ການຮັກສາຄວາມເປັນກາງຂອງເຈົ້າໃນໂລກທີ່ແຕກແຍກ
“ສິ່ງຂອງພະເຈົ້າ ຈົ່ງສົ່ງໃຫ້ຄືນແກ່ພະເຈົ້າ.”—ມັດທາຍ 22:21
ເພງ: 33, 137
1. ເຮົາສາມາດເຊື່ອຟັງທັງພະເຈົ້າແລະລັດຖະບານຂອງມະນຸດໄດ້ແນວໃດ?
ຄຳພີໄບເບິນສອນເຮົາໃຫ້ເຊື່ອຟັງລັດຖະບານຂອງມະນຸດ ແຕ່ຍັງບອກວ່າເຮົາຕ້ອງເຊື່ອຟັງພະເຈົ້າສະເໝີ. (ກິດຈະການ 5:29; ຕິໂຕ 3:1) ເລື່ອງນີ້ຈະເປັນໄປໄດ້ແນວໃດ? ພະເຍຊູອະທິບາຍຫຼັກການໜຶ່ງທີ່ຊ່ວຍເຮົາໃຫ້ຮູ້ວ່າຜູ້ໃດທີ່ເຮົາຄວນເຊື່ອຟັງ. ພະອົງກ່າວວ່າ ເຮົາຄວນສົ່ງຄືນ “ສິ່ງຂອງກະສັດເຊຊາຈົ່ງສົ່ງໃຫ້ຄືນແກ່ກະສັດເຊຊາ ແລະສິ່ງຂອງພະເຈົ້າຈົ່ງສົ່ງໃຫ້ຄືນແກ່ພະເຈົ້າ.” [1] (ເບິ່ງຂໍ້ສັງເກດສຳລັບຜູ້ອ່ານ) (ມັດທາຍ 22:21) ເຮົາສົ່ງຄືນ ‘ສິ່ງຂອງກະສັດເຊຊາໃຫ້ແກ່ກະສັດເຊຊາ’ ເມື່ອເຮົາປະຕິບັດຕາມກົດໝາຍຕ່າງໆຂອງລັດຖະບານ ປະຕິບັດຕໍ່ເຈົ້າໜ້າທີ່ຂອງລັດດ້ວຍຄວາມນັບຖື ແລະຈ່າຍພາສີອາກອນ. (ໂລມ 13:7) ເຖິງຢ່າງນັ້ນກໍຕາມ ຖ້າລັດຖະບານບອກໃຫ້ເຮົາເຮັດໃນສິ່ງທີ່ພະເຈົ້າບໍ່ຕ້ອງການໃຫ້ເຮົາເຮັດ ເຮົາຈະປະຕິເສດວ່າຈະບໍ່ເຮັດສິ່ງເຫຼົ່ານັ້ນ ແຕ່ຈະປະຕິເສດໃນແບບທີ່ສະແດງຄວາມນັບຖືສະເໝີ.
2. ເຮົາຈະສະແດງໃຫ້ເຫັນແນວໃດວ່າເຮົາບໍ່ເຂົ້າຂ້າງເລື່ອງການເມືອງຂອງໂລກນີ້?
2 ວິທີໜຶ່ງທີ່ເຮົາສົ່ງຄືນ ‘ສິ່ງຂອງພະເຈົ້າໃຫ້ແກ່ພະເຈົ້າ’ ແມ່ນໂດຍບໍ່ເຂົ້າຂ້າງຝ່າຍໃດຝ່າຍໜຶ່ງໃນປະເດັນເລື່ອງການເມືອງຂອງໂລກນີ້. ເຮົາຮັກສາຄວາມເປັນກາງໃນເລື່ອງເຫຼົ່ານີ້. (ເອຊາອີ 2:4) ເນື່ອງຈາກພະເຢໂຫວາອະນຸຍາດໃຫ້ລັດຖະບານຂອງມະນຸດປົກຄອງເຮົາ ດັ່ງນັ້ນເຮົາຈະບໍ່ຕໍ່ຕ້ານເຂົາເຈົ້າ. ນອກຈາກນັ້ນ ເຮົາຍັງຈະບໍ່ກ່ຽວຂ້ອງໃນຂະບວນການໃດໆກໍຕາມທີ່ສະແດງນໍ້າໃຈຮັກຊາດຫຼືນໍ້າໃຈຊາດນິຍົມ. (ໂລມ 13:1, 2) ເຮົາບໍ່ພະຍາຍາມທີ່ຈະປ່ຽນແປງລັດຖະບານຕ່າງໆ ຫຼືບໍ່ພະຍາຍາມທີ່ຈະມີອິດພົນຕໍ່ນັກການເມືອງ ແລະເຮົາບໍ່ລົງຄະແນນສຽງໃນການເລືອກຕັ້ງທາງການເມືອງ ຫຼືສະໝັກເປັນນັກການເມືອງ.
3. ເປັນຫຍັງເຮົາຕ້ອງຮັກສາຄວາມເປັນກາງ?
