WAISRAELI jingʉe dyi bbo. Bí ina Biblia adi ridho nari kʉ, ndrŭ ngʉ adi dyi tɨtɨ ndirigoti nja ndrŭ ngʉ adi ri ngongo. Bbʉbbʉ dhé, Biblia ró bbò sehemu kʉ dyi. Loroji na Zaburi ma, Wimbo wa Sulemani ma, Maombolezo ma na ndingʉeni le di ngongo d’e. Biblia le ngʉ ndi ná saa djo ká ndrŭ dhó maisha ngʉe ngbaribbai ma nari djo tilo ná ddikpa buku pori, Biblia dhori pʉlʉpʉlʉ nari kʉ Waisraeli ngʉ adi njínji dyi na ndima dhó maisha nǎ bí kʉ ná lo kana.

Dyi na ndrŭ ngʉ adi njínji krʉ ddo ró. Dyi chulu Waisraeli ngʉ adi ngbaribbai ma ndima ndima mbu nari dhǒ. (Isa. 30:29) Fete dhi saa na isɨ ndrŭ ngʉ adi idzi (ngoma) tɨ, ndrŭ ngʉ adi ngoni hwè na ndirigoti ndrŭ ngʉ adi beni be. Føri ndrŭ ngʉ adi nji ø pi le li ró inga ndima bbá bbasødda si lɨ djolu ró ndirigoti Mungu ndrŭ má ná fete dhi saa na maddi. (Amu. 11:34; 1 Sa. 18:6, 7, 1 Fal. 1:39, 40) Føri kina, Waisraeli ngʉ adi dyi ngo ddikpa le dhedhe ró, ndiri na ndima dhǒ ndima kʉ njedha na nari d’e. (2 Ny. 35:25) McClintock ndirigoti Strong dhó Cyclopedia pori, bbʉbbʉ dhé Waisraeli jingʉe dyi bbo.

Israeli nǎ pikpa jingʉe dyi ji. Israeli nǎ pikpa jingʉe dyi ndima rr nari ji. Pi Sauli nzingʉe Daudi ndi bba ndiro ke di dyi tɨ ndi dho d’e. (1 Sa. 16:18, 23) Daudi ngʉ Pi nari goti, ke thɨngʉe dyi ngodha dhi ritsi, ke ndingʉe bbo d’angʉeni ná dyi, ndirigoti ke kpengʉe ndrŭ nja ndima di dyi ngo Yova dhó hekalu nǎ d’e. (2 Ny. 7:6; Amo. 6:5) Pi Sulemani bbá ngʉe dyi ngʉ adi ngo ná kpetsi kpa ma, isɨ ndrŭ ma na.​—Muh. 2:8.

Waisraeli ngʉ adi Yova má dyi chulu. Bbo nǎ mana kʉ ná lo kʉ, Waisraeli ngʉ adi Yova má dyi chulu. Bbʉbbʉ dhé, Yerusalemu nǎ dyi ngʉ adi tɨ ná kpa ngʉe 4 000. (1 Ny. 23:5) Kpa ngʉ adi idzi ma, kidali ma, djøma ma na tɨ ndirigoti ngøga mi. (2 Ny. 5:12) Ro, ringa kʉ fø kpa dhé ngʉ adi Yova má dyi chulu ri. Bí kʉ ná Waisraeli ngʉ adi dyi ngo Yerusalemu na ndima ra fete dho ná saa na. Fø dyi kpa ngʉ adi nzi djidha dhi dyi. (Zb. 120-134) Ndirigoti Wayahudi bbá ndi ndini ná lo ridho nari bbai, Waisraeli ngʉ adi Hallel dhi Zaburi ngo a Pasaka dhi saa djo.

Njʉ maddi dyi nǎ mana e bbo Mungu dzá ndrŭ dho. (Yak. 5:13) Ko adi dyi ngo nja ko má na Yova d’e. (Efe. 5:19) Dyi adi ko tso gba ko lai Wakristo na. (Kol. 3:16) Ndirigoti ri adi ko li kpakpa nza ko di nzani ná saa djo. (Mdo. 16:25) Dyi kʉ kodhó jidha ma, kodhó udha ma na ko adi dhǒ Yova dho lu ná bblo pli kʉ ná chu.