LITEYA 3
Nsango malamu euti mpenza epai ya Nzambe?
1. Biblia ezali mokanda ya nani?
Biblia ezali na nsango malamu oyo elobi ete bato bakozala na bomoi libela awa na mabele. (Nzembo 37:29) Buku yango ezali na mikanda mikemike 66. Nzambe asalelaki mibali ya sembo soki 40 mpo bákoma yango. Moize nde akomaki mikanda mitano ya liboso, esili koleka mbula soki 3 500. Ntoma Yoane nde akomaki mokanda ya nsuka, ekoki sikoyo mbula koleka 1 900. Bakomi ya Biblia bakomaki makanisi ya nani? Nzambe ayebisaki bango makambo na nzela ya elimo santu na ye. (2 Samwele 23:2) Bakomaki makanisi ya Nzambe, kasi ya bango moko te. Boye, Biblia ezali nde mokanda ya Yehova.—Tángá 2 Timote 3:16; 2 Petro 1:20, 21.
Talá video Biblia ezali mokanda ya nani?
2. Ndenge nini tokoki kondima ete Biblia elobaka solo?
Toyebi ete Biblia ezali mokanda ya Nzambe mpo elobelaka makambo oyo ekosalema mpenza mpe ndenge oyo yango ekosalema. Moto moko te akoki kosala yango. (Yosua 23:14) Kaka Nzambe Mozwi-ya-Nguya-Nyonso nde akoki koyeba mpenza makambo oyo ekoyela bato na mikolo ezali koya.—Tángá Yisaya 42:9; 46:10.
Tokolinga ete buku oyo euti epai ya Nzambe ekesena na babuku mosusu nyonso; mpe ezali bongo mpo na Biblia. Bamiliare ya Babiblia esili kokabolama na bankama ya minɔkɔ. Atako bato mosusu batalelaka Biblia lokola buku moko ya kala, makambo oyo yango elobi eyokani na siansi. Lisusu, makambo oyo bato yango 40 bakomaki na Biblia ezali na boyokani. * Longola yango, oyo Biblia elobi mpo na bolingo esengeli kaka kouta epai ya Nzambe ya solo, oyo azali Nzambe ya bolingo, mpe tii lelo buku yango ezali kaka na nguya ya kobongola bato. Makambo nyonso wana ezali kotinda bamilio ya bato bándima ete Biblia ezali Liloba ya Nzambe.—Tángá 1 Batesaloniki 2:13.
Talá video Nini ekoki kondimisa biso ete Biblia elobaka solo?
3. Biblia elobelaka makambo nini?
Biblia elobelaka mingi nsango malamu oyo emonisi mokano ya Nzambe mpo na bato. Makomami elimboli ndenge oyo bato babungisaki libaku malamu oyo bazalaki na yango ya kofanda na paradiso awa na mabele, mpe ndenge oyo nsukansuka paradiso ekozonga lisusu.—Tángá Emoniseli 21:4, 5.
Na kati ya Liloba ya Nzambe, tozali kokuta mpe mibeko, mitinda, mpe batoli. Lisusu, Biblia ezali na bandakisa oyo emonisi ndenge oyo Nzambe asalelaka bato makambo. Bandakisa yango esalisaka biso tóyeba soki azali Nzambe ya lolenge nini. Na yango, Biblia ekoki kosalisa yo oyeba Nzambe. Emonisi mpe nini okoki kosala mpo na kokóma moninga na ye.—Tángá Nzembo 19:7, 11; Yakobo 2:23; 4:8.
4. Ndenge nini okoki kokanga ntina ya makambo oyo ezali na Biblia?
Mwa buku oyo ekosalisa yo okanga ntina ya makambo oyo ezali na Biblia soki osaleli mayele oyo Yesu asalelaki. Yesu azalaki kotánga mokapo moko nsima ya mosusu mpe kolimbola “ntina ya Makomami.”—Tángá Luka 24:27, 45.
Ezali na likambo moko te oyo ezali kitoko koleka nsango malamu oyo euti epai ya Nzambe. Kasi, bato mosusu balingaka nsango yango te, bamosusu kutu bamonaka yango lokola motungisi. Kolɛmba nzoto te. Elikya na yo ya kozala na bomoi ya seko na mikolo ezali koya etaleli milende oyo ozali kosala mpo na koyeba Nzambe.—Tángá Yoane 17:3.
^ par. 3 Talá mwa buku Un livre pour tous.
