O mvovo “Nsamaria Ambote” utoma sadilwanga mu yika muntu una ye fu kia sadisa wantu ankaka bena mu mpasi. E tuku dia mvovo wau i kingana kia Yesu kina kavovela vo o muntu una vo nkweto ambote ofwilanga akaka e nkenda yo kubasadisa lembi tala e nsi ina bawutukila yovo mpila ina basansukila. a

Oma mena mu lukaya lwalu

•  E kingana kia “Nsamaria Ambote” adieyi kivovanga?

•  Ekuma Yesu katela e kingana kiaki?

•  Ameyi tulenda longoka muna kingana kiaki?

•  Esi Samaria aki nani bakala?

•  O lusansu lwalu lwa “Nsamaria Ambote” nga diambu diavangama kikilu?

Tala e kingana kiaki kia Yesu muna lukufi: Nyuda mosi mu nkangalu kakala, watuka ku Yerusaleme yo kwenda kuna Yeriko. Muna nzila, wawanana ye mivi miayiya e lekwa kakala yau, bawanda yo kunsisa wafwa e kiambu.

Nyuda mosi wakala se nganga ye wankaka mfumu a dibundu kakala, yau awole bavioka muntu ona wamana lwekwa e mputa. Kana una vo wantu awaya esi nsi mosi bakala, ke mosi ko muna yau waningama mu sadisa muntu ndiona.

I bosi, muntu a zula kiankaka walwaka. Musi Samaria kakala. (Luka 10:33; 17:16-18) Musi Samaria wafwila muntu ndiona e nkenda, wayitila e mputa zandi o mazi ye kunata muna lombo kialwakilanga e nzenza. Wanlunga-lunga o fuku wawonso. Muna lumbu kialanda, wafuta e nzimbu kwa mfumu za lombo kimana banlunga-lunga ye wabavovesa vo konso nzimbu zankaka befuta muna kunsadisa ovutula zo vava kevutuka.—Luka 10:30-35.

Yesu wata kingana kiaki kwa muntu wayindulanga vo o nkwandi i awana kaka bena vo esi kanda dimosi yo sambila mu dibundu dimosi. O Yesu diambu diamfunu kazola longa kwa muntu ndiona i diadi: Diavavanga kwa muntu ndiona vo kasoba e ngindu zandi mu mpila ina kabadikilanga “akwandi,” i sia vo, ke ayuda kaka ko kansi ye wantu awonso. (Luka 10:36, 37) O lusansu lwalu lwasonekwa muna Bibila muna sadisa awonso bazolele yangidika Nzambi.—2 Timoteo 3:16, 17.

O lusansu lutulongele vo o muntu una vo nkweto mu mavangu kesongelanga e nkenda. Muna sadisa o muntu una mu mpasi, ke talanga kanda ko, mpila ina kasansukila, ngatu nsi ina kawutukila. O muntu una vo nkweto ovanganga kwa akaka mana kezolanga vo akaka bavanga kwa yandi.—Matai 7:12.

Esi Samaria bazingilanga kuna node ya Yuda. Akaka muna yau bawutukila muna tongo twa sangi vana vena Ayuda ye awana ke bakala Ayuda ko.

Muna tandu kiantete, esi Samaria basoka dibundu diaswaswana. Ke batambulwilanga nkanda miawonso mia Sono ya Kiyibere ko, nkanda tanu miantete kaka batambulwilanga.

Ayuda ayingi muna lumbu ya Yesu bavezanga esi Samaria yo venga kala yau entwadi. (Yoane 4:9) Ayuda akaka basadilanga o mvovo “Nsamaria” nze mvovo wa luvezo.—Yoane 8:48.

E Bibila ke kivovanga ko vo o lusansu lwa Nsamaria diambu diavangama kieleka. Kansi, Yesu wasadilanga e fu ye fulu yatoma zayakana muna malongi mandi kimana awana banwanga babakula e mbuta diambu.

Mambu mayingi muna lusansu lwalu maludi. Muna bonga e nona:

• E nzila yatukanga kuna Yerusaleme yo kwenda kuna Yeriko, vioka kilometa 20 yakala ye kilometa 1 kiakulumuka. Muna kuma kiaki, vava lusansu luvovanga vo wantu bayendanga kuna Yeriko ‘bakulumukanga tuka kuna Yerusaleme,’ ludi kikilu luvovanga.—Luka 10:30.

• Anganga ye Anelevi ana bazingilanga kuna Yeriko, i nzila yayi basadilanga muna kwenda kuna Yerusaleme e lumbu yawonso.

• E mivi nkumbu miayingi baswamanga muna nzila yayi mu vava yiya awana baviokelanga mo, musungula awana bakangalanga yau mosi kaka.