Muisilaele yomuñwi yabizwa Elikana naanyezi basali bababeli, ili Anna ni Penina, kono naalata hahulu Anna. Penina naasheununanga Anna nako kaufela bakeñisa kuli Anna naasina bana, kono Penina yena naanani bana babañata. Silimo ni silimo, Elikana naaisanga lubasi lwahae kuyo lapela kwa tabernakele mwa Shilo. Zazi leliñwi hane bali kwateñi, Elikana alemuha kuli musalaa hae yanaalata hahulu, yena Anna naalembwalile hahulu. Kihaa li ku yena: ‘Usike walila Anna. Na niteñi. Nakulata.’

Hasamulaho, Anna aya kwa sibaka sesiñwi kuyo lapela. Alila hahulu inze akupa Jehova kuli amutuse. Mi asepisa kuli: ‘Jehova, haiba unifa mwana, nika kufa yena mi uka kusebeleza mwa bupilo bwahae kaufela.’

Muprisita Yapahami Eli abona Anna inze asikoka, mi naanahana kuli naakozwi. Anna aalaba kuli: ‘Batili, mulenaaka, hanisika nwa bucwala. Ninani butata bobutuna, mi nisweli kutaluseza Jehova ka za teñi.’ Eli alemuha kuli ufosize, mi ali ku Anna: ‘Haike Mulimu akufe zeubata.’ Anna aikutwa hande mi hasamulaho aya kwa sibaka sisili. Kusika fita kale silimo,  Anna apepa mwana wamushimani mi amubeya libizo la Samuele. Munahane feela tabo yanaabile ni yona Anna!

Anna naasika libala sepiso yahae ku Jehova. Samuele asakwa feela, Anna amuisa kuyo sebeleza kwa tabernakele. Kihaa li ku Eli: ‘Yo ki yena mwana yene nikupa. Mwa mazazi kaufela a bupilo bwahae nimufa ku Jehova.’ Silimo ni silimo, Elikana ni Anna nebapotelanga Samuele mi neba muisezanga kotinyana yesina mazoho. Jehova afa Anna bana babashimani babalaalu ni bana babasizana bababeli.