3 ມີເຫດຜົນຫຼາຍຢ່າງທີ່ພະເຈົ້າບອກເຮົາໃຫ້ຮັກສາຄວາມເປັນກາງ. ເຫດຜົນຢ່າງໜຶ່ງກໍຄືເຮົາເຮັດຕາມຕົວຢ່າງຂອງພະເຍຊູຜູ້ທີ່ “ບໍ່ເປັນຝ່າຍໂລກນີ້.” ພະອົງບໍ່ເຄີຍເຂົ້າຂ້າງຝ່າຍໃດຝ່າຍໜຶ່ງໃນເລື່ອງການເມືອງຫຼືໃນເລື່ອງສົງຄາມ. (ໂຢຮັນ 6:15; 17:16) ອີກເຫດຜົນໜຶ່ງກໍຄືເຮົາສະໜັບສະໜູນລາຊະອານາຈັກຂອງພະເຈົ້າ. ເນື່ອງຈາກເຮົາບໍ່ໄດ້ສະໜັບສະໜູນລັດຖະບານຂອງມະນຸດ ເຮົາກໍມີສະຕິຮູ້ສຶກຜິດຊອບທີ່ສະອາດເມື່ອເຮົາປະກາດວ່າ ມີພຽງລາຊະອານາຈັກຂອງພະເຈົ້າເທົ່ານັ້ນທີ່ຈະແກ້ໄຂບັນຫາທຸກຢ່າງຂອງມະນຸດ. ສາສະໜາທີ່ສອນບໍ່ຖືກຕ້ອງໄດ້ເຂົ້າຂ້າງຝ່າຍໃດຝ່າຍໜຶ່ງໃນເລື່ອງການເມືອງ ແລະການເຮັດແບບນີ້ເຮັດໃຫ້ຜູ້ຄົນແຕກແຍກກັນ. ແຕ່ເນື່ອງຈາກເຮົາຮັກສາຄວາມເປັນກາງ ເຮົາຈຶ່ງມີຄວາມກົມກຽວກັນກັບພີ່ນ້ອງຊາຍຍິງຂອງເຮົາຢູ່ທົ່ວໂລກ.—1 ເປໂຕ 2:17
4. (ກ) ເຮົາຮູ້ໄດ້ແນວໃດວ່າຈະຍາກຫຼາຍຂຶ້ນໃນການຮັກສາຄວາມເປັນກາງ? (ຂ) ເປັນຫຍັງເຮົາຄວນກຽມຕົວຕັ້ງແຕ່ຕອນນີ້ທີ່ຈະຮັກສາຄວາມເປັນກາງ?
4 ເຮົາອາດໃຊ້ຊີວິດຢູ່ໃນບ່ອນທີ່ຜູ້ຄົນບໍ່ໄດ້ຄາດໝາຍໃຫ້ເຮົາເຂົ້າຂ້າງຝ່າຍໃດຝ່າຍໜຶ່ງໃນເລື່ອງການເມືອງ. ແຕ່ແຮ່ງອະວະສານຂອງລະບົບຂອງຊາຕານໃກ້ເຂົ້າມາຫຼາຍເທົ່າໃດ ກໍແຮ່ງຍາກຫຼາຍຂຶ້ນສຳລັບເຮົາທີ່ຈະຮັກສາຄວາມເປັນກາງ. ຜູ້ຄົນໃນທຸກມື້ນີ້ເປັນຄົນ “ບໍ່ຍອມໃຜ” ແລະເປັນຄົນ “ຫົວດື້” ແລະເຂົາເຈົ້າຈະແຕກແຍກກັນຫຼາຍຕື່ມອີກ. (2 ຕີໂມເຕ 3:3, 4, ລ.ມ.) ພີ່ນ້ອງຂອງເຮົາບາງຄົນໄດ້ຮັບຜົນກະທົບມາຈາກການປ່ຽນແປງຢ່າງກະທັນຫັນທາງດ້ານການເມືອງໃນປະເທດຂອງເຂົາເຈົ້າ. ດ້ວຍເຫດຜົນນີ້ເຮົາຈຶ່ງຕ້ອງກຽມຕົວໃຫ້ພ້ອມຕັ້ງແຕ່ຕອນນີ້ທີ່ຈະຮັກສາຄວາມເປັນກາງແມ່ນແຕ່ໃນສະຖານະການທີ່ຫຍຸ້ງຍາກ. ໃຫ້ເຮົາພິຈາລະນາເບິ່ງສີ່ຢ່າງທີ່ເຮົາສາມາດເຮັດໄດ້ເພື່ອກຽມຕົວໃຫ້ພ້ອມ.
ມີທັດສະນະຕໍ່ລັດຖະບານຂອງມະນຸດຄືກັບທີ່ພະເຢໂຫວາມີ
5. ພະເຢໂຫວາຄິດແນວໃດກ່ຽວກັບລັດຖະບານຂອງມະນຸດ?
5 ສິ່ງທຳອິດທີ່ເຮົາສາມາດກຽມຕົວໃຫ້ພ້ອມຕັ້ງແຕ່ຕອນນີ້ທີ່ຈະຮັກສາຄວາມເປັນກາງແມ່ນການທີ່ເຮົາມີທັດສະນະຕໍ່ລັດຖະບານຂອງມະນຸດຄືກັບທີ່ພະເຢໂຫວາມີ. ເມື່ອພະເຢໂຫວາສ້າງມະນຸດ ພະອົງບໍ່ໄດ້ໃຫ້ມະນຸດມີສິດທີ່ຈະປົກຄອງເໜືອມະນຸດຄົນອື່ນ. (ເຢເຣມີ 10:23) ພະອົງຖືວ່າມະນຸດທຸກຄົນເປັນຄອບຄົວດຽວກັນ. ແຕ່ລັດຖະບານຂອງມະນຸດເຮັດໃຫ້ຜູ້ຄົນແຕກແຍກກັນໂດຍອ້າງວ່າຊາດຂອງຕົນເອງດີທີ່ສຸດ. ແມ່ນແຕ່ເມື່ອລັດຖະບານຕ່າງໆທີ່ເບິ່ງຄືວ່າເປັນລັດຖະບານທີ່ດີ ແຕ່ເຂົາເຈົ້າກໍບໍ່ສາມາດແກ້ໄຂບັນຫາທຸກຢ່າງໄດ້. ນອກຈາກນັ້ນ ເຂົາເຈົ້າຍັງກາຍເປັນສັດຕູຂອງລາຊະອານາຈັກຂອງພະເຈົ້າເຊິ່ງໄດ້ເລີ່ມຕົ້ນປົກຄອງໃນປີ 1914. ອີກບໍ່ດົນລາຊະອານາຈັກນີ້ຈະທຳລາຍລັດຖະບານຂອງມະນຸດທັງໝົດ.—ອ່ານຄຳເພງ 2:2, 7-9
ກຽມຕົວຕັ້ງແຕ່ຕອນນີ້ທີ່ຈະຮັກສາຄວາມເປັນກາງເຖິງວ່າຈະມີສະຖານະການທີ່ຫຍຸ້ງຍາກ
6. ເຮົາຄວນປະຕິບັດແນວໃດຕໍ່ຜູ້ທີ່ມີສິດອຳນາດໃນລັດຖະບານ?
