Jobo 32:1-22
32 Cwale baana babalaalu bao batuhela kulika kualaba Jobo, kakuli naaikolwisa kuli ki yalukile.*+
2 Kono Elihu mwanaa Barakele wa kwa Buzi+ wa lubasi lwa Rami naahalifile hahulu. Buhali bwahae bwatukela Jobo bakeñisa kuli naalika kubonisa kuli ulukile kufita Mulimu.+
3 Hape naahalifisizwe hahulu ki balikani ba Jobo babalaalu bakeñisa kuli nebasika fumana kalabo kono nebabonisize kuli Mulimu umaswe.+
4 Elihu naalibelezi kuli aalabe Jobo, kakuli bao neli babahulu ku yena.+
5 Elihu habona kuli baana babalaalu bao nebasina sa kualaba, buhali bwahae bwaekezeha.
6 Cwale Elihu mwanaa Barakele wa kwa Buzi akala kubulela ali:
“Na ni mwanana*Mi mina mu babahulu.+
Cwale neni mikuteka ka kusabulela sesiñwi,+Mi nenisika ba ni bundume bwa kumibulelela zeniziba.
7 Neniipulelezi kuli: ‘Babahulu* babulele,Mi lilimo zeñata lizibahaze butali.’
8 Kono moya oinzi kwa batu,Moya wabulula Yamaata Kaufela, ki ona ofa batu kutwisiso.+
9 Buhulu ka ili bona feela habufi* mutu butali,Mi babahulu haki bona feela babautwisisa sesilukile.+
10 Cwale nili: ‘Hamu niteeleze,Mi ni na nika mibulelela zeniziba.’
11 Hamubone! Nenilibelezi manzwi amina;Nenisweli kuteeleza kwa mihupulo yamina+Hane musweli kubata za kubulela.+
12 Neni miteelelize ka tokomelo,Kono ku mina hakuna yakonile kubonisa Jobo bufosi bwahae*Kamba yafile kalabo kwa manzwi anaaikemela ka ona.
13 Cwale musike mwali: ‘Lufumani butali;Ki Mulimu yamuhanyeza, isiñi mutu.’
14 Naasalwanisi na ka litaba zanaabulela,Cwale hanina kumualaba ka kuitusisa mabaka emufa.
15 Bakakamalile, habasana likalabo;Habasana za kubulela.
16 Nilibelezi, kono habasa bulela;Bayemi feela fani, basina kalabo yeñwi.
17 Cwale nikafa kalabo ni na;Nikabulela zeniziba ni na,
18 Kakuli ninani manzwi amañata;Moya oinzi ku na unihapeleza kubulela.
19 Mba yaka itezi inge waine yesina fa kubuyelela,Inge mikotana ya matalo ya waine yeminca yetuha ipazuha.+
20 Munituhele nibulele, kuli niikutwe kuimuluha!
Nikaatumulusa mulomo waka kuli nife kalabo.
21 Hanina kuketulula mutu;+Mi hanina kucolaula mutu,*
22 Kakuli hanizibi kucolaula mutu;Hane nikaeza cwalo, Mubupi waka naaka nitimeza kapili-pili.
Litaluso ze kwatasi
^ Kamba “kakuli naaipona kuba yalukile.”
^ Linzwi ka linzwi, “yomunyinyani kwa mazazi.”
^ Linzwi ka linzwi, “Ba mazazi.”
^ Kamba “Mazazi amañata ka ili ona feela hafi.”
^ Kamba “kunyaza Jobo.”
^ Kamba “hanina kufa mutu lilumbatina la kumububeka.”
