ບົດທີ 53

ເລືອກຄວາມບັນເທີງໃນແບບທີ່ເຮັດໃຫ້ພະເຢໂຫວາພໍໃຈ

ເປີດ

ພະເຢໂຫວາເປັນ “ພະເຈົ້າຜູ້ມີຄວາມສຸກ.” (1 ຕີໂມທຽວ 1:11) ແລະເພິ່ນຢາກໃຫ້ເຮົາມີຊີວິດທີ່ມີຄວາມສຸກນຳ. ເພິ່ນຈະຮູ້ສຶກດີໃຈຖ້າເຫັນເຮົາພັກຈາກການເຮັດວຽກແດ່ແລະມີເວລາຜ່ອນຄາຍ. ໃນບົດນີ້ເຮົາຈະມາເບິ່ງວ່າ ເຮົາຈະໃຊ້ເວລາພັກຜ່ອນຂອງເຮົາແນວໃດເພື່ອຈະເຮັດໃຫ້ເຮົາເອງມີຄວາມສຸກແລະເປັນແບບທີ່ພະເຢໂຫວາພໍໃຈນຳ.

1. ຕອນທີ່ເຮົາເລືອກຄວາມບັນເທີງ ເຮົາຄວນແນ່ໃຈເລື່ອງຫຍັງ?

ຕອນທີ່ເຈົ້າພັກຜ່ອນ ເຈົ້າມັກເຮັດຫຍັງແດ່? ບາງຄົນມັກຢູ່ເຮືອນ ອ່ານໜັງສື ເບິ່ງໜັງ ຟັງເພງ ຫຼືຫຼິ້ນອິນເຕີເນັດ. ສ່ວນບາງຄົນກໍມັກໄປກັບໝູ່ຄູ່ ເຊັ່ນ ໄປທ່ຽວ ໄປລອຍນ້ຳ ຫຼືຫຼິ້ນເກມນຳກັນ. ບໍ່ວ່າເຮົາຈະມັກຄວາມບັນເທີງແບບໃດ ເຮົາຕ້ອງເຮັດໃຫ້ແນ່ໃຈວ່າເຮົາໄດ້ເລືອກຄວາມບັນເທີງແບບທີ່ “ຜູ້ເປັນນາຍພໍໃຈ.” (ເອເຟໂຊ 5:10) ເລື່ອງນີ້ສຳຄັນຫຼາຍເພາະຄວາມບັນເທີງຫຼາຍຢ່າງກ່ຽວຂ້ອງກັບສິ່ງທີ່ພະເຢໂຫວາຊັງ ເຊັ່ນ ຄວາມຮຸນແຮງ ການຜິດສິນລະທຳ ຫຼືກ່ຽວຂ້ອງກັບໄສຍະສາດ. (ອ່ານຄຳເພງ 11:5) ແລ້ວອັນໃດຈະຊ່ວຍເຮົາໃຫ້ເລືອກຄວາມບັນເທີງທີ່ດີໄດ້?

ຖ້າເຮົາເລືອກເປັນໝູ່ກັບຄົນທີ່ຮັກພະເຢໂຫວາກໍຈະມີຜົນດີກັບເຮົາແລະກັບການເລືອກຄວາມບັນເທີງຂອງເຮົາ. ເຮົາໄດ້ຮຽນໃນບົດ 48 ໄປແລ້ວວ່າ “ຄົນທີ່ຄົບຫາກັບຄົນສະຫຼາດຈະສະຫຼາດ.” ແຕ່ຖ້າເປັນໝູ່ສະໜິດກັບຄົນທີ່ບໍ່ໄດ້ຮັກມາດຕະຖານຂອງພະເຈົ້າ ເຮົາກໍຈະ “ເດືອດຮ້ອນ.”—ສຸພາສິດ 13:20, ລ.ມ.

2. ເປັນຫຍັງເຮົາຕ້ອງກຳນົດໄວ້ວ່າຈະໃຊ້ເວລາຫຼາຍສ່ຳໃດກັບຄວາມບັນເທີງ?

ເຖິງວ່າຄວາມບັນເທີງທີ່ເຮົາເລືອກຈະເປັນແບບທີ່ພະເຢໂຫວາພໍໃຈ ແຕ່ເຮົາກໍຕ້ອງລະວັງທີ່ຈະບໍ່ໃຊ້ເວລາກັບຄວາມບັນເທີງຫຼາຍເກີນໄປ. ເພາະຖ້າບໍ່ລະວັງ ເຮົາຈະບໍ່ມີເວລາເຮັດແນວອື່ນທີ່ສຳຄັນກວ່າ. ຄຳພີໄບເບິນບອກໃຫ້ເຮົາ “ໃຊ້ເວລາໃຫ້ເປັນປະໂຫຍດຫຼາຍທີ່ສຸດ.”—ອ່ານເອເຟໂຊ 5:15, 16

ຮຽນຮູ້ຫຼາຍຂຶ້ນ

ມາເບິ່ງວ່າເຈົ້າຈະເລືອກຄວາມບັນເທີງທີ່ດີໄດ້ແນວໃດ.