6 ພະເຢໂຫວາອະນຸຍາດໃຫ້ລັດຖະບານຂອງມະນຸດດຳເນີນຢູ່ກໍຍ້ອນວ່າເຂົາເຈົ້າສາມາດຮັກສາຄວາມສະຫງົບສຸກແລະຄວາມເປັນລະບຽບໃນລະດັບໃດໜຶ່ງ. ສະພາບການແບບນີ້ຊ່ວຍເຮົາໃຫ້ປະກາດຂ່າວດີເລື່ອງລາຊະອານາຈັກຂອງພະເຈົ້າ. (ໂລມ 13:3, 4) ພະເຢໂຫວາບອກໃຫ້ເຮົາອະທິດຖານສຳລັບຜູ້ທີ່ມີສິດອຳນາດເພື່ອເຮົາຈະສາມາດນະມັດສະການພະອົງດ້ວຍຄວາມສະຫງົບສຸກ. (1 ຕີໂມເຕ 2:1, 2) ເມື່ອເຮົາຖືກປະຕິບັດຢ່າງບໍ່ຍຸຕິທຳ ເຮົາອາດຂໍຄວາມຊ່ວຍເຫຼືອຈາກຜູ້ທີ່ມີສິດອຳນາດໃນລັດຖະບານ ເຊິ່ງໂປໂລກໍໄດ້ເຮັດແບບນັ້ນ. (ກິດຈະການ 25:11) ເຖິງແມ່ນຄຳພີໄບເບິນບອກວ່າຊາຕານຄວບຄຸມລັດຖະບານຕ່າງໆຂອງມະນຸດ ແຕ່ຄຳພີໄບເບິນບໍ່ເຄີຍບອກວ່າມັນຄວບຄຸມມະນຸດແຕ່ລະຄົນທີ່ມີສິດອຳນາດໃນລັດຖະບານໃດໜຶ່ງ. (ລືກາ 4:5, 6) ດັ່ງນັ້ນ ເຮົາບໍ່ຄວນໃຫ້ຄວາມຄິດເຫັນແກ່ຜູ້ໃດຜູ້ໜຶ່ງວ່າເຈົ້າໜ້າທີ່ຂອງລັດຄົນໃດຄົນໜຶ່ງຖືກພະຍາມານຄວບຄຸມ. ຄຳພີໄບເບິນໃຫ້ເຫດຜົນວ່າເຮົາບໍ່ຄວນໝິ່ນປະໝາດຄົນອື່ນ.—ຕິໂຕ 3:1, 2
7. ເຮົາຕ້ອງຫຼີກລ່ຽງຄວາມຄິດແບບໃດ?
7 ເຮົາເຊື່ອຟັງພະເຢໂຫວາໂດຍບໍ່ເຂົ້າຂ້າງນັກການເມືອງຄົນໃດຄົນໜຶ່ງຫຼືກຸ່ມທາງດ້ານການເມືອງກຸ່ມໃດກຸ່ມໜຶ່ງ ແມ່ນແຕ່ເມື່ອແນວຄິດແລະທັດສະນະຂອງເຂົາເຈົ້າອາດເປັນປະໂຫຍດຕໍ່ເຮົາກໍຕາມ. ບາງຄັ້ງ ນີ້ອາດບໍ່ແມ່ນເລື່ອງງ່າຍສຳລັບເຮົາ. ຕົວຢ່າງເຊັ່ນ: ໃຫ້ນຶກພາບເຫດການທີ່ປະຊາຊົນໄດ້ຂັດຂືນຕໍ່ຕ້ານລັດຖະບານໜຶ່ງເຊິ່ງກໍ່ໃຫ້ເກີດຄວາມຍາກລຳບາກຢ່າງຫຼວງຫຼາຍ ແລະແມ່ນແຕ່ພະຍານພະເຢໂຫວາກໍໄດ້ຮັບຜົນກະທົບຈາກເລື່ອງນີ້. ແນ່ນອນວ່າເຈົ້າຈະບໍ່ເຂົ້າຮ່ວມກັບຜູ້ທີ່ກຳລັງເຮັດການຕໍ່ຕ້ານ ແຕ່ເຈົ້າຈະຄິດບໍວ່າຜູ້ທີ່ຕໍ່ຕ້ານເປັນຝ່າຍຖືກແລະເຈົ້າກໍຫວັງວ່າເຂົາເຈົ້າຈະປະສົບຜົນສຳເລັດໃນເລື່ອງນີ້? (ເອເຟດ 2:2) ຖ້າເຮົາຕ້ອງການທີ່ຈະຮັກສາຄວາມເປັນກາງ ເຮົາຄວນຫຼີກລ່ຽງຄວາມຮູ້ສຶກທີ່ວ່າຝ່າຍໜຶ່ງຖືກຫຼືດີກວ່າອີກຝ່າຍໜຶ່ງ. ຄວາມຮູ້ສຶກແບບນີ້ຈະເຫັນໄດ້ຈາກສິ່ງທີ່ເຮົາເວົ້າແລະເຮັດ.
