Ingeta. Nkand’a Nzambi ye mambu mebwanga muna zingu, mesonganga vo Nzambi ovananga e mvutu za sambu yeto. Nkand’a Nzambi uvovanga vo: “Olunganisa luzolo lu’awana bekumvumina; owa kazu kiau yo kubavuluza.” (Nkunga 145:19) Kansi, o Nzambi muna wá sambu kiaku, ofwete sambila muna mpila yambote.

Mambu mamfunu kwa Nzambi

•   Ofwete samba kwa Nzambi ke kwa Yesu ko ngatu kwa Maria, ambasi yovo teke. Yave wa Nzambi kaka “owanga sambu.”—Nkunga 65:2.

•   E sambu kifwete kala ngwizani yo luzolo lwa Nzambi yovo nkanikinu miandi mina muna Nkand’a Nzambi.—1 Yoane 5:14.

•   Ofwete samba muna nkumbu a Yesu, muna songa vo okunzitisanga. Yesu wavova vo: “Ke vena ona okwiza kwa Se ko avo ke mu mono ko.”—Yoane 14:6.

•   Ofwete kala yo lukwikilu, lomba kwa Nzambi kakudikila lukwikilu.—Matai 21:22; Luka 17:5.

•   Ofwete kala nlembami yo ziula o ntim’aku kwa Nzambi. Nkand’a Nzambi uvovanga vo: “Kanele vo o Yave watundalala, tala ketal’asakaladi.”—Nkunga 138:6.

•   Kuyoyi ko. Yesu wavova vo: “Nukwamanana lomba, ozevo nuvewa.”—Luka 11:9.

Mambu ke mena mfunu ko kwa Nzambi

•   Nkand’a nitu ye nsi aku. Nkand’a Nzambi uvovanga vo: “Nzambi ke sianga mpambula ko, kansi muna zula yawonso, ndiona okumvumina yo vanga oma mansongi otondwa kwa yandi.”—Mavangu 10:34, 35.

•   E mpw’aku. Olenda samba kwa Nzambu ekolo una wavuanda, oyinzamene, wafukama ye watelama.—1 Tusansu 17:16; Nekemiya 8:6; Daniele 6:10; Maku 11:25.

•   Samba mu nding’a ngolo yovo yakuluka. Nzambi owanga kana nkutu sambu ya nsi a ntima, ina o wantu ke balendi wá ko.—Nekemiya 2:1-6.

•   Mpasi zaku zayingi yovo zakete. Nzambi okutuwondelelanga vo “nuyekeka ntokani zeno zawonso kwa yandi, kadi mfunu kekunuvuanga.”—1 Petelo 5:7.