Mokanda ya mibale ya Ntango 32:1-33
32 Nsima ya makambo wana mpe ya misala wana ya bosembo,+ Senakeribe mokonzi ya Asiri ayaki mpo na kobundisa Yuda. Azingaki bingumba oyo ebatelami makasi, mpe azalaki na mokano ya kobuka bifelo mpo na kozwa bingumba yango.+
2 Ntango Ezekiasi amonaki ete Senakeribe ayaki mpe azali na mokano ya kobundisa Yerusaleme,
3 azwaki ekateli, nsima ya koyokana na bankumu ya ekólo mpe bilombe na ye ya etumba, ete bákanga mai ya maziba oyo ezalaki libándá ya engumba,+ mpe bango bandimaki kosalisa ye.
4 Bato ebele bayanganaki, bakangaki maziba nyonso mpe nzela nyonso oyo mai ezalaki kotíyola na ekólo, balobi: “Ntango bakonzi ya Asiri bakoya awa, mpo na nini bákuta mai mingi?”
5 Lisusu, na mpiko nyonso, atongaki lisusu efelo mobimba oyo ebukanaki mpe atɛlɛmisaki manɔ́ngi likoló na yango; mpe libándá, asalaki efelo mosusu. Abongisaki mpe Mwa Ngomba*+ ya Sité ya Davidi mpe asalaki ebele ya bibundeli* mpe banguba.
6 Na nsima atyaki bakonzi ya basoda mpo bákamba bato mpe asangisaki bango na esika ya bato nyonso, na porte ya engumba, mpe alendisaki* bango na maloba oyo:
7 “Bózala na mpiko mpe na makasi. Bóbanga te mpe bózala na nsɔmɔ te mpo na mokonzi ya Asiri+ mpe bato nyonso oyo bazali na ye, mpo baoyo bazali na biso bazali mingi koleka baoyo bazali na ye.+
8 Lobɔkɔ ya moto* nde ezali elongo na ye; kasi biso tozali na Yehova Nzambe na biso, mpo na kosalisa biso mpe kobundela biso bitumba.”+ Maloba wana ya Ezekiasi mokonzi ya Yuda epesaki bato makasi.+
9 Nsima na yango, ntango Senakeribe mokonzi ya Asiri azalaki na Lakishi,+ na nguya nyonso ya bokonzi na ye,* atindaki basaleli na ye na Yerusaleme epai ya Ezekiasi mokonzi ya Yuda mpe epai ya bato nyonso ya Yudea oyo bazalaki na Yerusaleme,+ alobi:
10 “Talá oyo Senakeribe mokonzi ya Asiri alobi: ‘Bozali kotya motema na nini, mpo bótikala na kati ya Yerusaleme, nzokande ezingami?+
11 Bomoni te ete Ezekiasi azali kokosa bino mpo na kotika bino bókufa na nzala mpe na mposa ya mai, ntango alobi: “Yehova Nzambe na biso akobikisa biso na lobɔkɔ ya mokonzi ya Asiri”?+
12 Ezali ye Ezekiasi te moto alongolaki bisika oyo etombwaná+ mpe bitumbelo ya Nzambe* na bino+ mpe na nsima alobaki na Yuda mpe Yerusaleme: “Bokofukama liboso ya etumbelo kaka moko mpe bokobimisa milinga ya mbeka kaka likoló na yango”?+
13 Boyebi te makambo oyo ngai ná bankɔkɔ na ngai tosalaki bato nyonso ya bikólo ya mikili mosusu?+ Banzambe ya bikólo ya mikili yango balongaki kobikisa mikili na bango na lobɔkɔ na ngai?+
14 Na kati ya banzambe nyonso ya bikólo wana oyo bankɔkɔ na ngai babebisaki, nani akokaki kobikisa bato na ye na lobɔkɔ na ngai, mpo bókanisa ete Nzambe na bino akokoka kobikisa bino na lobɔkɔ na ngai?+
15 Sikoyo, Ezekiasi akosa bino te mpe abungisa bino nzela te!+ Bóndimela ye te, mpo nzambe moko te, ezala ya ekólo nini to bokonzi nini, akokaki kobikisa bato na ye na lobɔkɔ na ngai mpe na lobɔkɔ ya bankɔkɔ na ngai. Nzambe na bino mpe akobikisa bino te na lobɔkɔ na ngai!’”+
16 Basaleli ya Senakeribe balobaki lisusu mabe mingi mpo na Yehova Nzambe ya solo mpe mpo na mosaleli na ye Ezekiasi.
17 Senakeribe akomaki mpe mikanda+ mpo na kofinga Yehova Nzambe ya Yisraele+ mpe koloba mabe mpo na ye, alobi: “Ndenge moko na banzambe ya bikólo ya mikili mosusu oyo bakokaki te kobikisa bato na bango na lobɔkɔ na ngai,+ Nzambe ya Ezekiasi mpe akobikisa bato na ye na lobɔkɔ na ngai te.”
