Kobima 25:1-40
25 Na nsima, Yehova alobaki na Moize ete:
2 “Yebisá bato ya Yisraele ete bázwela ngai likabo; bokozwela ngai likabo epai ya moto nyonso oyo motema na ye etindi ye.+
3 Bokozwa likabo oyo epai na bango: wolo,+ palata,+ kwivre,+
4 nsinga ya bulé, lɛnɛ oyo epakolami langi ya mwa motane-bulé, biloko oyo epakolami langi ya motane makasi, lini ya kitoko, nsuki ya ntaba,
5 mposo ya mpate-mobali oyo epakolami langi ya motane, mposo ya nyama ebengami fɔkɛ, nzete ya akasia,+
6 mafuta mpo na miinda,+ balsame mpo na mafuta mosantu+ mpe mpo na mpaka ya malasi ya nsolo kitoko,+
7 mpe mabanga ya onikisi ná mabanga mosusu ya kotya na efode+ mpe na libenga ya ntolo.+
8 Bakosalela ngai esika mosantu, mpe nakofanda* katikati na bango.+
9 Bokosala tabernakle mpe biloko na yango nyonso na kolanda kaka modɛlɛ oyo nazali kolakisa bino.+
10 “Bakosala Sanduku na nzete ya akasia, ekozala mapeko* mibale na ndambo na molai, lipeko moko na ndambo na monene mpe bosanda na yango lipeko moko na ndambo.+
11 Na nsima okozipa yango na wolo ya pɛto.+ Okozipa yango na kati mpe na libándá, mpe okosala ndelo* ya wolo zingazinga na yango nyonso.+
12 Mpe okonyangwisa wolo mpo na kosalela Sanduku yango mpɛtɛ minei mpe okotya yango na likoló ya makolo na yango minei, mpɛtɛ mibale na ngámbo moko mpe mpɛtɛ mibale na ngámbo mosusu.
13 Mpe okosala banzete ya komema Sanduku na nzete ya akasia mpe okozipa yango na wolo.+
14 Okokɔtisa banzete yango na mpɛtɛ oyo ezali na mipanzi ya Sanduku mpo na komemaka na yango Sanduku.
15 Banzete yango ya komema ekotikala na kati ya mpɛtɛ ya Sanduku; ekolongolama na yango te.+
16 Okotya na kati ya Sanduku Litatoli oyo nakopesa yo.+
17 “Okosala ezipeli na wolo ya pɛto, ekozala mapeko mibale na ndambo na molai mpe monene na yango lipeko moko na ndambo.+
18 Okosala bakeruba mibale ya wolo; okosala yango eloko oyo ebɛtami na marto na nsuka mibale ya ezipeli.+
19 Salá bakeruba na bansuka nyonso mibale, keruba mokomoko na nsuka ya ezipeli.
20 Bakeruba yango ekosembola mapapu mibale na yango likoló, mapapu na yango ekozipa ezipeli,+ mpe bakeruba yango ekotalana. Bilongi ya bakeruba ekotala ezipeli.
21 Okotya ezipeli+ likoló ya Sanduku, mpe na kati ya Sanduku okotya Litatoli oyo nakopesa yo.
22 Kuna nakomilakisa epai na yo mpe nakosolola na yo uta na likoló ya ezipeli.+ Uta na kati ya bakeruba mibale oyo bazali likoló ya sanduku ya Litatoli, nakoyebisa yo makambo nyonso oyo nakopesa yo etinda mpo na Bayisraele.
23 “Okosala mpe mesa+ na nzete ya akasia, ekozala mapeko mibale na molai, lipeko moko na monene mpe bosanda na yango lipeko moko na ndambo.+
24 Okozipa yango na wolo ya pɛto mpe okosala ndelo ya wolo zingazinga na yango.
25 Okosalela yango kadre, oyo ezali na monene ya tandu moko* zingazinga na yango mpe okosala ndelo* ya wolo mpo na kadre na yango.
26 Okosalela yango mpɛtɛ minei ya wolo mpe okotya mpɛtɛ yango na nsuka minei esika makolo minei ezali.
27 Bampɛtɛ ekozala pene na kadre ya etumbelo mpo ezala bisimbeli ya banzete ya komema na yango mesa.
28 Okosala banzete ya komema na nzete ya akasia mpe okozipa yango na wolo mpe bakomema na yango mesa.
29 “Okosala mpe basaani na yango, bakɔpɔ na yango mpe bilokó na yango mpe mabakuli na yango oyo bakosalela mpo na kosopa makabo ya masanga. Okosala yango na wolo ya pɛto.+
30 Mpe okotya mampa ya kolakisa likoló ya mesa yango liboso na ngai ntango nyonso.+
31 “Okosala etɛlɛmiselo ya miinda+ na wolo ya pɛto. Etɛlɛmiselo ya miinda yango ekozala eloko oyo ebɛtami na marto. Eteni na yango ya nse, nzete na yango, bitape na yango, bakɔpɔ na yango, bambuma na yango mpe bafololo na yango ekozala eteni kaka moko.+
32 Mpe bitape motoba ekouta na mipanzi na yango: bitape misato ya etɛlɛmiselo ya miinda na mopanzi na yango moko mpe bitape misato ya etɛlɛmiselo ya miinda na mopanzi na yango mosusu.
33 Kɔpɔ misato oyo esalemi lokola bafololo ya nzete ya amande ekozala na mokomoko ya bitape ya mopanzi moko, ná mbuma mpe bafololo oyo elandani, awa mbuma awa fololo, mpe bakɔpɔ misato oyo esalemi lokola bafololo ya nzete ya amande ekozala likoló ya mokomoko ya bitape ya mopanzi oyo mosusu, ná mbuma mpe bafololo oyo elandani, awa mbuma awa fololo. Ndenge wana nde bitape motoba oyo ekouta na nzete ya etɛlɛmiselo ya miinda ekozala.
34 Likoló ya nzete ya etɛlɛmiselo ya miinda ezali na bakɔpɔ minei oyo esalemi lokola bafololo ya nzete ya amande, ná mbuma na yango mpe bafololo na yango oyo elandani, awa mbuma awa fololo.
35 Mbuma ekozala na nse ya bitape mibale ya ebandeli oyo ekouta na nzete mpe mbuma na nse ya bitape mibale oyo elandi mpe mbuma na nse ya bitape mosusu mibale oyo ya nsuka, mpo na bitape motoba oyo ezali kouta na nzete.
36 Bambuma, bitape mpe etɛlɛmiselo ya miinda mobimba ekozala eteni kaka moko ya wolo ya pɛto, oyo ebɛtami na marto.+
37 Okosalela yango miinda nsambo, mpe ntango bakopelisa miinda yango, ekongɛngisa esika oyo ezali liboso na yango.+
38 Bapɛnsi na yango ya mike mpe biloko na yango ya kotya mɔtɔ ekozala ya wolo ya pɛto.+
39 Yango ná bisaleli na yango ekosalema na talanta* moko ya wolo ya pɛto.
40 Kebá ete osala yango na kolanda modɛlɛ oyo bamonisaki yo na ngomba.+
