Kobima 15:1-27
15 Na ntango yango Moize ná Bayisraele bayembelaki Yehova loyembo oyo:+
“Tiká nayembela Yehova, mpo atombwami likoló mingi mpenza.+
Abwaki mpunda ná motambwisi na yango na mbu.+
2 Makasi na ngai mpe nguya na ngai ezali Yah,* mpo akómi lobiko na ngai.+
Oyo nde Nzambe na ngai, nakosanzola ye;+ Nzambe ya tata na ngai,+ mpe nakotombola ye likoló mpenza.+
3 Yehova azali mobundi monene ya nguya.+ Yehova ezali nkombo na ye.+
4 Abwaki makalo ya Farao mpe mampinga na ye na mbu,+Mpe babundi na ye oyo bayebi mpenza kobunda bazindisami na Mbu Motane.+
5 Mai ya kotomboka ezipaki bango; bazindaki na bisika ya mozindo lokola libanga.+
6 Lobɔkɔ na yo ya mobali, Ee Yehova, eleki na nguya;+Lobɔkɔ na yo ya mobali, Ee Yehova, ekoki kobukabuka monguna.
7 Na bonene ya lokumu na yo okoki kobwaka na nse baoyo bazali kotɛmɛla yo;+Ozali kotinda nkanda na yo oyo ezali kopela lokola mɔtɔ, ezali kozikisa bango lokola matiti ya blé.
8 Na mpema oyo euti na zolo na yo, mai esangisamaki;Ezalaki koningana te, etondanaki esika moko;Mai ya kotomboka ekanganaki na katikati ya mbu.
9 Monguna alobaki ete: ‘Na kolanda bango! Nakozwa bango!
Nakokabola biloko oyo ekopunzama tii nakotonda!
Nakobenda mopanga na ngai! Lobɔkɔ na ngai ekokitisa bango!’+
10 Ofulaki na mpema na yo, mbu ezipaki bango;+Bazindaki lokola mondɔlu na kati ya mai ya monene.
11 Nani kati na banzambe azali lokola yo, Ee Yehova?+
Nani azali lokola yo, yo oyo omimonisaka ete oleki mpenza mosantu?+
Ye oyo basengeli kobanga na nzembo ya lisanzoli, Ye oyo asalaka makambo ya kokamwa.+
12 Osembolaki lobɔkɔ na yo ya mobali, mpe mabele emɛlaki bango.+
13 Na bolingo ya sembo na yo okambaki bato oyo obikisaki;+Na nguya na yo okotambwisa bango tii na esika na yo mosantu ya kofanda.
14 Bato ya bikólo bakoyoka yango+ mpe bakolɛnga;Mpasi makasi* ekokanga bato oyo bafandi na Filistia.
15 Na ntango yango bankumu* ya Edome bakolɛnga na nsɔmɔ,Mpe kolɛnga ekokanga bakonzi makasi ya Moabe.+
Bato nyonso oyo bafandi na Kanana bakolɛmba nzoto.+
16 Kobanga mpe nsɔmɔ ekokwela bango.+
Mpo na nguya ya lobɔkɔ na yo bakoningana te lokola libanga,Tii bato na yo bakoleka, Ee Yehova,Tii bato oyo obimisi+ bakoleka.+
17 Okomema bango mpe okolona bango na ngomba ya libula na yo,+Esika oyo obongisi mpo yo moko ofanda libela, Ee Yehova,Esika mosantu, Ee Yehova, oyo mabɔkɔ na yo ebongisi.
18 Yehova akoyangela mpo na libela na libela.+
19 Ntango bampunda ya Farao ná makalo na ye ya bitumba mpe basoda na ye oyo batambolaka na mpunda bakɔtaki na mbu,+Bongo Yehova azongisaki mbu mpe azindisaki bango,+Kasi bato ya Yisraele batambolaki na mabele oyo ekauki na kati ya mbu.”+
20 Na yango, Miriame mosakoli-mwasi, ndeko ya Arona, azwaki mbonda ya moke na lobɔkɔ na ye, mpe basi nyonso balandaki ye na bambonda ya mike mpe na mabina.
21 Mpo na koyanola mibali, Miriame ayembaki boye:
“Bóyembela Yehova, mpo atombwami likoló mingi mpenza.+
Abwaki mpunda mpe motambwisi na yango na mbu.”+
22 Na nsima Moize alongolaki Yisraele na Mbu Motane mpe amemaki bango na esobe ya Shure mpe batambolaki mikolo misato na esobe, kasi bazwaki mai te.
23 Bakómaki na Mara,*+ kasi bakokaki komɛla mai ya Mara te mpo yango ezalaki bololo. Yango wana apesaki esika yango nkombo Mara.
24 Na yango bato babandaki koimaima mpo na Moize+ na maloba oyo: “Tokomɛla nini?”
25 Abelelaki Yehova,+ mpe Yehova alakisaki ye nzete moko. Ntango abwakaki yango na mai, mai ekómaki malamu.
Kuna Nzambe atyelaki bango mobeko ya kolanda mpe ndenge ya kosambisa mpe kuna atyaki bango na komekama.+
26 Alobaki ete: “Soki okoyoka mpenza mongongo ya Yehova Nzambe na yo mpe okosala oyo ezali sembo na miso na ye mpe okotya mpenza likebi na mibeko na ye mpe okobatela malako na ye nyonso,+ nakotindela yo ata maladi moko te oyo natindelaki Baezipito,+ mpo ngai Yehova moto nazali kobikisa yo.”+
27 Nsima na yango, bakómaki na Elime, esika ezalaki na maziba ya mai 12 mpe nzete ya mbila 70. Bongo batyaki kaa na esika wana pene na mai.
Maloba na nse
^ “Yah” ezali ebengeli ya mokuse ya nkombo Yehova.
^ Lil., “Mpasi lokola ya kobota.”
^ To, “basheiki.” Sheiki azalaki mokonzi ya libota.
^ Elimboli, “bololo.”
