Zazi leliñwi mwa tolopo ya Alberta, kwa Canada, nekubatile hahulu mi nekunani moya omuñata. Muuna yomuñwi wa libizo la Bob, namatisa mota yahae ka lubilo lolutuna hahulu kuli mane liwili la mota yahae la kwamulaho, la kwa nzohoto, lapanca ka sipundumukela. Bo Bob nebasika lemuha zeneezahezi, mi bazwelapili kumatisa mota yabona ka likilomita zeketalizoho, kuliba kwa ndu yabona.

 Bo Bob nebañozi liñolo lene liya kwa Ndu ya Mubuso ya Lipaki za Jehova kutalusa zeneezahezi hamulaho wa fo. Bali: “Mikulwani baketalizoho bane bali mwa mota yeñwi nebatilo zamaela kwatuko ni na, mi hase bafitile fakaufi, bakwalulula windo ya mota yabona mi banitaluseza kuli liwili la mota yaka nelipancize. Kaufelaa luna lwayemisa limota kwatuko a mukwakwa, mi banitaluseza kuli nebaka nitusa kucinca liwili leo. Niteñi, nenisa zibi haiba neninani liwili leliñwi kamba jeke ya kunanulisa mota. Ka nako yene niinzi mwa sipula saka sa mawili, mikulwani bao bakena mwatasaa mota yaka mi bafumana mwateñi liwili ni jeke. Bazwisa liwili lene lipancize ni kubeya kwateñi lisili. Zazi leo, nekubata hahulu kuli mane silami nesinela. Nihaike kuli mikulwani bao nebaapezi hande, neba nitusize kueza musebezi wo, mi senizwelapili mwa musipili waka. Nenisike nakona kueza musebezi wo ninosi.

 “Niitumela hahulu kwa mikulwani baketalizoho bale babali Lipaki za Jehova bane banitusize. Nebali mwa sibaka seo bakeñisa kuli nebasweli kukutaza fa mandu a batu. Kusina kukakanya, mikulwani bao, basebelisanga litaba zebasweli kuluta batu babañwi. Kambe nebasika nitusa, kambe nenikeni mwa butata luli, mi nisaitumela luli ku bona. Nenisika libelela kuli nenika kopana ni mikulwani babacwalo babanani sishemo, ili bane baitatezi kunitusa hane niziyelehile.”