Yisaya 44:1-28
44 “Sikoyo, yoká, Ee Yakobo mosaleli na ngai,Mpe yo, Yisraele, oyo naponi.+
2 Yehova, Mokeli na yo,Moto oyo asalaki yo,+Oyo asalisaki yo banda na libumu,* alobi boye:
‘Kobanga te, mosaleli na ngai Yakobo,+Mpe yo, Yeshurune,*+ oyo naponi.
3 Mpo moto oyo azali na mposa ya mai nakosopela ye mai*+Mpe mabele oyo ekauká nakosopela yango mikɛli ya mai oyo ezali kotíyola.
Nakosopela libota* na yo elimo na ngai+Mpe bana na yo lipamboli na ngai.
4 Mpe bakobima lokola matiti ya mobesu,+Lokola nzete ya arava pene na mikɛli ya mai.
5 Moto moko akoloba: “Nazali moto ya Yehova.”+
Moto mosusu akomibenga na nkombo ya Yakobo,Mosusu mpe akokoma na lobɔkɔ na ye: “Moto ya Yehova.”
Mpe akozwa nkombo ya Yisraele.’
6 Talá oyo Yehova,Mokonzi ya Yisraele+ mpe Mosikoli+ na ye, Yehova ya mampinga alobi:
‘Ngai nazali moto ya liboso mpe moto ya nsuka,+
Mpe longola ngai Nzambe mosusu azali te.+
7 Nani azali lokola ngai?+
Abelela, ayebisa yango mpe alakisa ngai yango!+
Banda ntango oyo natyaki bato ya kala,Ezali na moto moko oyo akoki koyebisa makambo oyo ezali koyaMpe makambo oyo ekosalema?
8 Bózala na nsɔmɔ te,Mpe kobanga ekanga bino te.+
Nayebisaki mokomoko na bino yango liboso te? Mpe namonisaki yango te?
Bino bozali batatoli na ngai.+
Longola ngai, ezali nde na Nzambe mosusu?
Te, Libanga mosusu ezali te.+ Nayebi ata moko te.’”
9 Bato nyonso oyo basalaka bikeko* bazali eloko mpamba,Mpe biloko oyo balingaka ekozala na litomba moko te.+
Yango* ezali batatoli oyo emonaka te mpe eyebaka eloko te,+Mpe baoyo basalaka yango bakoyokisama nsɔni.+
10 Nani akokaki kozala na likanisi ya kosala nzambe moko boye to ekeko moko ya ebende*Oyo ekozala na litomba te?+
11 Talá! Baninga na ye nyonso bakoyokisama nsɔni!+
Bato oyo bayebi misala ya mabɔkɔ bazali kaka bato.
Bango nyonso báyangana mpe bázwa esika na bango.
Bakozala na nsɔmɔ mpe bakoyokisama nsɔni elongo.
12 Moyemi ya biloko ya bibende oyo asalelaka likwangola ya mokuse asali mosala na ye na makala.
Ayemi yango na marto,Azali kosala yango na lobɔkɔ na ye ya makasi.+
Na nsima, ayoki nzala, mpe makasi na ye esili;Amɛli mai te mpe alɛmbi.
13 Moyemi ya biloko ya nzete asemboli nsinga ya komeka, azali kokoma yango na mpɛmbɛ ya motane.
Azali kosala yango na epalola-nzete mpe kokoma yango na kompa.
Akómisaka yango elilingi ya moto,+Na kitoko ya moto,Mpo efanda na ndako.*+
14 Ezali na moto moko oyo mosala na ye nde kokata banzete ya sɛdrɛ.
Aponaka motindo moko boye ya nzete, nzete ya monene,Atikaka yango ekóma makasi na kati ya banzete ya zamba.+
Alonaka nzete ya lorye, mpe mbula ekolisaka yango.
15 Na nsima moto asalelaka yango lokola nkoni mpo na mɔtɔ.
Azwaka eteni na yango mpo ayɔta mɔtɔ;Apelisaka mɔtɔ mpe atumbaka limpa.
Lisusu asalaka nzambe mpe asambelaka yango.
