ເຈົ້າຮູ້ບໍ?
ພວກໂຣມອະນຸຍາດໃຫ້ຝັງສົບຂອງຜູ້ທີ່ຖືກປະຫານຊີວິດຢູ່ເທິງເສົາທໍລະມານແບບຄົນທົ່ວໄປບໍຄືກັບກໍລະນີຂອງພະເຢຊູ?
ຫຼາຍຄົນຮູ້ວ່າພະເຢຊູຖືກຄຶງຢູ່ເທິງເສົາທໍລະມານຢູ່ລະຫວ່າງນັກໂທດ 2 ຄົນ. (ມທ. 27:35-38) ແຕ່ມີບາງຄົນບອກວ່າ ຄຳພີໄບເບິນເວົ້າບໍ່ຖືກກ່ຽວກັບການຝັງສົບຂອງພະເຢຊູໃນອຸໂມງ.—ມຣກ. 15:42-46
ນັກວິຈານບາງຄົນທີ່ເວົ້າກ່ຽວກັບປຶ້ມທີ່ຂຽນເລື່ອງຊີວິດຂອງພະເຢຊູບໍ່ເຊື່ອວ່າ ຜູ້ທີ່ຖືກປະຫານຊີວິດເທິງເສົາທໍລະມານຈະໄດ້ຮັບອະນຸຍາດໃຫ້ຝັງສົບຢູ່ໃນອຸໂມງຢ່າງມີກຽດຄືກັບຄົນທົ່ວໄປ ເພາະເຂົາເຈົ້າເຊື່ອວ່ານັກໂທດເຫຼົ່ານີ້ຈະຕ້ອງຖືກປະຕິບັດຕ່າງຈາກຄົນທົ່ວໄປ. ນັກຂຽນຄົນໜຶ່ງທີ່ຊື່ ອາຣິເອນ ຊາບາໄດ້ຂຽນໄວ້ໃນວາລະສານສະມິດໂຊນຽນ ວ່າ: “ການຖືກຄຶງໄວ້ທີ່ໄມ້ກາງເຂນເປັນການລົງໂທດຂອງຄົນທີ່ເປັນຕາໜ້າລັງກຽດທີ່ສຸດໃນສັງຄົມ. ແລະຜູ້ຊ່ຽວຊານບາງຄົນລົງຄວາມເຫັນວ່າ ພວກໂຣມຈະບໍ່ໃຫ້ກຽດນັກໂທດເຫຼົ່ານັ້ນໂດຍບໍ່ຝັງສົບເຂົາເຈົ້າຄືກັບຄົນທົ່ວໄປ.” ພວກໂຣມຢາກເຮັດໃຫ້ສົບຂອງນັກໂທດເຫຼົ່ານີ້ຖືກອັບອາຍຫຼາຍທີ່ສຸດເທົ່າທີ່ເປັນໄປໄດ້. ດັ່ງນັ້ນ ສົບຂອງເຂົາເຈົ້າຈຶ່ງຖືກປະໄວ້ຢູ່ເທິງເສົາທໍລະມານເພື່ອໃຫ້ສັດປ່າມາກັດກິນແລະສ່ວນທີ່ເຫຼືອຂອງຊາກສົບນັ້ນກໍຈະເອົາໄປໂຍນລົງຂຸມຝັງສົບລວມກັບນັກໂທດຄົນອື່ນໆ.
ນັກບູຮານຄະດີໄດ້ຄົ້ນພົບສິ່ງທີ່ເກີດຂຶ້ນກັບຄົນຢິວບາງຄົນທີ່ຖືກປະຫານຢູ່ເທິງເສົາທໍລະມານ. ໃນປີ 1968 ມີການຄົ້ນພົບກະດູກຂອງຜູ້ຊາຍຄົນໜຶ່ງທີ່ຖືກປະຫານຊີວິດໃນສະຕະວັດທຳອິດ. ເຂົາເຈົ້າພົບກະດູກນັ້ນຢູ່ໃນອຸໂມງຝັງສົບຂອງຄອບຄົວຄົນຢິວທີ່ຢູ່ໃກ້ກັບເມືອງເຢຣູຊາເລັມ. ຢູ່ໃນອຸໂມງຝັງສົບນັ້ນເຂົາເຈົ້າໄດ້ພົບກ່ອງເກັບກະດູກ ເຊິ່ງມີກະດູກສົ້ນຕີນທີ່ມີເຫຼັກຕະປູຍາວ 11,5 ຊັງຕີແມັດສຽບຢູ່. ນັກຂຽນທີ່ຊື່ ອາຣິເອນ ຊາບາບອກວ່າ: “ສົ້ນຕີນນີ້ແມ່ນສົ້ນຕີນຂອງຜູ້ຊາຍທີ່ຊື່ເຢໂຮຊານັນ. ເລື່ອງນີ້ໄດ້ຊ່ວຍແກ້ໄຂຂໍ້ຂັດແຍ່ງເລື່ອງການຝັງສົບຂອງພະເຢຊູທີ່ຢູ່ໃນປຶ້ມທີ່ຂຽນກ່ຽວກັບຊີວິດຂອງພະເຢຊູ. ການຄົ້ນພົບກະດູກສົ້ນຕີນຂອງເຢໂຮຊານັນສະແດງໃຫ້ເຫັນວ່າ ພວກໂຣມອະນຸຍາດໃຫ້ນັກໂທດຖືກຝັງຢ່າງມີກຽດຢູ່ອຸໂມງຝັງສົບຂອງຄອບຄົວຊາວຢິວໄດ້.”
ເຖິງວ່າຫຼາຍຄົນຈະມີຄວາມຄິດທີ່ຕ່າງກັນກ່ຽວກັບຕຳແໜ່ງທີ່ພະເຢຊູຖືກຄຶງຢູ່ເທິງເສົາເມື່ອເຫັນກະດູກສົ້ນຕີນຂອງເຢໂຮຊານັນ ແຕ່ສິ່ງທີ່ເຮົາໝັ້ນໃຈກໍຄືນັກໂທດບາງຄົນໃນສະໄໝຂອງພະເຢຊູໄດ້ຮັບການຝັງຢ່າງມີກຽດແລະບໍ່ໄດ້ຖືກໂຍນລົງຂຸມ ຝັງສົບລວມກັບຊາກສົບຂອງນັກໂທດຄົນອື່ນໆ. ຫຼັກຖານທາງບູຮານຄະດີສະແດງໃຫ້ເຫັນວ່າສິ່ງທີ່ຄຳພີໄບເບິນເວົ້າກ່ຽວກັບການຝັງສົບຂອງພະເຢຊູໃນອຸໂມງເຊື່ອຖືໄດ້.
ແລະທີ່ສຳຄັນກວ່ານັ້ນກໍຄືພະເຢໂຫວາໄດ້ບອກລ່ວງໜ້າໄວ້ແລ້ວວ່າ ພະເຢຊູຈະຖືກຝັງຮ່ວມກັບຄົນຮັ່ງມີ ແລະບໍ່ມີໃຜຈະຂັດຂວາງຄຳເວົ້າຂອງພະເຈົ້າບໍ່ໃຫ້ສຳເລັດເປັນຈິງໄດ້.—ເອຊາ. 53:9; 55:11
