Na bisika mingi na mokili, bato bazali konyokwama mpo na bampela oyo ezali kobebisa mabele. Na ndakisa, talá balapolo oyo elandi:

•   “Mikolo oyo euti koleka, kobanda mokolo ya samedi tii mercredi, na engumba mokonzi ya ekólo Chine, bambula ya makasi ebimisaki mpela ya nsɔmɔ mpe nivo ya mai emataki tii na . . . 744.8 milimètres. Yango ezalaki bambula ya makasi oyo etikalá kobeta te na bambula soki 140 oyo eleki.”​—AP News, 02/08/2023.

•   “Mopɛpɛ makasi oyo babengi Typhon Khanun enɔkisaki bambula ya mopɛpɛ makasi na sud ya Japon na mokolo mobimba ya mercredi ná jeudi, mpe ebomaki bato mibale. . . . Emonani ete mopɛpɛ yango ekonɔkisa bambula ya makasi mpenza na Taïwan, engumba oyo ezali na ngomba.”​—Deutsche Welle, 03/08/2023.

•   “Mpela oyo esalemaki na wikende [na Nouvelle-Écosse] eutaki na bambula makasi oyo ebetaki na etúká ya Canada atlantique, ezalaki bambula eleki makasi oyo etikalá kobeta te na bambula 50 oyo eleki.”​—BBC News, 24/07/2023.

 Biblia elobi nini mpo na makambo ya ndenge oyo?

 Biblia emonisi ete tozali kobika na ntango oyo ebengami “mikolo ya nsuka.” (2 Timote 3:1) Yesu asakolaki ete na ntango na biso, tokomona “makambo ya nsɔmɔ,” to ya kobangisa. (Luka 21:11) Kobongwana ya klima mpe esali ete bambula mpe mipɛpɛ ya makasi ekóma kosalema mingi mpe ya makasi koleka.

 Biblia eyebisi biso ete makambo mingi ya nsɔmɔ oyo ezali kosalema lelo na mokili esengeli kaka kobangisa biso te, kasi mpe kopesa biso elikya. Mpo na nini? Yesu alobaki: “Ntango bokomona makambo yango ezali kosalema, bóyeba ete bokonzi ya Nzambe ekómi pene.”​—Luka 21:31; Matai 24:3.

 Makambo oyo ezali koleka na mokili emonisi ete mosika te Bokonzi ya Nzambe ekozala na bokonzi likoló ya biloko oyo Nzambe asalá, na ndakisa mai.​—Yobo 36:27, 28; Nzembo 107:29.

 Mpo na koyeba makambo mosusu mpo na ndenge oyo Bokonzi ya Nzambe ekobongisa mabele, talá lisolo “Qui sauvera la terre?”