Hamulaho wa nako kuzwa fabonahalela Jesu kwa baapositola bahae, Pitrosi aya kwa Liwate la Galilea kwa kuyamba. Tomasi, Jakobo, Joani, ni balutiwa babañwi baya ni yena. Bayamba busihu kaufela kono nebasika fumana litapi.

Habusa kakusasana, babona muuna yayemi fa likamba. Ababiza inze bali mwa mezi, ali: ‘Kunani litapi zemusweli?’ Kihaa bali ku yena: ‘Hakuna!’ Muuna yo ali ku bona: “Munepele kanyandi ku la bulyo la sisepe mi mukafumana.” Hane baezize zanaa bataluselize, kanyandi katala litapi kuli mane bapalelwa kukahohela mwa sisepe. Joani alemuha kapili-pili kuli muuna yo neli Jesu, mi ali: “Ki Mulena!” Honafo feela, Pitrosi atulela mwa mezi ni kutapa kuya fa likamba. Balutiwa babañwi bamulatelela mwa sisepe.

 Habafitile fa likamba, babona mulilo ni litapi fateñi ni sinkwa. Jesu ababulelela kuli batise litapi zeñwi kuli libesiwe ilikuli baekeze kwa sico. Cwale ali ku bona: ‘Hamutahe muto kushuka.’

Hase bafelize kuca, Jesu abuza Pitrosi kuli: ‘Kana unilata hahulu kufita kuyamba litapi?’ Pitrosi kihaa li: ‘Kucwalo, Mulena, waziba kuli nakulata.’ Jesu ali ku yena: ‘Ufepe lingunyana zaka.’ Jesu hape amubuza kuli: ‘Pitrosi, kana wanilata?’ Pitrosi kihaa li: ‘Mulena, waziba kuli nakulata.’ Jesu kihaa li: “Fepa lingunyana zaka.” Jesu amubuza hape lwabulaalu. Pitrosi aikutwa hahulu bumaswe. Mi ali : ‘Mulena, uziba lika kaufela. Waziba kuli nakulata.’ Jesu kihaa li: “Fepa lingunyana zaka.” Cwale kihaa li ku Pitrosi: “Uzwelepili kunilatelela.”