Akómisi yango ekeko* mpe agumbamaka na nse liboso na yango.+
16 Na eteni moko ya nkoni, apelisaka mɔtɔ;Kaka na eteni yango atumbaka mosuni oyo akolya, mpe atondi.
Azali mpe koyɔta mɔtɔ mpe koloba:
“Aha! Nayɔki mɔtɔ ndenge nazali kotala mɔtɔ oyo.”
17 Kasi na eteni oyo etikali, asalaka nzambe moko, ekeko.
Agumbamelaka yango mpe asambelaka yango.
Abondelaka yango mpe alobaka ete:
“Bikisá ngai, mpo ozali nzambe na ngai.”+
18 Bayebi eloko te, mpe bakangaka ntina ya eloko te,+Mpo miso na bango ekangami mpenza mpe bakoki komona te,Mpe motema na bango ezali na bososoli te.
19 Moto moko te akanisaka na motema na yeMoko te azali na boyebi to na mayele ya koloba ete:
“Napelisi ndambo na mɔtɔ,Mpe na makala na yango natumbi limpa ná mosuni mpo na kolya.
Kasi na ndambo oyo etikali, nasengeli nde kosala na yango eloko oyo eyinamá?+
Nasengeli nde kosambela nkoni ya nzete?”*
20 Azali kolya putulu ya mɔtɔ.
Motema na ye moko oyo ekosami ebungisi ye nzela.
Akoki te komibikisa mpe koloba ete:
“Lokuta ezali te na lobɔkɔ na ngai ya mobali?”
21 “Kanisá makambo wana, Ee Yakobo, mpe yo, Ee Yisraele,Mpo ozali mosaleli na ngai.
Nasalá yo. Mpe ozali mosaleli na ngai.+
Ee Yisraele, nakobosana yo te.+
22 Nakozipa misala na yo ya kobuka mibeko lokola nde ezipami na lipata+Mpe masumu na yo lokola nde na lipata moko monene.
Zongelá ngai, mpo nakosikola yo.+
23 Yo likoló, gangá na esengo,Mpo Yehova asali mosala!
Bóganga na koganga ya bolongi, bino bisika ya mozindo ya mabele!
Bóganga na esengo bino bangomba,+Yo zamba mpe banzete na yo nyonso!
Mpo Yehova asikoli Yakobo,Mpe azali komonisa kitoko na ye na Yisraele.”+
24 Talá oyo Yehova alobi, Mosikoli+ na yo,Moto oyo asalaki yo banda na libumu:
“Ngai Yehova moto nasalaki eloko nyonso.
Ngai moko natandaki likoló,+Mpe natandaki mabele.+
Nani azalaki elongo na ngai?
25 Nazali kobebisa bilembo ya basakoli ya lokuta,*Mpe nazali Moto oyo akómisaka basakoli ya makambo oyo ebombani lokola bato ya ligboma;+Moto oyo abulunganisaka bato ya bwanyaMpe akómisaka boyebi na bango bozoba;+
26 Moto oyo akokisaka liloba ya mosaleli na yeMoto oyo akokisaka na mobimba bisakweli ya bamemi-nsango na ye;+Moto oyo azali koloba na Yerusaleme ete: ‘Bato bakofanda kuna,’+
Mpe na bingumba ya Yuda ete: ‘Ekotongama lisusu,+Mpe nakotɛlɛmisa bisika na yango oyo etikalá mpamba’;+
27 Moto oyo azali koloba na mai mozindo ete: ‘Kauká;Mpe nakokaukisa bibale na yo nyonso’;+
28 Moto oyo azali koloba na Siruse+ ete: ‘Azali mobateli ya mpate na ngai,Mpe akokokisa mpenza mokano na ngai nyonso’;+Moto oyo azali koloba na Yerusaleme, ete: ‘Ekotongama lisusu,’
Mpe na Tempelo ete: ‘Moboko na yo ekotyama.’”+
Maloba na nse
^ To, “banda kobotama na yo.”
^ Elimboli, “moto ya sembo, ebengeli ya lokumu mpo na Yisraele.”
^ To, “mabele oyo ezali na mposa ya mai.”
^ Lil., “momboto.”
^ To, “oyo eyemami.”
^ Elingi koloba, “bikeko.”
^ To, “ekeko oyo enyangwisami.”
^ To, “etumbelo.”
^ To, “ekeko oyo eyemami.”
^ To, “eteni ya nzete ya kokauka.”
^ To, “bato ya bilobaloba.”