“ເປັນຄົນສະຫຼາດ” ແຕ່ ‘ບໍ່ເປັນພິດເປັນໄພ’
8. ເມື່ອໃດເປັນເລື່ອງຍາກທີ່ຈະຮັກສາຄວາມເປັນກາງ ເຮົາຈະ “ເປັນຄົນສະຫຼາດ” ແຕ່ ‘ບໍ່ເປັນພິດເປັນໄພ’ ໄດ້ແນວໃດ?
8 ສິ່ງທີສອງທີ່ຊ່ວຍເຮົາໃຫ້ຮັກສາຄວາມເປັນກາງແມ່ນການທີ່ເຮົາເປັນ “ຄົນສະຫຼາດເໝືອນດັ່ງງູ ແລະຄົນຊື່ດີ [ບໍ່ເປັນພິດເປັນໄພ, ລ.ມ.] ເໝືອນດັ່ງນົກເຂົາ.” (ອ່ານມັດທາຍ 10:16, 17) ເຮົາເປັນຄົນ “ສະຫຼາດ” ເມື່ອເຮົາຄິດລ່ວງໜ້າກ່ຽວກັບຄວາມຫຍຸ້ງຍາກຕ່າງໆ ແລະເຮົາເປັນຄົນ ‘ບໍ່ເປັນພິດເປັນໄພ’ ເມື່ອເຮົາຮັກສາຄວາມເປັນກາງໃນສະພາບການທີ່ຫຍຸ້ງຍາກເຫຼົ່ານັ້ນ. ຂໍໃຫ້ເຮົາພິຈາລະນາສະພາບການບາງຢ່າງແລະສິ່ງທີ່ເຮົາສາມາດເຮັດໄດ້ເພື່ອຮັກສາຄວາມເປັນກາງ.
9. ເມື່ອເວົ້າກັບຄົນອື່ນ ເຮົາຕ້ອງລະວັງໃນເລື່ອງໃດ?
9 ການສົນທະນາ. ເຮົາຕ້ອງລະວັງເປັນພິເສດເມື່ອຜູ້ຄົນເລີ່ມລົມກັນກ່ຽວກັບເລື່ອງການເມືອງ. ຕົວຢ່າງເຊັ່ນ: ເມື່ອກຳລັງລົມກັບບາງຄົນໃນເລື່ອງລາຊະອານາຈັກຂອງພະເຈົ້າ ເຮົາບໍ່ຄວນເວົ້າວ່າເຮົາເຫັນດີຫຼືບໍ່ເຫັນດີກັບທັດສະນະຫຼືແນວຄິດຂອງພັກການເມືອງກຸ່ມໃດໜຶ່ງຫຼືຜູ້ນຳທາງການເມືອງຄົນໃດຄົນໜຶ່ງ. ແທນທີ່ຈະລົມກັນໃນສິ່ງທີ່ມະນຸດຕ້ອງການຈະເຮັດເພື່ອແກ້ໄຂບັນຫາຕ່າງໆຂອງມະນຸດ ໃຫ້ເຂົາເຈົ້າເບິ່ງໃນຄຳພີໄບເບິນວ່າລາຊະອານາຈັກຂອງພະເຈົ້າຈະແກ້ໄຂບັນຫາເຫຼົ່ານີ້ຢ່າງຖາວອນ. ຖ້າບາງຄົນຕ້ອງການທີ່ຈະໂຕ້ຖຽງກ່ຽວກັບເລື່ອງການແຕ່ງດອງລະຫວ່າງຄົນເພດດຽວກັນຫຼືເລື່ອງການເອົາລູກອອກ ໃຫ້ບອກເຂົາເຈົ້າໃນສິ່ງທີ່ຄຳພີໄບເບິນສອນແລະວິທີທີ່ເຈົ້າພະຍາຍາມທີ່ຈະໃຊ້ຄວາມຮູ້ນັ້ນໃນຊີວິດຂອງເຈົ້າ. ຖ້າບາງຄົນເວົ້າວ່າຄວນມີການຍົກເລີກຫຼືປ່ຽນແປງກົດໝາຍບາງຂໍ້ ເຮົາບໍ່ຄວນເຂົ້າຂ້າງຝ່າຍໃດຝ່າຍໜຶ່ງ ແລະເຮົາກໍບໍ່ຄວນຢືນຢັນໃຫ້ຄົນນັ້ນປ່ຽນທັດສະນະຂອງລາວ.
ສົມທຽບສິ່ງທີ່ເຈົ້າໄດ້ຍິນກັບ “ຖ້ອຍຄຳອັນແທ້” ເຊິ່ງພົບໃນຄຳພີໄບເບິນ
10. ເຮົາສາມາດໝັ້ນໃຈໄດ້ແນວໃດວ່າເຮົາຮັກສາຄວາມເປັນກາງເມື່ອເຮົາເບິ່ງຫຼືອ່ານສິ່ງໃດກໍຕາມໃນສື່ມວນຊົນ?
