“Lokola maladi mabe ya coronavirus ezali lisusu te likama mpo na bokɔlɔngɔnɔ ya nzoto na mokili mobimba, tosengeli kokanisa te ete ezali lisusu likama te. Tóyeba ete maladi mosusu ya mabe ya ndenge wana ekobima na mikolo ezali koya mpe tosengeli komibongisa mpo na yango.”​—Dr. Tedros Adhanom Ghebreyesus, oyo akambaka ebongiseli ya ONU oyo etalaka bokɔlɔngɔnɔ ya nzoto, na mokolo ya 22/05/2023.

 Bato mingi lelo oyo bazali kokoba konyokwama na nzoto mpe na makanisi mpo na maladi mabe ya coronavirus. Baguvɛrnema mpe bibongiseli oyo etalelaka bokɔlɔngɔnɔ ya nzoto ekomibongisa mpenza mpo na maladi mosusu? Baguvɛrnema mpe bibongiseli yango ekoki mpenza kosilisa bamaladi oyo tobɛlaka?

 Biblia elobeli guvɛrnema moko oyo ekosilisa mikakatano nyonso oyo etali kolɔngɔnɔ ya nzoto. Elobi ete: “Nzambe ya likoló akotya bokonzi moko” to mpe guvɛrnema. (Danyele 2:44) Na nse ya guvɛrnema yango, “moto moko te oyo afandi kuna akoloba: “Nazali kobɛla.” (Yisaya 33:24) Moto nyonso akozala na nzoto kolɔngɔnɔ mpe na makasi ya bolenge.​—Yobo 33:25.