NAHA ya Liechtenstein ki yeñwi ya linaha zenyinyani hahulu mwa lifasi mi ifumaneha mwa sibaka sa malundu sesimwahalaa naha ya Switzerland ni ya Austria. Macelt, Marhaetian, Maroma, ni Malemanni, sebapilile mwa sibaka seo ka lilimo zeñata. Kacenu, ibato ba 67 pesenti ya batu babapila mwa naha ya Liechtenstein basimuluha kwa lusika lwa batu bababulela puo ya Sialemanni, ili bane kalile kupila mwa sibaka seo ibato ba lilimo ze 1,500 kwamulaho.

Sijelemani ki yona puo yeitusiswa hahulu mwa naha ya Liechtenstein, nihaike kuli kunani lipuo zeñwi zeñata zebulelwa mwa minzi yemiñwi. Lico zeciwa hahulu mwa Liechtenstein ki Tüarka-Rebel, yepangiwa fa bubeke bwa mbonyi, ni Käsknöpfle, ili sico sesiñwi sesipangiwa fa fulaulo yekopanyizwe ni mafula a zwa kwa mabisi.

Batu babapotelanga naha yeo baikolanga kubuha malundu a litwa, misindi yenani bucwañi bobutala, masimu a likota za veine, ni limela zeñwi zeshutana-shutunana. Ka mutala, mwa naha yenyinyani hahulu ye ya malundu, kunani mifuta yebato ba 50 ya limela za mwa mushitu. Hape kunani limiziyamu, miyaho ya mabapalelo, ni miyaho mokupangelwa waine. Kacwalo, ka nako ya mbumbi ni ya maliha kubanga ni bapoti babañata babayo potelanga naha yeo.

 Lipaki za Jehova sebabile mwa naha ya Liechtenstein kuzwa feela mwa lilimo za ma 1920. Ka nako yacwale, Lipaki za Jehova bababato ba 90 basweli kuluta Bibele kwa batu ba mwa naha yeo ni babazwa kwa linaha zeñwi.