3. ເຮົາບໍ່ຄວນເລືອກຄວາມບັນເທີງທີ່ບໍ່ດີ

ເປັນຫຍັງເຮົາຄວນຄິດໃຫ້ດີຕອນທີ່ເຮົາເລືອກຄວາມບັນເທີງ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຂ້ອຍຄວນເລືອກຄວາມບັນເທີງແບບໃດ? (4:39)

ການຕໍ່ສູ້ໃນສະໄໝໂຣມຄ້າຍຄືກັນກັບຄວາມບັນເທີງບາງຢ່າງໃນທຸກມື້ນີ້ແນວໃດ?
ຈາກວິດີໂອ ແດນນີໄດ້ຮຽນຮູ້ຫຍັງກ່ຽວກັບຄວາມບັນເທີງ?

ອ່ານໂຣມ 12:9 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເມື່ອຕ້ອງເລືອກຄວາມບັນເທີງ ຂໍ້ຄຳພີນີ້ຈະຊ່ວຍເຈົ້າໄດ້ແນວໃດ?

ມີຫຍັງແດ່ທີ່ພະເຢໂຫວາຊັງ? ອ່ານສຸພາສິດ 6:16, 17 ແລະຄາລາເຕຍ 5:19-21. ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.

ຈາກຂໍ້ຄຳພີທີ່ອ່ານໄປ ມີຫຍັງແດ່ທີ່ເຮົາເຫັນໄດ້ທົ່ວໄປໃນຄວາມບັນເທີງໃນທຸກມື້ນີ້?

ເຈົ້າຈະເລືອກຄວາມບັນເທີງທີ່ດີໄດ້ແນວໃດ?

ໃຫ້ຖາມໂຕເອງວ່າ:

ຄວາມບັນເທີງນີ້ມີຫຍັງທີ່ພະເຢໂຫວາຊັງບໍ?
ຄວາມບັນເທີງນີ້ເຮັດໃຫ້ຂ້ອຍບໍ່ມີເວລາເຮັດສິ່ງທີ່ສຳຄັນກວ່າບໍ?
ຄວາມບັນເທີງນີ້ເຮັດໃຫ້ຂ້ອຍຕ້ອງໃຊ້ເວລາເລື້ອຍໆກັບຄົນທີ່ບໍ່ໄດ້ຮັກພະເຢໂຫວາບໍ?

ແຮ່ງເຮົາຢູ່ຫ່າງຈາກອັນຕະລາຍຫຼາຍສ່ຳໃດ ເຮົາກໍແຮ່ງຈະປອດໄພຫຼາຍສ່ຳນັ້ນ. ສະນັ້ນ ຖ້າເຮົາຮູ້ສຶກວ່າຄວາມບັນເທີງນັ້ນອາດຈະບໍ່ດີສຳລັບເຮົາ ເຮົາກໍຄວນຈະຢູ່ຫ່າງຈາກຄວາມບັນເທີງນັ້ນ

4. ໃຊ້ເວລາຂອງເຈົ້າຢ່າງສະຫຼາດ

ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເຈົ້າໃຊ້ເວລາຂອງເຈົ້າແນວໃດ? (2:45)

ເຖິງວ່າພີ່ນ້ອງຊາຍໃນວິດີໂອບໍ່ໄດ້ເບິ່ງຫຍັງທີ່ບໍ່ດີ ແຕ່ລາວໃຊ້ເວລາຂອງລາວແນວໃດແລະຜົນເປັນແນວໃດ?

ອ່ານຟີລິບປອຍ 1:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເມື່ອຕ້ອງຕັດສິນໃຈວ່າຈະໃຊ້ເວລາກັບຄວາມບັນເທີງຫຼາຍໜ້ອຍສ່ຳໃດ ຂໍ້ຄຳພີນີ້ຈະຊ່ວຍເຮົາແນວໃດ?

5. ເລືອກຄວາມບັນເທີງທີ່ດີ

ເຖິງຈະມີຄວາມບັນເທີງບາງຢ່າງທີ່ພະເຢໂຫວາບໍ່ມັກ ແຕ່ກໍມີອີກຫຼາຍຢ່າງທີ່ເພິ່ນພໍໃຈແລະເຮົາກໍເຮັດໄດ້. ອ່ານຜູ້ເທສະໜາປ່າວປະກາດ 8:15 ແລະຟີລິບປອຍ 4:8 ແລ້ວລົມກັນກ່ຽວກັບຄຳຖາມຕໍ່ໄປນີ້: