokani.
-
Avo akwaku a salu bayuvuidi aweyi waviokele nsuk’a lumingu, ubazayisa mana walongokele muna longi diaku dia Bibila yovo muna lukutakanu.
-
Songa kwa akundi aku e nzil’eto ya internete jw.org.
-
Bokelanga akaka bakala yaku vava olongokanga e Bibila yovo ubasonga una balenda lombela e longi dia Bibila muna nzil’eto ya internete jw.org.
2. Ekuma dinina o mfunu mu sila umbangi kumosi ye ampangi?
Alongoki a Yesu ke basilanga kaka umbangi ko kwa wantu ana bazaya. Yesu ‘wabatuma nwole-nwole benda viti muna mbanza zawonso’ mu sila umbangi kwa wantu. (Luka 10:1) Ediadi diavana e lau kwa wantu ayingi mu wá e nsangu zambote. O sila umbangi kumosi ye akaka diatwasanga kiese kiayingi kwa alongoki. (Luka 10:17) Nga olenda kuyisila e kani dia sila umbangi kumosi ye ampangi muna nkutakani?
ZAYA DIAKA MANKAKA
Zaya una olenda sundila wonga yo mona e kiese kia samuna e nsangu zambote.
3. Yave okala yaku
Akaka bazolele samuna e nsangu zambote, kansi betokananga mu kuma kia dina akaka beyindula ye kana vo betambulwila nsangu zambote.
-
Nga wonga omonanga mu zayisa kwa akaka mana olongokanga? Ekuma?
Tala e VIDEO, i bosi, vana e mvutu za kiuvu kilende.
-
Aleke bayikilu mu video yayi, aweyi basundila o wonga?
Tanga Yesaya 41:10, i bosi, vana e mvutu za kiuvu eki:
-
Avo omwene wonga wa sila umbangi, aweyi e sambu kilenda kusadisila?
Nga ozeye?
Ndonga muna Mbangi za Yave, babanzanga vo ke belenda samuna e nsangu zambote ko kwa akaka. Tala nona kia mpangi Sergey ozingilanga kuna Rússia. Wakimwenanga vo kena mfunu ko ye diampasi diakalanga kwa yandi mu mokena ye akaka. Kansi, kuna kwalanda wayantika longoka Bibila. Wavova vo: “Kanele vo wonga yamonanga, yayantika zayisa kwa akaka mana yalongokanga. O zayisa oma ma Bibila kwa akaka diansadisa mu kukimwena vo mfunu ngina. Ediadi diansadisa mpe mu kumika lukwikilu lwame.”
4. Vovelanga kuna ngemba
Vitila wazayisa e nsangu zambote kwa akaka, kuyindula kaka mana ovova ko, kansi yindula mpe una ovovela mo. Tanga 2 Timoteo 2:24 ye 1 Petelo 3:15, i bosi, vana e mvutu za yuvu eyi:
-
Vava omokena ye akaka oma ma Bibila, aweyi olenda sadila e mambu mena mu sono yayi?
-
Avo akaka muna yitu ye akundi aku ke batambulwidi ko mana okubavovesa, adieyi ofwete vanga? Adieyi kufwete vanga ko?
-
Ekuma dinina diambote mu yuvula e yuvu kuna ndekwa, vana fulu kia kubazayisa mana bafwete kwikila?
5. O samuna nsangu zambote kwa akaka kiese ditwasanga
Yave wavana Yesu e salu kia samuna e nsangu zambote. Aweyi Yesu kabadikilanga e salu kiaki? Tanga Yoane 4:34, i bosi, vana e mvutu za yuvu eyi:
-
O dia madia mambote dikutusadisanga mu kala o moyo ye dikututwasilanga mpe kiese. Yesu wavova vo o vanga luzolo lwa Nzambi, kumosi ye salu kia umbangi dina nze madia. Ekuma?
-
Ekuma tulenda vovela vo e salu kia samuna e nsangu zambote kiese kikilu kitwasanga?
Mambu malenda kusadisa
-
Muna lukutakanu lwa kati kwa lumingu, sia e sungididi muna ndekwa zisongwa zivovela una tulenda yantikila sila umbangi kwa akaka.
-
Zayisa kwa nlongi aku e kani diaku diayantika vanga kiyekwa muna tukutakanu twa kati kwa lumingu. O vanga kiyekwa dilenda kusadisa mu kala wakubama mu zayisa kwa akaka mana olongokanga.
-
Sadila fintu fia diambu “Avo Muntu Uvovese vo” yovo “Avo Muntu Uyuvuidi vo” fina mu nkanda wau mu zaya una olenda vanina e mvutu muna yuvu yankaka wantu beyuvulanga yovo avo muntu katambulwidi ko mana umvovese.
AVO MUNTU UYUVUIDI VO: “Kumonekanga diaka ko, nkia nsangu utunatini?”
-
Aweyi olenda sadila e lau diadi mu vovesa kwa muntu mana olongokanga muna longi diaku dia Bibila?
MAMBU MASINA MA LONGI DIADI
O samuna e nsangu zambote kiese ditwasanga. Avo oyantikidi, omona vo ke dina kwandi diampasi ko.
Nkia Mambu Olongokele?
-
Ekuma tufwete samunuina e nsangu zambote kwa akaka?
-
Aweyi olenda wo vangila kuna ngemba zawonso?
-
Aweyi olenda sundila wonga wa sila umbangi kwa wantu?
TALA MPE OMA MALENDE
Badika mpila yá zaleboka olenda samunuina e nsangu zambote muna sadila e kalati kia jw.org.
Tala fu yá ilenda kusadisa mu samuna e nsangu zambote.
“Nga Wakubama Una mu Kituka se Mbaki a Wantu?” (Eyingidilu dia Setemba, 2020)
Tala una nona kimosi kina muna Bibila kilenda kusadisila mu kala yo unkabu wasila umbangi, kana nkutu vo u nleke.
Tala una olenda mokenena mambu ma Bibila ye yitu yaku ana ke bazeye Yave ko.
“Simba e Ntima mia Yitu Bena vo Mindembi Kwikila” (Eyingidilu dia 15 dia Malusu, 2014)
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
