Bibila mbala mosi kwa dizonzelaka tatouage, mu Levitike 19:28, yitâka: “Ka lufweti’â lwatitûla tatouage ko.” Nzambi wahana ntumunu yo kwe bala ba Israele ngatu baswaswana na makanda makaka meri tûlaka tatouage za nkumbu za nzambi zawu mu nitu, peleko za bidimbu bia nzambi zawu. (Lubambu 14:2) Ni bu sa ti misiku mia hana Nzambi kwe Israele ka mitarilaka Bakristo ko, musamu wa mbote wena mu tomo dimbitila mu mutieno wutâ duka mu ntumunu yo yitariri tatouage.

Ngano Mukristo wulendi bâ na tatouage?

 Verse za Bibila zita landa zilendi twarisa mabanza maku:

•   “Bakento [. . .] bafweti zabaka ndilu zawu.” (1 Timote 2:9) Mutieno wo, bakento na bakala wuta tarila. Tufweti zitisaka mbanzulu za bantu bakaka, mpe ka tufweti’â tadingaka ko mu timonekesa.

•   Bantu bakaka tatouage basaka mu songela bawu ni banani, pekeko mu songela timpwanza tiawu; bakaka ni mu songela ti misamu mia nitu’awu bawu kwa mita tarila. Kâ, Bibila ditâka kwe Bakristo: “Han[eno] nitu zeno ntiana mukayulu wa moyo, wa santu mpe Nzambi wu kalendi tambula: tisalu tia santu na mayindu meno.” (Bisi-Rome 12:1) Sarila “mayindu” maku mu taluzula mu bungu dia nti zoloko tatouage. Ngano ni mu landa kwa bantu bakaka, mu songela mpila ya timvuka tia bantu ti wena? Zaba ti mabanza maku malendi kwizi soba, kâ tatouage ka yizimbakana ko. Dimbitila mu misamu mikutumaka kulendi ku bakisa mu bonga nzengolo ya ndwenga.​—Bingana 4:7.

•   “Makani ma muntu we na manzangu ku lusakumunu manataka; kâ bô bayirikaka misamu ntinu-ntinu mu bumputu basukinaka.” (Bingana 21:5) Vula vula, bô basolaka mu sa tatouage, mu “ntinu-ntinu” basilaka zo. Ka babongaka ntangu ko ya dimbitila mu misamu mi tulumuna nzengolo’awu mu tindiku tiawu na bantu bakaka, peleko mu tisalu tiawu. Tatouage mpe nkatika ntalu zena, katula zo mpasi zazingi kusaka mu nitu. Mabanza mamosi, na mpila yita kurila bisalu bia bô bakatulaka tatouage bisongele ti bô batûlaka tatouage mu nitu, nkatika nionga bakwizi niongaka ha manima.