10 ສື່ມວນຊົນ. ບາງເທື່ອມີການລາຍງານຂ່າວໃນແບບທີ່ສະໜັບສະໜູນຝ່າຍໃດຝ່າຍໜຶ່ງຢ່າງຮຸນແຮງກ່ຽວກັບບັນຫາໃດໜຶ່ງ. ເລື່ອງນີ້ເປັນຄວາມຈິງໂດຍສະເພາະໃນປະເທດຕ່າງໆທີ່ລັດຖະບານເປັນຜູ້ຄວບຄຸມເລື່ອງຂ່າວສານ. ຖ້າສຳນັກຂ່າວຫຼືນັກຂ່າວເຂົ້າຂ້າງຝ່າຍໃດຝ່າຍໜຶ່ງ ເຮົາຕ້ອງລະວັງທີ່ຈະບໍ່ເລີ່ມຄິດໃນແບບທີ່ເຂົາເຈົ້າຄິດ. ຕົວຢ່າງເຊັ່ນ: ຂໍໃຫ້ຖາມຕົວເອງວ່າ: ‘ຂ້ອຍມັກຟັງນັກຂ່າວຄົນໜຶ່ງສະເພາະບໍ ຍ້ອນວ່າຂ້ອຍເຫັນດີກັບສິ່ງທີ່ລາວເວົ້າກ່ຽວກັບເລື່ອງການເມືອງ?’ ເພື່ອຊ່ວຍເຈົ້າໃຫ້ຮັກສາຄວາມເປັນກາງ ໃຫ້ຫຼີກລ່ຽງການເບິ່ງຫຼືອ່ານຂ່າວຕ່າງໆທີ່ເຂົ້າຂ້າງຝ່າຍໃດຝ່າຍໜຶ່ງໃນປະເດັນເລື່ອງການເມືອງ. ໃຫ້ຊອກເບິ່ງຂ່າວທີ່ບໍ່ເຂົ້າຂ້າງຝ່າຍໃດຝ່າຍໜຶ່ງ. ທຸກຄັ້ງໃຫ້ສົມທຽບສິ່ງທີ່ເຈົ້າໄດ້ຍິນກັບ “ຖ້ອຍຄຳອັນແທ້” ເຊິ່ງມີຢູ່ໃນຄຳພີໄບເບິນ.—2 ຕີໂມເຕ 1:13, ທ.ປ.
11. ອາດເປັນເລື່ອງຍາກແນວໃດທີ່ເຮົາຈະຮັກສາຄວາມເປັນກາງ ເມື່ອວັດຖຸສິ່ງຂອງມີຄວາມສຳຄັນຫຼາຍຕໍ່ເຮົາ?
11 ການນິຍົມວັດຖຸ. ເມື່ອເງິນຫຼືວັດຖຸສິ່ງຂອງທີ່ເຮົາມີເປັນສິ່ງທີ່ສຳຄັນຫຼາຍຕໍ່ເຮົາ ເຮົາອາດຮູ້ສຶກວ່າເປັນເລື່ອງຍາກທີ່ຈະຮັກສາຄວາມເປັນກາງໄວ້ໄດ້. ຫຼັງຈາກປີ 1970 ພະຍານພະເຢໂຫວາຫຼາຍຄົນໃນປະເທດມາລາວີຈຳເປັນຕ້ອງປະຖິ້ມທຸກສິ່ງທີ່ເຂົາເຈົ້າມີ ເນື່ອງຈາກວ່າເຂົາເຈົ້າປະຕິເສດທີ່ຈະເຂົ້າຮ່ວມກັບກຸ່ມພັກການເມືອງ. ໜ້າເສຍດາຍ ບາງຄົນບໍ່ໄດ້ປະຖິ້ມຊີວິດທີ່ສະດວກສະບາຍຂອງເຂົາເຈົ້າ. ພີ່ນ້ອງຍິງຄົນໜຶ່ງຊື່ລຶດ ລາວຈື່ໄດ້ວ່າ: “ບາງຄົນຖືກເນລະເທດໄປພ້ອມກັບພວກເຮົາ ແຕ່ຕໍ່ມາເຂົາເຈົ້າໄດ້ເຂົ້າຮ່ວມກັບພັກການເມືອງແລະໄດ້ກັບຄືນເມືອເຮືອນຂອງຕົນ ເປັນເຊັ່ນນັ້ນຍ້ອນວ່າເຂົາເຈົ້າບໍ່ຕ້ອງການທີ່ຈະທົນຢູ່ກັບຊີວິດທີ່ບໍ່ສະດວກສະບາຍໃນຄ້າຍອົບພະຍົບ.” ແຕ່ປະຊາຊົນຂອງພະເຈົ້າສ່ວນຫຼາຍບໍ່ໄດ້ເປັນແບບນັ້ນ. ເຂົາເຈົ້າໄດ້ຮັກສາຄວາມເປັນກາງ ເຖິງແມ່ນວ່າການເຮັດເຊັ່ນນັ້ນຈະເຮັດໃຫ້ເຂົາເຈົ້າມີເງິນໜ້ອຍຫຼືສູນເສຍທຸກສິ່ງທີ່ເຂົາເຈົ້າມີ.—ເຫບເລີ 10:34
12, 13. (ກ) ພະເຢໂຫວາຄິດແນວໃດຕໍ່ມະນຸດ? (ຂ) ເຮົາຈະຮູ້ໄດ້ແນວໃດວ່າເຮົາພູມໃຈຫຼາຍເກີນໄປກ່ຽວກັບປະເທດຂອງເຮົາ?
