Матай 19:1—30
19 Ушул сөздөрдү айткандан кийин Иса Галилеядан чыгып, Иордандын аркы өйүзүнө, Жүйүт жери менен чектешкен аймакка барды.+
2 Анын артынан көп эл ээрчип жүрдү. Иса ошол жакта оорулууларды айыктырды.
3 Ошол убакта фарисейлер келип, аны сынаш үчүн: «Эркек киши аялы менен ар кандай себептен улам ажыраша берсе болобу?»+ — деп сурашты.
4 Иса аларга: «Жараткандын эң башында адамдарды эркек-аял кылып жаратып:+
5 „Ошондуктан эркек ата-энесин калтырып, аялы менен биригет да, экөө бир бүтүн* болот“,+— деп айтканын окуган жок белеңер?
6 Ошентип, эми алар эки бөлөк эмес, бир бүтүн. Ошон үчүн Кудай кошконду* адам ажыратпасын»,+— деп жооп берди.
7 Фарисейлер ага: «Анда эмнеге Муса эркек киши талак кат жазып берип, аялы менен ажырашса болот деп айткан?»+ — дешти.
8 Иса аларга: «Муса аялыңар менен ажырашканга жүрөгүңөрдүн мерездигинен улам жол берген.+ Бирок башында андай эмес болчу.+
9 Силерге айтып коёюн, аялы ыпылас иш* кылбаса да, аны менен ажырашып, башкага үйлөнгөн киши ойноштук кылган болот»,+— деп айтты.
10 Ошондо шакирттери Исага: «Эгер күйөө менен аялына карата талап ушундай болсо, анда үйлөнбөй эле койгон жакшы эмеспи»,— дешти.
11 Ал: «Бирок баары эле антип жашай албайт, Кудайдан ушундай белек алгандар* гана жашай алат.+
12 Себеби айрымдар төрөлгөнүнөн эле үйлөнгөнгө жараксыз болот, башкаларын адамдар жараксыз кылып коёт. Ал эми кээ бирөөлөр үйлөнгөндөн өз эрки менен асман Падышалыгы үчүн баш тартышат. Ким ушинтип бойдок калгысы келсе, бойдок калсын»,+— деди.
13 Анан эл балдарга батасын берип*, алар үчүн тиленсин деп, Исага кичинекей балдарын алып келе баштады. Бирок шакирттер аларды тыйып жатышты.+
14 Ошондо Иса: «Балдарды коё бергиле, мага келишине тоскоолдук кылбагыла. Анткени асман Падышалыгынын баталарын ушуларга окшогондор алат»,— деп айтты.+
15 Анан балдарга батасын берди да*, ал жерден кетти.
16 Андан кийин бир жигит келип, Исадан: «Устат, түбөлүк өмүр алыш үчүн кандай жакшы иш кылышым керек?» — деп сурады.+
17 Ал: «„Кандай жакшы иш кылышым керек?” — деп эмнеге менден сурап жатасың? Жакшы деп аталганга татыктуу* бирөө гана бар.+ Эгер өмүр алгың келсе, Кудайдын осуяттарын дайыма аткар»,+— деп жооп берди.
18 «Кайсы осуяттарын?» — деди жигит. Иса: «Киши өлтүрбөгүлө,+ ойноштук кылбагыла,+ уурдабагыла,+ жалган күбө болбогула,+
19 ата-энеңерди сыйлагыла,+ башканы өзүңөрдү сүйгөндөй сүйгүлө деген осуяттарын»,+— деп айтты.
20 Жигит ага: «Мунун баарын аткарып эле келатам. Дагы эмне кылышым керек?» — деди.
21 Иса: «Эгер жеткилең болгуң келсе*, бар да, мал-мүлкүңдү сатып, түшкөн акчаны кедей-кембагалдарга таратып бер, ошондо асманда казынаң болот.+ Анан келип, менин жолдоочум бол»,+— деп жооп берди.
22 Муну укканда жигит капа болуп, кетип калды, анткени мал-мүлкү аябай көп эле.+
23 Ошондо Иса шакирттерине: «Ишенип койгула, бай кишинин асман Падышалыгына кириши* кыйын.+
24 Буга да ишенип койгула, байдын Кудайдын Падышалыгына киргенине караганда төөнүн ийненин көзүнөн өткөнү оңоюраак»,— деди.+
25 Муну укканда шакирттер аябай таң калып: «Анда ким куткарыла алат?» — дешти.+
26 Иса аларды карап: «Бул адам баласынын колунан келбейт, ал эми Кудайдын колунан келбеген эч нерсе жок»,+— деди.
27 Ошондо Петир: «Мына, биз баарын таштап, сени ээрчип жүрөбүз. Бул үчүн эмне алабыз?»+ — деп сурады.
28 Иса мындай деп жооп берди: «Ишенип койгула, Кудай баарын жаңырткан убакта, адам Уулу даңктуу тактысына отурганда, менин жолумду жолдогон силер да 12 тактыга отуруп, Ысрайылдын 12 уруусуна бийлик кылып, сот жүргүзөсүңөр.+
29 Менин жолдоочум болгону үчүн үй-жайын, ага-инилерин же эже-карындаштарын, атасын же энесин, же балдарын, же жерин калтырган ар бир адам андан 100 эсе көп алат жана сыйлыкка түбөлүк өмүр алат.+
30 Биринчилердин көптөрү акыркы, ал эми акыркылар биринчи болот.+
Шилтемелер
^ Сөзмө-сөз: «бир дене».
^ Сөзмө-сөз: «бир моюнтурукка кошконду».
^ Б. а. бойдоктукту белек катары алгандар.
^ Сөзмө-сөз: «колдорун коюп».
^ Сөзмө-сөз: «алардын үстүнө колун койду да».
^ Же: «Эмне жакшы экенин аныктай турган».
^ Же: «Ушунун баарын кынтыксыз аткаргың келсе».
^ Же: «асман Падышалыгынын баталарын алышы».
