Jesu usali mwa Jerusalema la Sabata. Hanze azamaya ni balutiwa bahae mwa muleneñi, babona muuna yanaapepilwe ali sibofu. Balutiwa babuza Jesu, bali: “Rabbi, ki mañi yanaaezize sibi kuli mutu yo apepwe ali sibofu, kana ki yena kamba ki bashemi bahae?”—Joani 9:2.

Balutiwa baziba kuli muuna yo naasina moyo pili asika pepwa kale, kono basweli kunahana ka za haiba mutu wakona kueza sibi inze asali mwa mba ya mahe. Jesu ualaba kuli: “Hakuna yanaaezize sibi, ibe yo kamba bashemi bahae, kono nekuezahezi cwalo kuli misebezi ya Mulimu ikone kubonahala ka yena.” (Joani 9:3) Ka mukwa ocwalo, muuna yo kamba bashemi bahae nebasika eza sibi sesitahisize kuli abe sibofu. Kono bakeñisa sibi sa Adama, batu kaufela bapepiwanga basika petahala mi batahelwanga ki lika zecwale ka bubofu. Kono bubofu bwa muuna yo bufa Jesu kolo yakubonisa kuli upeta misebezi ya Mulimu, sina mwanaaezelize ka linako zeñwi kwamulaho hanaafolisize batu bane bakula.

Jesu ubonisa kuli utokwa kueza misebezi yeo kapili-pili. Uli: “Lulukela kueza misebezi ya yanilumile hakusali musihali; busihu bwataha fokusina mutu yakona kusebeza. Hanisainzi mwa lifasi, ni liseli la lifasi.” (Joani 9:4, 5) Ki cwalo, Jesu utuha aba mwa lififi la libita ili mo haana kueza nto niyekana. Ka nako ye, ki yena liseli la lifasi.

Kono kana Jesu ukafolisa muuna yo, mi haiba ki cwalo, uka mufolisa cwañi? Jesu ukwela mati fafasi mi uakopanya ni mubu kupanga sileze. Ulamba sileze seo fa meeto a muuna yo ni kumubulelela kuli: “Zamaya uyo tapa mwa kasa ka Siloe.” (Joani 9:7) Muuna yo ueza cwalo. Hasatapile, ukalisa kubona! Munahane feela tabo yanani yona hakalisa kubona lwapili mwa bupilo bwahae!

Batu bane baziba muuna yo kuli ki sibofu bakomoka hahulu. Babuza kuli: “Kana yo haki yena mutu yanaainanga inzaa kupelela?” Babañwi baalaba, bali: “Ki yena.” Kono babañwi habalumeli taba yeo, mi bali: “Batili, kono uswana feela ni yena.” Muuna yo uikalabela kuli: “Ki na.”—Joani 9:8, 9.

Nihakulicwalo, bamubuza kuli: “Cwale meeto ahao akwaluluhile cwañi he?” Ualaba kuli: “Mutu yabizwa Jesu naaezize sileze ni kunilamba sona fa meeto mi ali ku na: ‘Zamaya kwa Siloe mi uyo tapa.’ Kiha niya, nayo tapa, mi nakalisa kubona.” Cwale bamubuza kuli: “Mutu yo ukai?” Mukupi ualaba kuli: “Hanizibi.”—Joani 9:10-12.

Batu baisa muuna yo kwa Bafalisi, ili bao ni bona babata kuziba mokutezi kuli muuna yo akalise kubona. Ubabulelela kuli: “Naanilambile sileze fa meeto, natapa mi nabona.” Kaswanelo, kubonahala kuli Bafalisi baswanela kutaba hamoho ni mukupi yo ya folisizwe. Kono babañwi  ku bona banyaza Jesu. Babulela kuli: “Mutu yo hazwi ku Mulimu, kakuli hamameli Sabata.” Niteñi babañwi bali: “Mutu wa muezalibi ukona kueza cwañi limakazo za mufuta wo?” (Joani 9:15, 16) Ka mukwa ocwalo, bafapahana mwahalaa bona.

Bakeñisa kusalumelelana ko, babuza muuna yafolisizwe yo, bali: “Wena uliñi ka zahae, haubona naakwaluluzi meeto ahao?” Muuna yo haakakanyi Jesu mi ualaba kuli: “Ki mupolofita.”—Joani 9:17.

Majuda habalumeli taba ye. Mwendi banahana kuli Jesu ulumelelani ni muuna yo kuli bapume batu. Baatula kuli nzila ya kutatulula butata bo ka yona ki kuyo buza bashemi ba muuna yo, haiba luli naali sibofu.