12 ຄວາມຍິ່ງ. ເປັນເລື່ອງປົກກະຕິທີ່ຄົນເຮົາຈະພູມໃຈແລະໂອ້ອວດກ່ຽວກັບເຊື້ອຊາດ ຊົນເຜົ່າ ວັດທະນະທຳ ເມືອງ ຫຼືປະເທດຂອງຕົນເອງ. ແຕ່ພະເຢໂຫວາບໍ່ໄດ້ຄິດວ່າຄົນຜູ້ໜຶ່ງຫຼືກຸ່ມຄົນໜຶ່ງດີກວ່າຄົນອື່ນ. ສຳລັບພະເຢໂຫວາ ພວກເຮົາທຸກຄົນເທົ່າທຽມກັນ. ແນ່ນອນວ່າພະເຢໂຫວາສ້າງເຮົາແຕ່ລະຄົນໃຫ້ແຕກຕ່າງກັນ ແລະເຮົາກໍສາມາດມ່ວນຊື່ນແລະຊື່ນຊົມກັບຄວາມຫຼາກຫຼາຍນີ້ໄດ້. ພະອົງບໍ່ຕ້ອງການໃຫ້ເຮົາປະຖິ້ມວັດທະນະທຳຂອງເຮົາ ແຕ່ພະອົງກໍບໍ່ຕ້ອງການໃຫ້ເຮົາຄິດວ່າເຮົາດີກວ່າຄົນອື່ນ.—ໂລມ 10:12
13 ເຮົາບໍ່ຄວນພູມໃຈໃນປະເທດຫຼືໃນຊາດຂອງເຮົາຫຼາຍເກີນໄປຈົນຄິດວ່າປະເທດຫຼືຊາດຂອງເຮົາດີກວ່າຂອງຄົນອື່ນ. ຖ້າເຮົາຮູ້ສຶກແບບນັ້ນ ອາດເປັນເລື່ອງຍາກສຳລັບເຮົາທີ່ຈະຮັກສາຄວາມເປັນກາງແລະເລື່ອງນີ້ໄດ້ເກີດຂຶ້ນແລ້ວໃນສະຕະວັດທຳອິດ. ພີ່ນ້ອງຊາວເຫບເລີບາງຄົນບໍ່ໄດ້ປະຕິບັດຢ່າງຍຸຕິທຳຕໍ່ແມ່ໝ້າຍຊາວເກັຣກ. (ກິດຈະການ 6:1) ເຮົາຈະຮູ້ໄດ້ແນວໃດວ່າເຮົາກຳລັງເລີ່ມພັດທະນາຄວາມຍິ່ງແບບນັ້ນ? ຖ້າພີ່ນ້ອງຊາຍຫຼືພີ່ນ້ອງຍິງທີ່ມາຈາກບ່ອນອື່ນໃຫ້ຄຳແນະນຳແກ່ເຈົ້າ ເຈົ້າຈະຄິດທັນທີໂລດບໍວ່າ ‘ຢູ່ນີ້ເຮົາເຮັດສິ່ງຕ່າງໆດີກວ່ານັ້ນອີກ’ ແລ້ວຈາກນັ້ນກໍປະຕິເສດຄຳແນະນຳນັ້ນ? ຖ້າເປັນແນວນັ້ນ ຂໍໃຫ້ຈົດຈຳຄຳແນະນຳທີ່ສຳຄັນທີ່ວ່າ: “ດ້ວຍໃຈຖ່ອມຕົວລົງ ໃຫ້ຜູ້ນີ້ຖືຜູ້ນັ້ນດີກວ່າຕົວເອງ.”—ຟີລິບ 2:3
ພະເຢໂຫວາຈະຊ່ວຍເຈົ້າ
14. ການອະທິດຖານສາມາດຊ່ວຍເຮົາໄດ້ແນວໃດ ແລະຄຳພີໄບເບິນມີຕົວຢ່າງອັນໃດທີ່ພິສູດໃນເລື່ອງນີ້?
14 ສິ່ງທີສາມທີ່ຈະຊ່ວຍເຮົາໃຫ້ຮັກສາຄວາມເປັນກາງແມ່ນການທີ່ເຮົາວາງໃຈໃນພະເຢໂຫວາ. ໃຫ້ອະທິດຖານຂໍພະລັງບໍລິສຸດຈາກພະອົງເຊິ່ງຈະຊ່ວຍເຈົ້າໃຫ້ມີຄວາມອົດທົນແລະຄວບຄຸມຕົວເອງໄດ້. ຄຸນລັກສະນະເຫຼົ່ານີ້ຈະຊ່ວຍເຈົ້າໄດ້ຖ້າລັດຖະບານເຮັດບາງສິ່ງທີ່ບໍ່ສັດຊື່ຫຼືບໍ່ຍຸຕິທຳ. ໃຫ້ຂໍສະຕິປັນຍາຈາກພະເຢໂຫວາເພື່ອຈະເບິ່ງສະຖານະການໃດໜຶ່ງໃຫ້ອອກເຊິ່ງອາດເປັນສິ່ງທີ່ຍາກສຳລັບເຈົ້າທີ່ຈະຮັກສາຄວາມເປັນກາງ. ໃຫ້ຂໍພະອົງຊ່ວຍເຫຼືອເຈົ້າໃຫ້ເຮັດໃນສິ່ງທີ່ຖືກຕ້ອງໃນສະຖານະການນັ້ນ. (ຢາໂກໂບ 1:5) ເຈົ້າອາດຕິດຄຸກຫຼືຖືກລົງໂທດໃນແບບອື່ນຍ້ອນວ່າກຳລັງເປັນຄົນທີ່ພັກດີຕໍ່ພະເຢໂຫວາ. ຖ້າເປັນເຊັ່ນນັ້ນ ໃຫ້ອະທິດຖານຂໍຄວາມກ້າຫານເພື່ອເຈົ້າຈະສາມາດອະທິບາຍໄດ້ຢ່າງຈະແຈ້ງໃຫ້ຄົນອື່ນຟັງກ່ຽວກັບເຫດຜົນໃນເລື່ອງຄວາມເປັນກາງຂອງເຈົ້າ. ເຈົ້າສາມາດໝັ້ນໃຈໄດ້ວ່າພະເຢໂຫວາຈະຊ່ວຍເຈົ້າໃຫ້ອົດທົນໄດ້.—ອ່ານກິດຈະການ 4:27-31
ຮຽນຮູ້ຂໍ້ພະຄຳພີຕ່າງໆ ທີ່ຈະຊ່ວຍເຈົ້າໃຫ້ຮັກສາຄວາມເປັນກາງແລະທີ່ເວົ້າເຖິງເລື່ອງໂລກໃໝ່
