ELOBELI TITRE YA EZIPELI | OKOKI KOPUSANA PENEPENE NA NZAMBE
Omiyokaka ete ozali penepene na Nzambe?
“Kozala na boyokani malamu na Nzambe ekosala ete omiyoka ete obatelami, ozali na nyonso mpe na kimya. Okomiyoka mpe ete Nzambe azali ntango nyonso kosala makambo mpo na bolamu na yo.”—CHRISTOPHER, ELENGE MOBALI MOKO YA GHANA.
“Nzambe amonaka mikakatano na yo nyonso, alingaka yo mingi mpe atyelaka yo likebi koleka ndenge osɛngaka ye.”—HANNAH, ELENGE MWASI YA MBULA 13 NA ALASKA, ÉTATS-UNIS.
“Koyeba ete ozali na boyokani malamu na Nzambe ezali likambo oyo eleki malamu mpe ekitisaka mpenza motema!”—GINA, MWASI MOKO YA MBULA SOKI 45 NA JAMAÏQUE.
Ezali kaka Christopher, Hannah, mpe Gina te nde bamiyokaka bongo. Bato mingi na mokili mobimba bandimaka mpenza ete Nzambe azwaka bango lokola baninga na ye. Bongo yo? Omiyokaka ete ozali penepene na Nzambe? To okolinga kozala penepene na ye? Mbala mosusu omitunaka boye: ‘Ekoki mpenza kosalema ete moto azala mpenza moninga ya Nzambe Mozwi-ya-Nguya-Nyonso? Mpe soki ɛɛ, ndenge nini?’
MOTO AKOKI KOZALA PENEPENE NA NZAMBE
Biblia emonisi ete moto akoki kokóma moninga mpenza ya Nzambe; elobi ete Nzambe abengaki Abrahama ‘moninga na ye.’ (Yisaya 41:8) Yakobo 4:8 elobi boye: “Bópusana penepene na Nzambe, mpe ye akopusana penepene na bino.” Yango emonisi polele ete moto akoki kokóma mpenza moninga ya Nzambe. Kasi lokola Nzambe amonanaka te, ndenge nini tokoki ‘kopusana penepene’ na ye mpe kozala moninga na ye?
Mpo na kozwa eyano na motuna yango, tótalela makambo oyo esalaka ete boninga ya bato ekola. Ebandaka mingimingi ntango bato mibale bayebani bankombo. Na nsima, lokola basololaka mbala na mbala, bapesanaka makanisi, boninga na bango ekolaka. Mpe ntango bazali kosalelana makambo ya malamu, boninga na bango ekómaka makasi. Ezali mpe bongo mpo na kosala boninga na Nzambe. Tótala mpo na nini ezali bongo.
Talá mpe...
LINƆ́NGI YA MOSƐNZƐLI
Oyebi nkombo ya Nzambe mpe osalelaka yango?
Nzambe ye moko amimonisi epai na biso na maloba oyo: “Ngai Yehova. Yango nde nkombo na ngai.”
