Мыйзам 27:1—26
27 Муса ысрайыл элинин аксакалдары менен чогуу элге кайрылып, мындай деди: «Мен бүгүн берген осуяттардын баарын аткаргыла.
2 Иордандын аркы өйүзүнө өтүп, Жахаба Кудайыңар силерге берген жерге барганыңарда чоң таштарды коюп, аларды акиташ менен актагыла.+
3 Жахаба Кудайыңар берген жерге, ата-бабаларыңардын Кудайы Жахаба силерге айткан сүт менен бал аккан жерге, барыш үчүн дарыядан өткөндө ал таштарга бул Мыйзамда айтылгандын баарын жазгыла.+
4 Иордандан өткөндө, мен бүгүн силерге буйрук кылгандай, ал таштарды Эбал тоосуна+ коюп, акиташ менен актагыла.
5 Ошондой эле ал жерге Жахаба Кудайыңарга арнап таштан курмандык жайын кургула, бирок анын таштарын темир курал менен жылмалабагыла.+
6 Жахаба Кудайыңарга жылмаланбаган таштардан курмандык жайын куруп, анын үстүнө Жахаба Кудайыңарга арнап бүтүндөй өрттөлчү курмандыктарды чалгыла.
7 Тынчтык курмандыктарыңарды+ ошол жерге алып барып жеп,+ Жахаба Кудайыңардын алдында кубангыла.+
8 Бул мыйзамда айтылгандын баарын акталган таштарга так-даана кылып жазып койгула».+
9 Анан Муса дин кызматчы-лебилер менен бирге бүт ысрайыл элине кайрылып: «Үн катпай ук, оо, Ысрайыл! Бүгүн сен Жахаба Кудайыңдын эли болдуң.+
10 Жахаба Кудайыңдын сөзүнө кулак сал, мен бүгүн буйрук кылган осуяттары менен көрсөтмөлөрүн аткар»,+— деди.
11 Ошол күнү Муса элге мындай деп буйрук кылды:
12 «Иордандан өткөндөн кийин элге бата бериш үчүн Гаризим тоосунда+ Шымон, Леби, Жүйүт, Исахар, Жусуп, Бенжемин уруулары турушу керек.
13 Ал эми каргыш айтыш үчүн Эбал тоосунда+ Рубейин, Гат, Ашыр, Забулун, Дан, Напталы уруулары турушу керек.
14 Анан лебилер үнүн бийик чыгарып, бүт Ысрайылга мындай дешсин:+
15 „Оюп же куюп буркан жасап,+ жашырынып алып ага сыйынган кишиге каргыш тийсин!+ Устанын колунан чыккан ал нерсе Жахаба үчүн жийиркеничтүү“.+ (Ошондо бүт эл: „Оомийн*!“ — десин.)
16 „Атасын же энесин сыйлабаганга каргыш тийсин!“+ (Ошондо бүт эл: „Оомийн!“ — десин.)
17 „Кошунасынын чек белгилерин жылдырганга каргыш тийсин!“+ (Ошондо бүт эл: „Оомийн!“ — десин.)
18 „Сокурду жолдон адаштырганга каргыш тийсин!“+ (Ошондо бүт эл: „Оомийн!“ — десин.)
19 „Бөтөн жерликтин, жетимдин же жесирдин+ ишин карап жатып адилетсиздик кылган кишиге каргыш тийсин!“+ (Ошондо бүт эл: „Оомийн!“ — десин.)
20 „Атасынын аялы менен жатканга каргыш тийсин! Анткени ал атасын шерменде кылган болот“.+ (Ошондо бүт эл: „Оомийн!“ — десин.)
21 „Жаныбар менен жатканга каргыш тийсин!“+ (Ошондо бүт эл: „Оомийн!“ — десин.)
22 „Эжеси же карындашы менен, атасынын же энесинин кызы менен, жатканга каргыш тийсин!“+ (Ошондо бүт эл: „Оомийн!“ — десин.)
23 „Кайненеси менен жатканга каргыш тийсин!“+ (Ошондо бүт эл: „Оомийн!“ — десин.)
24 „Бир жерде аңдып туруп бирөөнү өлтүргөнгө каргыш тийсин!“+ (Ошондо бүт эл: „Оомийн!“ — десин.)
25 „Бейкүнөө кишинин каны төгүлүшү үчүн пара алган кишиге каргыш тийсин!“+ (Ошондо бүт эл: „Оомийн!“ — десин.)
26 „Бул Мыйзамда айтылгандарды аткарбаганга, аларга ылайык иш кылбаганга каргыш тийсин!“+ (Ошондо бүт эл: „Оомийн!“ — десин.)
