Ɛɛ. Batatoli ya Yehova bandimaka ete Biblia mobimba “ekomami na litambwisi ya elimo ya Nzambe mpe ezali na litomba.” (2 Timote 3:16) Yango esangisi Kondimana ya Kala (Ancien Testament) mpe Kondimana ya Sika (Nouveau Testament). Kasi, mbala mingi Batatoli ya Yehova babengaka yango Makomami ya Ebre mpe Makomami ya Grɛki ya bokristo. Na ndenge yango, toboyaka kopesa bato likanisi ete biteni mosusu ya Biblia esilá ngala to ezali na ntina lisusu te.

 Na lisalisi ya elimo ya Nzambe, ntoma Paulo, oyo azalaki mokristo akomaki ete: “Makambo nyonso oyo ekomamaki kala ekomamaki mpo eteya biso.” (Baroma 15:4) Na yango, Makomami ya Ebre ezali mpe na makambo ya ntina mingi mpo na biso. Na ndakisa, elobeli masolo ya kala mpe epesi batoli oyo ekoki kosalisa biso.

•   Masolo ya kala. Makomami ya Ebre elobeli kokelama ya mokili mpe ndenge moto akweaki na lisumu. Soki tóyebaka makambo wana te, tolingaki te kozwa biyano ya malamu na mituna lokola: Toutá wapi? Mpo na nini bato bakufaka? (Ebandeli 2:7, 17) Longola yango, Makomami ya Ebre elobeli ndenge Yehova Nzambe asalelaki bato oyo bakutanaki na makambo ya esengo mpe makambo ya mpasi, ndenge biso tokutanaka na yango.​—Yakobo 5:17.

•   Batoli. Mokanda ya Masese mpe ya Mosakoli, oyo ezali na kati ya Makomami ya Ebre, ezali na batoli oyo esilaka ngala te. Epesi batoli mpo na ndenge ya kozala na libota ya esengo (Masese 15:17), ndenge malamu ya kotalela mosala (Masese 10:4; Mosakoli 4:6), mpe ndenge bilenge bakoki kosalela malamu bolenge na bango. (Mosakoli 11:9–12:1).

 Longola yango, tokoki kozwa mateya mingi soki toyekoli Mibeko ya Moize ndenge ekomamá na Torah (mikanda mitano ya liboso ya Biblia). Atako bakristo basengeli kotosa Mibeko ya Moize te, ezali na mateya ya malamu oyo ekoki kosalisa biso tózala na bomoi ya esengo.​—Balevi 19:18; Kolimbola Mibeko 6:5-7.