Ngano Yezu bwe kabâ?
Mvutu ya Bibila
Muntu kâni zebi bwe Yezu kabâ. Bibila ka dizonzelaka ko mpila yi kabâ, mu songela ti mpila ya bâ Yezu ka yena mfunu ko. Kâ, Bibila mwa ndambu dituzonzelaka mpila yi kabâ.
Mpila yi kabâ: Yezu Muyuda wabâ, kampe wafwanakana fioti na nguri’andi. (Bahebre 7:14) Ka tulendi’â tatomo tâ ko ti wa swaswana weri na Bayuda bakaka. Tilumbu timosi wakatuka ku Galile mu kwenda ku Yerusaleme mu mansweki ngatu balembo mu zaba. (Za 7:10, 11) Kampe Yezu ka tomo’â bâ wa swaswana ko na milongoki miandi. Ka tuzimbakanandi ti ni Yuda Iskariote wasongela Yezu kwe bantu bayizi mu kanga.—Matie 26:47-49.
Bula bwa nsuki zandi: Kampe Yezu ka bâ na nsuki za zila ko, mu bungu ti Bibila ditâka ti “nsoni zena kwe bakala mu bâ na nsuki za zila.”—1 Bisi-Korente 11:14.
Ndievo zandi: Yezu ndievo zabâ nandi. Musiku wa Bayuda keri landa, weri yiminaka kwe babakala mu lembo ‘bebesa ndilu ya ndievo zawu.’ (Levitike 19:27; Bisi-Ngalate 4:4) Musamu wakaka, ndievo za Yezu bazonzelaka mu mbikululu yimosi yeri zonzelaka mpasi zandi.—Izaya 50:6.
Nitu’andi: Misamu miamiansoni misongele ti Yezu ngolo zabâ nandi. Mu tisalu tiandi tia samuna, wadiata bitini biabingi. (Matie 9:35) Mbala zole katsemesa Tempolo na tisikoti, bu kakuma bantu beri sobesaka mbongo na bibulu biawu. (Like 19:45, 46; Za 2:14, 15) Buku dimosi (McClintock and Strong’s Cyclopedia) ditêle ti: “Tinsamu tiatiansoni tia evanzile titâka ti [Yezu] ngolo zabâ nandi mpe wawasa weri.”—Volime IV, tinima 884.
Tidiri tiandi: Yezu nsayi yeri nandi na tiari tia bakaka, kampe wa weri monekaka ku tidiri tiandi. (Matie 11:28, 29) Bantu babansoni lubakusku na lutindusu beri dingaka kwe yandi. (Like 5:12, 13; 7:37, 38) Bala ba fioti mpe nsayi beri monaka mu bâ na yandi.—Matie 19:13-15; Marke 9:35-37.
Mabanza ma mbi ma bâka na bantu mu mpila ya bâ Yezu
Mabanza ma mbi: Bantu bakaka batâka ti Yezu ku Afrique katûka mu bungu ti mu mukanda wa Nzabukusu nsuki zandi bafwanakasaka na conton mpe malu mandi mu “bronze yi bayokele ku tiya.”—Nzabukusu 1:14, 15, Traduction du monde nouveau.
Matieleka: Mukanda wa Nzabukusu “bidimbu” biabingi wusarilaka. (Nzabukusu 1:1) Mu tifwani Bibila dizonzelaka nsuki na malu ma Yezu mu songela bifu biandi ha manima ma mvumbukulu’andi, kâ ka mu zonzela mpila ko yi kabâ bu keri ha mutoto. Bu ditâka ti “mutu’andi na nsuki zandi za mpembe zeri ntiana lene ya mpembe, ntiana neige,” mukanda wa Nzabukusu 1:14 couleur wusarilaka mu fwanakasa bima, kâ ka mpila ko yimonekenaka bima. Ndwenga ze na Yezu yimonekesaka. (Nzabukusu 3:14) Verse yo ka yita fwanakasa mpila ye nsuki za Yezu ko na coton, peleko na neige.
Malu ma Yezu “kenga meri kengaka ntiana cuivre yita ya ku tiya.” (Nzabukusu 1:15) Mpe tidiri tiandi “tieri ntiana mwini bu wutomo kengaka.” (Nzabukusu 1:16) Mu bungu ti ka kwena kanda ko die na mukanda-nitu wudelakane na nzonzolo yo, timona-meso tio tifwani kwa tieri, mu zonzela Yezu ntiana yandi “bâka ku mbuka ye na mutsamina wu balendi lembo pusana.”—1 Timote 6:16.
Mabanza ma mbi: Yezu keri’â na ngolo ko.
Matieleka: Yezu nkatika bakala dieri. Mu tifwani, bu bayizi mu kanga, na butindi bwabwansoni watizabikisa kwe bantu bayizi mu kanga. (Za 18:4-8) Yezu mpe nkatika ngolo zeri nandi mu bungu ti tisalu tia mabaya keri salaka na bisalulu bia mu moko.—Marke 6:3.
Buna, mu bungu dia nti Yezu kabâ na nsatu lubakusu mu nata poto diandi dia matimuna? Mpe mu bungu dia nti kafwila ntete bantu bakaka babahonda ha timosi na yandi? (Like 23:26; Za 19:31-33) Ntete bamuhonda, Yezu wa nkatika wafwatika weri. Mpimpa ya mukaka meso ma tia mabâ nandi, kampe mu bungu dia lwaka lwa ngolo. (Like 22:42-44) Mu mpimpa yo, Bayuda bamuniekona, mpe mu pari Bisi-Rome batomo mu mwisa mpasi. (Matie 26:67, 68; Za 19:1-3) Misamu mio miasa ti kakulu fwa.
Mabanza ma mbi: Ntangu zazansoni Yezu mu tiari kwa keri.
Matieleka: Yezu watomo landa bifu bia Tata’andi die ku zulu, Yehova, Bibila dikatâka “Nzambi ya nsayi.” (1 Timote 1:11; Za 14:9) Diangana, Yezu wasongela kwe bantu bakaka bwe babêla mu nsayi. (Matie 5:3-9; Like 11:28) Misamu mio misongele ti Yezu nsayi kwa yeri nandi.
Dzukula mpe...
ESSENTIAL BIBLE TEACHINGS
Bwe tulendi bela na lukwikulu ti Bibila kwe Nzambi diatuka?
Tala ti Bibila Nzambi vwiri dio, ka dilendi’â diafwanakana na mabuku makaka ko.
BETO NI BANANI?
Lomba vizite
Zonzela tiyuvu tia Bibila na Mbangi za Yehova, peleko tomo zaba Mbangi za Yehova.