15. ຄຳພີໄບເບິນສາມາດຊ່ວຍເຮົາແນວໃດໃຫ້ຮັກສາຄວາມເປັນກາງ? (ເບິ່ງຂອບ “ ພະຄຳຂອງພະເຈົ້າເສີມສ້າງຄວາມໝັ້ນໃຈຂອງເຂົາເຈົ້າ”)
15 ພະເຢໂຫວາໄດ້ໃຫ້ຄຳພີໄບເບິນແກ່ເຮົາເພື່ອເຮັດໃຫ້ເຮົາເຂັ້ມແຂງຂຶ້ນ. ການຄິດຕຶກຕອງເຖິງຂໍ້ພະຄຳພີຕ່າງໆຈະຊ່ວຍເຈົ້າໃຫ້ຮັກສາຄວາມເປັນກາງ. ໃຫ້ພະຍາຍາມຮຽນຮູ້ແລະຈື່ຈຳຂໍ້ພະຄຳພີເຫຼົ່ານີ້ ເພາະນັ້ນຈະຊ່ວຍເຈົ້າໄດ້ຖ້າເຈົ້າບໍ່ມີຄຳພີໄບເບິນ. ນອກຈາກນັ້ນ ຄຳພີໄບເບິນຍັງສາມາດເສີມສ້າງຄວາມຫວັງຂອງເຈົ້າໃນສິ່ງທີ່ພະເຈົ້າໄດ້ເວົ້າໄວ້ກ່ຽວກັບອະນາຄົດ. ເຮົາຈຳເປັນຕ້ອງມີຄວາມຫວັງນີ້ເພື່ອຈະອົດທົນກັບການຂົ່ມເຫງ. (ໂລມ 8:25) ໃຫ້ເລືອກຂໍ້ພະຄຳພີຕ່າງໆທີ່ເວົ້າເຖິງສິ່ງທີ່ເຈົ້າຕ້ອງການເປັນພິເສດທີ່ຈະເພີດເພີນໃນໂລກໃໝ່ ແລະໃຫ້ນຶກພາບຕົວເອງຢູ່ທີ່ນັ້ນ.
ໄດ້ຮັບປະໂຫຍດຈາກຜູ້ຮັບໃຊ້ທີ່ສັດຊື່ຂອງພະເຢໂຫວາ
16, 17. ເຮົາສາມາດຮຽນຮູ້ຫຍັງຈາກຕົວຢ່າງຂອງຜູ້ຮັບໃຊ້ທີ່ສັດຊື່ຂອງພະເຈົ້າເຊິ່ງຮັກສາຄວາມເປັນກາງ? (ເບິ່ງຮູບທຳອິດ)
16 ສິ່ງທີສີ່ທີ່ຈະຊ່ວຍເຮົາໃຫ້ຮັກສາຄວາມເປັນກາງແມ່ນການທີ່ເຮົາຄິດເຖິງຕົວຢ່າງຕ່າງໆຂອງຜູ້ຮັບໃຊ້ທີ່ສັດຊື່ຂອງພະເຢໂຫວາ. ຫຼາຍຄົນເຊິ່ງມີຊີວິດໃນສະໄໝທີ່ຂຽນຄຳພີໄບເບິນ ເຂົາເຈົ້າມີຄວາມກ້າຫານ ແລະເຂົາເຈົ້າເຮັດການຕັດສິນໃຈທີ່ສຸຂຸມເຊິ່ງໄດ້ຊ່ວຍເຂົາເຈົ້າໃຫ້ຮັກສາຄວາມເປັນກາງໄວ້ໄດ້. ຂໍໃຫ້ຄິດເຖິງຊາດຣາກ ເມຊາກ ແລະອາເບດເນໂຄ ເຊິ່ງໄດ້ປະຕິເສດການຂາບໄຫວ້ຮູບປັ້ນທີ່ເປັນຕົວແທນຂອງລັດຖະບານຂອງປະເທດບາບີໂລນ. (ອ່ານດານຽນ 3:16-18) ບັນທຶກເລື່ອງນີ້ໃນຄຳພີໄບເບິນໄດ້ຊ່ວຍພະຍານພະເຢໂຫວາຫຼາຍຄົນໃນທຸກມື້ນີ້ໃຫ້ເປັນຄົນກ້າຫານແລະບໍ່ຍອມເຄົາລົບທຸງຂອງປະເທດທີ່ເຂົາເຈົ້າອາໄສຢູ່. ພະເຍຊູເອງບໍ່ໄດ້ມີສ່ວນກ່ຽວຂ້ອງກັບເລື່ອງການເມືອງຫຼືປະເດັນອື່ນໆທີ່ແບ່ງແຍກຜູ້ຄົນ. ພະອົງຮູ້ວ່າຕົວຢ່າງທີ່ດີຂອງພະອົງຈະຊ່ວຍພວກລູກສິດໄດ້ ດັ່ງນັ້ນ ພະອົງໄດ້ກ່າວວ່າ: “ຈົ່ງມີໃຈກ້າ. ເຮົາໄດ້ແພ້ [ຊະນະ] ໂລກແລ້ວ.”—ໂຢຮັນ 16:33
17 ພະຍານພະເຢໂຫວາຫຼາຍຄົນໃນສະໄໝຂອງເຮົາໄດ້ຮັກສາຄວາມເປັນກາງ. ເຂົາເຈົ້າບາງຄົນຍັງຖືກທໍລະມານ ຖືກຄຸກ ແລະແມ່ນແຕ່ຖືກຂ້າ ເນື່ອງຈາກວ່າເຂົາເຈົ້າຮັກສາຄວາມສັດຊື່ຕໍ່ພະເຢໂຫວາ. ຕົວຢ່າງຂອງເຂົາເຈົ້າສາມາດຊ່ວຍເຮົາໃຫ້ມີຄວາມກ້າຫານ. ພີ່ນ້ອງຊາຍຄົນໜຶ່ງຈາກປະເທດຕວກກີເວົ້າວ່າ: “ຟານສ ໄຣເທີເປັນພີ່ນ້ອງຊາຍໜຸ່ມທີ່ຖືກປະຫານຊີວິດຍ້ອນວ່າລາວປະຕິເສດທີ່ຈະບໍ່ເຂົ້າຮ່ວມກັບກອງທັບຂອງຮິດເລີ. ຈົດໝາຍທີ່ລາວຂຽນເຖິງແມ່ໃນຄືນກ່ອນທີ່ລາວຈະເສຍຊີວິດສະແດງເຖິງຄວາມເຊື່ອທີ່ຍິ່ງໃຫຍ່ແລະຄວາມໝັ້ນໃຈໃນພະເຢໂຫວາ ແລະຂ້ອຍຕ້ອງການທີ່ຈະເຮັດຕາມແບບຢ່າງຂອງລາວຖ້າຂ້ອຍປະເຊີນກັບການທົດລອງແບບນັ້ນ.” [2]—ເບິ່ງຂໍ້ສັງເກດສຳລັບຜູ້ອ່ານ.
