Hamulaho wa Davida kubulaya Goliati, Mulena Saule afa Davida buikalabelo bwa kuba muzamaisi wa mpi yahae. Davida naatuzi lindwa zeñata, mi azibahala hahulu. Davida hanaakutanga kuzwa kwa ndwa, basali nebatahanga inze babina ni kuopela kuli: ‘Saule ubulaile babaeza likiti, mi Davida ubulaile babaeza likiti zemashumi-shumi!’ Saule autwela muna Davida mi abata kumubulaya.

Davida naakona kuliza hande harepa. Zazi leliñwi Davida hanaanze alizeza Saule harepa, mulena amuposa lilumo. Davida apima lilumo lisika fita kale ku yena, mi lilumo layo taba mwa limota. Hamulaho wa fo, Saule naabatile kubulaya Davida hañata-ñata. Kwa mafelelezo, Davida abaleha mi ayo ipata mwa lihalaupa.

Saule kihaa nga mpi ya baana ba 3,000 mi aya kuyo bata Davida. Saule akena mwa  mukoti mwanaa ipatile Davida ni baana bahae. Baana bahae kihaa ba mushobotela bali: ‘Ye ki yona kolo ya kuli ubulaye Saule.’ Davida kiha hohoba kuliba ku Saule mi ayo puma siemba kwa koti ya mulena. Saule naasika lemuha. Hasamulaho, Davida aikutwa hahulu bumaswe kuli naasika bonisa likute ku mulena yanaaketilwe ki Jehova. Naasika lumeleza baana bahae kulwanisa Saule. Mane naahuwelelize ku Saule, ka kubulela kuli naaka mubulaya kambe naalata. Kana Saule naaka cinca mubonelo wahae wa kubata kulwanisa Davida?

Batili. Saule naazwezipili kuzuma Davida. Zazi leliñwi busihu, Davida ni muhabo yena Abishai bakena mwa mafulo a Saule ka kusalemuseha. Nihaiba Abinere, yena mulibeleli wa Saule, naalobezi. Abishai kihaa li: ‘Ye ki kolo yaluna! Nituhele nimubulaye.’ Davida kihaa alaba kuli: ‘Jehova ki yena yaka mubulaya. Haluunge feela lilumo ni nkwana ya mezi mi luye.’

Davida apahama lilundu lene lili fakaufi kuli abone hande mafulo a Saule. Ahuwa kuli: ‘Abinere, ki kabakalañi hausika sileleza mulenaa hao? Nkwana ni lilumo za Saule liinzi kai?’ Saule aziba kuli neli linzwi la Davida mi ali: ‘Neuka kona kunibulaya, kono hausika eza cwalo. Naaziba kuli ukaba mulena yatatama wa Isilaele.’ Saule akutela kwa ndu yahae. Kono nesi mutu kaufela mwa lubasi lwa Saule yanaatoile Davida.