Emirundi mingi omwami n’omukyala bafuna okusoomooza kungi ng’abaana bakuze ne bava awaka. Abaana bwe bava awaka, omwami n’omukyala batandika okuwulira nga tebalina kibagatta. Omuwi w’amagezi ku nsonga z’amaka ayitibwa M. Gary Neuman agamba nti: “Ntera okufuna abantu bangi ababa baagala okubawa amagezi ku ngeri gye basobola okuddamu okukwatagana ne bannaabwe mu bufumbo. Abaana bwe bamala okuva awaka, omwami n’omukyala baba na bitono nnyo bye basobola okunyumyako.” *

Naawe oli mu mbeera ng’eyo? Bwe kiba kityo, waliwo ky’oyinza okukolawo okugitereeza. Naye kati ka tusooke tulabe ebimu ku bintu ebiyinza okuba nga bye bivaako embeera eyo.

Okumala emyaka mingi, abaana be mubadde mukulembeza. Abazadde bangi bakulembeza ebyetaago by’abaana baabwe, so si obufumbo bwabwe. N’ekivaamu, buli omu yeemalira ku kutuukiriza buvunaanyizibwa bwe nga taata oba maama so si ng’omwami oba omukyala. Ekyo bakiraba luvannyuma ng’abaana bamaze kuva waka. Omukyala ow’emyaka 59 agamba nti: ‘Abaana bwe baali bakyabeera awaka, twakoleranga wamu ebintu. Naye bwe baamala okuva awaka, nze n’omwami wange buli omu yali yeekolera bibye.’

Abafumbo abamu tebaba beetegefu kukyuka na mbeera. Ekitabo ekiyitibwa Empty Nesting kigamba nti: “Abaana bwe bava awaka abafumbo bangi batera okuwulira ng’abayingidde obufumbo obupya.” Olw’okuba baba bawulira nga tebakyalina bibagatta, buli omu ku bo atandika kwekolera bibye.

Naye ekirungi kiri nti musobola okwewala embeera eyo era musobola okuba abasanyufu. Bayibuli erimu amagezi agasobola okubayamba. Lowooza ku magezi gano wammanga.

Mukkirize embeera empya. Ng’eyogera ku baana abakuze, Bayibuli egamba nti: ‘Omusajja anaalekanga kitaawe ne nnyina.’ (Olubereberye 2:24) Abazadde bwe mwali mukuza abaana bammwe, mwalina ekigendererwa eky’okubateekerateekera ekiseera ekyo we bandiviiridde awaka. Okulowooza ku ekyo, kisobola okubayamba okwenyumiririza mu ky’okuba nti ekiseera kyatuuka abaana bammwe ne bava awaka.​—Amagezi okuva mu Bayibuli: Makko 10:7.

Kyo kituufu nti bulijjo ojja kusigala ng’oli muzadde w’abaana bo. Naye kati mu kifo ky’okuba nti abaana bo bali wansi wa buyinza bwo, bajja kuba bakwebuuzaako bwebuuza. Enkyukakyuka eyo ekusobozesa okuba n’enkolagana ennungi n’abaana bo naye ng’okulembeza byetaago bya mukyala wo oba mwami wo. *​—Amagezi okuva mu Bayibuli: Matayo 19:6.

Mwogere ku ebyo ebibaluma. Yogerako ne munno omubuulire engeri enkyukakyuka empya gy’ekukutteko, era beera mwetegefu naye okumuwuliriza. Ba mugumiikiriza era fuba okutegeera munno. Kiyinza okubatwalira ekiseera okuzzaawo enkolagana ey’oku lusegere gye mwalina ng’omwami n’omukyala, naye bwe mukikola ebivaamu biba birungi.​—Amagezi okuva mu Bayibuli: 1 Abakkolinso 13:4.

Mulowooze ku bintu ebirala ebipya bye muyinza okukolera awamu. Mwogere ku biruubirirwa bye musobola okweteerawo mwembi oba ku bintu bye musobola okukolera awamu. Okuva bwe kiri nti mwamala okukuza abaana bammwe, mulina obumanyirivu mu bintu ebitali bimu. Musobola okukozesa obumanyirivu obwo okuyamba abalala?​—Amagezi okuva mu Bayibuli: Yobu 12:12.

Kakasa munno nti omwagala. Lowooza ku bintu ebyakuleetera okwagala munno. Mwembi mulowooze ku bintu bye muyiseemu nga muli wamu n’ebizibu bye musobodde okugumira. Bwe mukola mutyo, musobola okufuna essanyu wadde ng’abaana bammwe bavudde awaka. Bwe mukolera awamu, musobola okwongera okunyweza obufumbo bwammwe era ne muddamu okwagalana ennyo nga bwe mwali mu kusooka.