18 Bakobaki kobelela na mongongo makasi na monɔkɔ ya Bayuda, epai ya bato ya Yerusaleme oyo bazalaki likoló ya efelo, mpo na kobangisa bango mpe kopesa bango nsɔmɔ, mpo bázwa engumba.+
19 Balobaki mabe mpo na Nzambe ya Yerusaleme, kaka ndenge basalaki yango mpo na banzambe ya bato ya bikólo ya mabele, oyo basalemi na mabɔkɔ ya bato.
20 Kasi Mokonzi Ezekiasi ná mosakoli Yisaya+ mwana ya Amoze bazalaki se kobondela mpo na likambo yango mpe kobelela Nzambe ya likoló mpo na koluka lisalisi.+
21 Bongo Yehova atindaki anzelu moko mpe abomaki bilombe nyonso ya etumba,+ bakambi ná bakomanda ya kaa ya mokonzi ya Asiri. Bongo azongaki na mboka na ye, na nsɔni mpenza. Na nsima, akɔtaki na ndako* ya nzambe na ye mpe kuna, bana na ye mosusu babomaki ye na mopanga.+
22 Na yango, Yehova abikisaki Ezekiasi mpe bato oyo bafandi na Yerusaleme na lobɔkɔ ya Senakeribe mokonzi ya Asiri mpe na lobɔkɔ ya bato mosusu nyonso mpe apesaki bango bopemi bipai nyonso.
23 Mpe bato ebele bamemelaki Yehova makabo na Yerusaleme mpe bamemelaki Ezekiasi mokonzi ya Yuda biloko ya motuya.+ Mpe bikólo nyonso ekómaki kopesa mokonzi limemya mingi.
24 Na mikolo yango, Ezekiasi abɛlaki mpe etikalaki moke akufa. Bongo abondelaki Yehova,+ mpe Ye ayanolaki ye mpe alakisaki ye elembo moko.*+
25 Kasi Ezekiasi amonisaki botɔndi te mpo na bolamu oyo basalelaki ye, mpo motema na ye ekómaki na lolendo; yango wana Nzambe ayokelaki ye ná Yuda mpe Yerusaleme nkanda.
26 Nzokande Ezekiasi ayokaki mawa mpo atikaki motema na ye ekóma na lolendo mpe amikitisaki,+ ye ná bato ya Yerusaleme; mpe nkanda ya Yehova engalelaki bango te na mikolo ya Ezekiasi.+
27 Ezekiasi akómaki na bomɛngo mpe nkembo mingi;+ mpe atongaki bandako mpo na kobomba+ palata, wolo, mabanga ya ntalo, mafuta ya balsame, banguba mpe biloko nyonso ya motuya.
28 Atongaki mpe bisika ya kobomba mbuma ya kosala farini, vinyo ya sika ná mafuta, ezala mpe mapango ya bibwɛlɛ ya ndenge nyonso mpe mapango ya bampate.
29 Atongaki bingumba, mpe akómaki na bibwɛlɛ ebele, bitonga ya bampate mpe ya bangɔmbɛ, mpo Nzambe apesaki ye biloko ebele mpenza.
30 Ezekiasi nde akangaki liziba ya likoló ya mai+ ya Gihone+ mpe alekisaki yango mbala moko mpo ekita tii na wɛsti ya Sité ya Davidi.+ Mpe Ezekiasi azalaki kolonga na misala nyonso oyo azalaki kosala.
31 Nzokande ntango bankumu ya Babilone batindaki balobeli na bango epai ya Ezekiasi bátuna ye mpo na elembo*+ oyo esalemaki na mboka,+ Nzambe ya solo atikaki ye asala makambo ye moko mpo ameka ye,+ mpo na koyeba nyonso oyo ezalaki na motema na ye.+
32 Makambo mosusu ya lisolo ya Ezekiasi mpe misala na ye oyo emonisaki bolingo ya sembo,+ ekomami na emonaneli ya mosakoli Yisaya,+ mwana ya Amoze, na Buku ya Bakonzi ya Yuda mpe ya Yisraele.+
33 Na nsima Ezekiasi akufaki,* mpe bakundaki ye na esika oyo emati na malita ya bana ya Davidi;+ Yuda mobimba ná bato oyo bafandi na Yerusaleme bapesaki ye lokumu na liwa na ye. Mpe mwana na ye Manase akómaki mokonzi na esika na ye.
Maloba na nse
^ To, “Milo.” Liloba ya Ebre oyo elimboli “kotondisa.”
^ To, “bibundeli ya kobwakela.”
^ Lil., “alobaki na motema na.”
^ To, “Makasi ya bomoto.”
^ To, “nguya mpe lokumu nyonso ya basoda na ye.”
^ Lil., “bisika oyo etombwaná mpe bitumbelo na ye.”
^ To, “tempelo.”
^ To, “likamwisi ya komonisa makambo.”
^ To, “likamwisi ya komonisa makambo.”
^ To, “alalaki na liwa esika moko na bankɔkɔ na ye.”
