Ka kuba mutu yapetahalile, Jesu naasa ipumanangi mwa masitapilu mi naasabilaelangi sina batu babañwi. Kono naashwelanga batu makeke. Naaitatelanga kuezeza batu lika zebonahala kuli litaata kulieza. Kaniti, kuba ni mufelañeke neku mususuelize kutusa batu. Munyakisise mitala yefumaneha mwa Likauhanyo 32, 37, 57, 99.

Batu kaufela ibe kuli ki banana kamba ki babahulu nebalukuluhile kuatumela Jesu bakeñisa kuli naasa ipatehisangi ni kuikutwa kuba wa butokwa hahulu. Hase balemuhile kuli Jesu wabaisa pilu, batu bakalisa kulukuluha habali ni yena. Kuli mulemuhe taba yeo, mubone Likauhanyo 25, 27, 95.

Jesu kamita naalapelanga ku Ndatahe kwa mukunda mane nihanaali ni balapeli baniti. Naalapelanga mwa miinelo yemiñata, isiñi feela ka nako ya lico. Naalapelanga ku Ndatahe kuitumela ku yena, kumukanyisa, ni kukupa ketelelo ku yena pili asika eza kale likatulo zetuna. Munyakisise mitala yefumaneha mwa Likauhanyo 24, 34, 91, 122, 123.

Ka linako zeñwi, naatokwanga kuikatulusa ni kuishuumusa, kono Jesu naaitusisanga nako yahae kutusa babañwi. Naasina buitati. Ni mwa muinelo wo, ulutomezi mutala wolukona kulikanyisa. Muitute mo mutala wo uboniselizwe mwa Likauhanyo 19, 41, 52.

Jesu naasalutangi feela batu za kuswalela babañwi, kono naabonisize kuli waswalela ka mwanaasebelisanezi ni balutiwa bahae ni batu babañwi. Munahanisise mitala yefumaneha mwa Likauhanyo 26, 40, 64, 85, 131.

Nekupolofitilwe kuli Majuda babañata bakahana kuamuhela Mesia ni kuli naakabulaiwa ki lila zahae. Ka mukwa ocwalo, Jesu naakakona kuezeza feela batu lika zenyinyani. Niteñi naatukufalezwi bulapeli bwa niti. Naatomile mutala wa tukufalelo kwa balateleli bahae kaufela babanyandiswa ni kulwaniswa. Mubone Likauhanyo 16, 72, 103.

Jesu neli yomutuna kufita batu babasika petahala ka linzila zeñata zecwale ka, zibo ni butali. Bakeñisa kuli neli mutu yapetahalile, naanani mubili ni munahano woiketile kufita batu banaali ni bona kaufela. Kono naasebeleza batu babañwi ka buikokobezo. Mwakona kuituta ka za taba ye mwa Likauhanyo 10, 62, 66, 94, 116.

Jesu naazwezipili kuba ni pilu-telele kwa baapositola bahae ni kwa batu babañwi hane bapalezwi kumulikanyisa ni kusebelisa zanaa baluta. Nakuta-kutezi kubaluta lituto zene batokwa ilikuli bakone kusutelela ku Jehova. Munyakisise mitala yebonisa pilu-telele ya Jesu, yefumaneha mwa Likauhanyo 74, 98, 118, 135.