EZALI moko ya bikólo oyo eleki moke na mokili mobimba, ezwami na bangomba oyo ekaboli Suisse ná Autriche. Na boumeli ya basiɛklɛ Ba-Celte, Ba-Rhète, Baroma mpe Ba-Alaman bafandaki na etúká yango. Lelo oyo bato mingi ya Liechtenstein (2/3) bankɔkɔ na bango bazalaki Ba-Alaman oyo bafandaká kuna eleki sikoyo mbula soki 1 500.

Allemand nde ezali monɔkɔ ya Leta atako bato balobaka minɔkɔ ekeseni na kotalela mboka na mboka. Bilubu mibale oyo bato ya Liechtenstein balyaka mingi ezali Tüarka-Rebel oyo balambá yango na masango mpe Käsknöpfle, elubu ya makaroni oyo batyá fromaje.

Bapaya oyo basalaka mibembo na ekólo yango bazalaka na likoki ya komona bangomba oyo etondi na nɛjɛ, mabwaku oyo etondi na matiti, bilanga ya vinyo mpe banzete ya ndenge na ndenge. Na ndakisa, kaka na mwa ekólo yango okokuta lolenge 50 ya fololo babengi orchidée. Na Liechtenstein ezali na ba-musée, bisika ya masano mpe bisika oyo basalaka vinyo. Yango wana, ezala na bileko ya malili to ya molunge Baturiste bayaka kotala mboka yango.

 Batatoli ya Yehova basalaka mosala na bango na Liechtenstein kobanda bambula ya 1920. Lelo oyo, bazali soki 90 na ekólo yango mpe bayekolaka Biblia na bana-mboka to mpe bapaya oyo bayaka kotala mboka.