18, 19. (ກ) ພີ່ນ້ອງໃນປະຊາຄົມສາມາດຊ່ວຍເຈົ້າໃຫ້ຮັກສາຄວາມເປັນກາງໄດ້ແນວໃດ? (ຂ) ເຈົ້າຕັ້ງໃຈແນ່ວແນ່ທີ່ຈະເຮັດຫຍັງ?
18 ພີ່ນ້ອງຊາຍຍິງທີ່ຢູ່ໃນປະຊາຄົມຂອງເຈົ້າສາມາດຊ່ວຍເຈົ້າໃຫ້ຮັກສາຄວາມເປັນກາງ. ໃຫ້ບອກຜູ້ເຖົ້າແກ່ຖ້າເຈົ້າຕົກຢູ່ໃນສະພາບການທີ່ຫຍຸ້ງຍາກ ເພາະເຂົາເຈົ້າສາມາດໃຫ້ຄຳແນະນຳທີ່ດີແກ່ເຈົ້າຈາກຄຳພີໄບເບິນ. ນອກຈາກນັ້ນ ຖ້າພີ່ນ້ອງຄົນອື່ນໃນປະຊາຄົມຮູ້ກ່ຽວກັບສະພາບການຂອງເຈົ້າ ເຂົາເຈົ້າກໍສາມາດໜູນກຳລັງໃຈເຈົ້າໄດ້. ຂໍໃຫ້ເຂົາເຈົ້າອະທິດຖານເພື່ອເຈົ້າ. ແຕ່ເຮົາເອງກໍຄວນຊ່ວຍເຫຼືອພີ່ນ້ອງຂອງເຮົາແລະອະທິດຖານເພື່ອເຂົາເຈົ້າເຊັ່ນກັນ. (ມັດທາຍ 7:12) ເພື່ອຈະເຫັນລາຍຊື່ຂອງພີ່ນ້ອງທີ່ຖືກຄຸກ ໃຫ້ເບິ່ງບົດຄວາມທີ່ມີໃນເວັບໄຊ jw.org ເຊິ່ງຢູ່ໃນຫົວຂໍ້ NEWSROOM > LEGAL DEVELOPMENTS ໃນຫົວເລື່ອງທີ່ຊື່ວ່າ “Jehovah’s Witnesses Imprisoned for Their Faith—By Location.” ໃຫ້ເລືອກເອົາສອງສາມຊື່ ແລ້ວຈາກນັ້ນກໍຂໍໃຫ້ພະເຢໂຫວາຊ່ວຍພີ່ນ້ອງຊາຍຍິງເຫຼົ່ານີ້ໃຫ້ມີຄວາມກ້າຫານແລະຮັກສາຄວາມພັກດີຕໍ່ພະອົງ.—ເອເຟດ 6:19, 20
19 ເມື່ອອະວະສານໃກ້ເຂົ້າມາ ເຮົາສາມາດຄາດໝາຍໄດ້ວ່າລັດຖະບານຕ່າງໆຈະກົດດັນເຮົາຫຼາຍຂຶ້ນຕື່ມອີກໃຫ້ເຂົ້າຂ້າງຝ່າຍໃດຝ່າຍໃດ. ດ້ວຍເຫດນີ້ຈຶ່ງເປັນເລື່ອງສຳຄັນສຳລັບເຮົາທີ່ຈະກຽມຕົວໃຫ້ພ້ອມຕັ້ງແຕ່ຕອນນີ້ເພື່ອຮັກສາຄວາມເປັນກາງໃນໂລກທີ່ແບ່ງແຍກນີ້!
^ [1] (ຂໍ້ 1) ພະເຍຊູກຳລັງເວົ້າເຖິງລັດຖະບານເມື່ອພະອົງກ່າວເຖິງເຊຊາ. ໃນສະໄໝນັ້ນ ເຊຊາເປັນຜູ້ປົກຄອງແລະເປັນມະນຸດທີ່ມີສິດອຳນາດສູງສຸດ.
^ [2] (ຂໍ້ 17) ໃຫ້ເບິ່ງປຶ້ມ Jehovah’s Witnesses—Proclaimers of God’s Kingdom ໜ້າ 662 ແລະປຶ້ມລາຊະອານາຈັກຂອງພະເຈົ້າປົກຄອງແລ້ວ! ໃນຂອບ “ລາວຕາຍເພື່ອເປັນກຽດແກ່ພະເຈົ້າ” ໜ້າ 150 (ພາສາໄທ).
