Kobima 20:1-26
20 Bongo Nzambe alobaki maloba oyo nyonso ete:+
2 “Ngai nazali Yehova Nzambe na yo, oyo abimisaki yo na mokili ya Ezipito, esika oyo ozalaki moombo.*+
3 Osengeli kozala na banzambe mosusu te, longola kaka ngai.*+
4 “Osengeli te komisalela ekeko to elilingi oyo ekokani na eloko nyonso oyo ezali kuna na likoló to oyo ezali awa na mabele to oyo ezali na mai na nse ya mabele.+
5 Osengeli te kogumbamela yango to kobendama mpo na kosalela yango,+ mpo ngai Yehova Nzambe na yo, nazali Nzambe oyo asɛngaka kokangama kaka na ye.+ Mpo na libunga ya batata, napesaka etumbu na bana, na libota ya misato mpe na libota ya minei ya baoyo bayinaka ngai,
6 kasi namonisaka bolingo ya sembo tii na libota ya nkóto ya baoyo balingaka ngai mpe babatelaka mibeko na ngai.+
7 “Osengeli te kozwa nkombo ya Yehova Nzambe na yo na lisɛki,+ mpo Yehova akotika te moto oyo azali kozwa nkombo na ye na lisɛki azanga kozwa etumbu.+
8 “Kanisáká mokolo ya sabata mpo na kosantisa yango.+
9 Mikolo motoba, osengeli kosala mosala mpe okosala misala na yo nyonso,+
10 kasi mokolo ya nsambo ezali sabata mpo na Yehova Nzambe na yo. Osengeli kosala ata mosala moko te, ezala yo, ezala mwana na yo ya mobali to ya mwasi, ezala moombo na yo ya mobali to ya mwasi, ezala nyama na yo ya mboka, ezala mopaya oyo azali na kati ya bisika na yo ya kofanda.*+
11 Mpo na mikolo motoba Yehova asalaki likoló ná mabele, mbu mpe nyonso oyo ezali na kati na yango, mpe abandaki kopema na mokolo ya nsambo.+ Yango wana Yehova apambolaki mokolo ya sabata mpe asantisaki yango.
12 “Kumisá tata na yo mpe mama na yo+ mpo bomoi na yo ezala molai na mokili oyo Yehova Nzambe na yo azali kopesa yo.+
13 “Osengeli koboma moto te.+
14 “Osengeli kosala ekobo te.+
15 “Osengeli koyiba te.+
16 “Osengeli kopesa litatoli ya lokuta te mpo na moto mosusu.+
17 “Osengeli te kolula ndako ya moto mosusu. Osengeli te kolula mwasi ya moto mosusu,+ ezala moombo na ye ya mobali to ya mwasi, ngɔmbɛ na ye ya mobali, mpunda na ye to eloko nyonso oyo ezali ya moto mosusu.”+
18 Sikoyo bato nyonso bamonaki bango moko bankake ná kongɛnga ya mikalikali, bayokaki lokito ya liseke, mpe ndenge ngomba ebimisaki milinga; mpe komona makambo yango, elɛngisaki bango makasi mpe batɛlɛmaki mosika.+
19 Na yango, balobaki na Moize ete: “Yo lobá na biso, mpe tokoyoka, kasi Nzambe aloba na biso te, mpo tozali kobanga noki tókufa.”+
20 Bongo Moize alobaki na bato ete: “Bóbanga te, mpo Nzambe ya solo ayei kotya bino na komekama,+ mpo bókoba kobanga ye mpe bósala lisumu te.”+
21 Na yango, bato batɛlɛmaki kaka mosika, kasi Moize akendaki pene na lipata ya moindo epai Nzambe ya solo azalaki.+
22 Bongo Yehova alobaki na Moize ete: “Okoloba na Bayisraele ete: ‘Bino moko bomoni ete nalobi na bino uta na likoló.+
23 Bosengeli te kosala banzambe ya palata mpo na kosambela yango esika moko na ngai, mpe bosengeli te komisalela banzambe ya wolo.+
24 Okosalela ngai etumbelo ya mabele, mpe okopesa makabo ya kotumba mpe bambeka ya kimya,* bampate na yo mpe bangɔmbɛ na yo likoló na yango. Esika nyonso oyo nasali ete nkombo na ngai ekanisama,+ nakoya epai na yo mpe nakopambola yo mpenza.
25 Soki osaleli ngai etumbelo ya mabanga, osengeli te kotonga yango na mabanga oyo ekatami na bisaleli.+ Soki osaleli mbeli ya mabanga likoló na yango, okokómisa yango eloko mpamba.
26 Mpe osengeli te komata na etumbelo na ngai na baeskalye, noki bolumbu na yo emonana polele likoló na yango.’
Maloba na nse
^ Lil., “na ndako ya boombo.”
^ To, “mpo na kotɛmɛla ngai.” Lil., “liboso ya elongi na ngai.”
^ Lil., “na baporte na yo.”
^ Talá Ndimbola ya maloba.
