Ong-Li Mbangi ya Yehova yena yibâka ku Bulgarie. Ndongokolo ya Bibila keri saka kwe Zlatka, mukento wumosi, we na bakala dieri lembo longokaka Bibila. Ong-Li têle ti: “Bu tazonzela luzingu lwa mu kanda, nayizi singasa mfunu ya tâka kwe bakala dieto na kwe bala beto ti bawu tuzololo. Zlatka wakuntala na tidiri tia tiari mpe wakuntêla ti keka’eti tâ kwe bakala diandi na kwe mwana’andi wa mukento ko ti bawu kazololo!”

Zlatka watâ ti: “Ndendi yirika musamu ni musamu mu bungu dia bawu, kâ ka ndedi’â natâ misamu mio ko.” Yandi vutulu tâ ti: “Nguri’ani ka kuntêla ko ti meno kazololo, nkaka’ani ya yikento mpe ka tâ kwe nguri’ani ko ti yandi kazololo.” Ong-Li wasongela kwe Zlatka mu Bibila ti Yehova watâ kwe Yezu mu zu dia ngolo ti yandi kazololo. (Matie 3:17) Musamu wo watuma Zlatka mu sambila Yehova mu bungu dia musamu wo na mu bâ na kani dia tâ kwe bakala diandi na kwe mwana’andi wa wukento ti bawu kazololo.

Ong-Li têle ti: “Bilumbu biole ha manima, Zlatka wakuntêla na nsayi yayansoni ti yandi wasambila Yehova ngatu kamubakisa. Mu ntangu bakala diandi bu diakâla ku nzo, yandi wamutêla ti mu ndongokolo’andi ya Bibila walongokele ti mfumu wena kwe mukento mu zitisaka na mu zoloko bakala diandi. Mpe, bu kahuma fioti, têle kwe bakala diandi ti yandi katomono zolo! Mwana’andi wa wukento mpe bu wakota ku nzo, Zlatka wamubumba mpe wamutêla ti yandi kazololo! Zlatka wakuntêla ti: ‘Bwawu bu bubote nita mona ku mutima. Tûka mvula zazingi ka ndieri’â lendaka ko mu dukisa misamu mieri nani ku mutima, kâ na lubakusu lwa Yehova lenda die nani dia songela luzolo lwani kwe kanda diani.’

Ong-Li vutulu tâ ti: “Lumingu lumosi ha manima, nayizi bwabana na bakala dia Zlatka, mpe yandi wakuntêla ti: ‘Bantu babingi beri kuntêlaka ti Zlatka ka fweti’â kalongoka Bibila na beno ko, kâ ntembe kâni ndongokolo’andi ya Bibila nkatika mfunu yena mu bungu dia kanda dieto. Bwawu bu tayika tomo wisanaka mpe mu nkatika nsayi twena.’”