SIKUKA SA MWA BIBELE: “Milelo ya babasebeza ka taata itahisa kuli zabona likonde, kono batu kaufela babaeza lika ka kayeye bakaba babotana.”—Liproverbia 21:5.

ZESITALUSA SIKUKA: Haiba mulela kueza nto yeñwi, mubone teñi kuli mwaeza nto yeo. Kacwalo, munyakisisange zemubata kuleka musika ya kale kwa kuleka. Muhupule kuli hamukoni kuleka lika kaufela zemubata. Kacwalo, muitusise hande masheleñi amina.

ZEMUKONA KUEZA:

• Mulekange feela lika zene mulelile kuleka. Muñolange mukoloko wa lika kaufela zemubata kuleka, mi mubeye lika zeo mwa likalulo. Kihona mukañola masheleñi emuka itusisa kwa kuleka sesiñwi ni sesiñwi sesi fa mukoloko wo. Haiba muitusisa masheleñi amañata kwa kuleka nto yeñwi, muunge masheleñi ane mubata kuleka nto yeñwi kuli muyolise masheleñi ao. Ka mutala, haiba mubata kuleka nto yeñwi mi nto yeo itulile hahulu kushutana ni mone munahanela, muunge kwa masheleñi ane mubulukezi kuleka nto yeñwi yesi ya butokwa hahulu kuli muleke nto yeo.

• Muambuke likoloti. Haiba kwakonahala, musike mwakolotanga. Kono mubulukange masheleñi akamikonisa kuleka lika zemubata. Haiba muitusisanga kadi ya kwa panga kwa kukolota, mubone teñi kuli mwalifa sikoloti samina kaufela kweli ni kweli ilikuli sikoloti samina sisike saekezeha. Haiba munani sikoloti, mulukise nzila yemuka lifa ka yona sikoloti seo, mi mueze momulukiselize.

  Patisiso yeñwi ibonisa kuli batu babaitusisanga kadi ya kwa panga ya kukolotisa, bakolotanga  hahulu lika zeñata. Kacwalo, haiba muitusisanga kadi yeo ni mina, muitusisange yona hande.

SIKUKA SA MWA BIBELE: “Yabuzwa haakekeli ka nako ya maliha, mi ukakupelela ka nako ya kutulo haasike aba ni sesiñwi.”—Liproverbia 20:4.

ZESITALUSA SIKUKA: Buzwa bwakona kutahisa kuli mutu abe mubotana. Kacwalo, mubeleke ka taata mi muitusise hande masheleñi amina ilikuli kwapili mube ni lika zemutokwa.

ZEMUKONA KUEZA:

• Mubeleke ka taata. Hamubeleka ka taata ni kuba mutu yaitingwa fa musebezi, babelekisi bamina bakamilata mi habana kumizwisa musebezi.

• Musepahale. Musike mwauzweza babelekisi bamina. Kusasepahala kwakona kusinya libizo lamina mi kukona kutahisa kuli kumibele taata kufumana musebezi omuñwi hape.

• Muambuke mukwañuli. Kuba ni mubonelo ofosahalile ka za masheleñi kukona kutahisa kuli musike mwaba ni buikangulo bobunde, mi hape kukona kutahisa kuli silikani samina ni babañwi sisinyehe. Muhupule kuli masheleñi haki yona nto ya butokwa hahulu mwa bupilo.

MUSIKE MWASINYEZA NAKO KAMBA MASHELEÑI AMINA KWA LIKA ZESINA TUSO.

“Cakolwa ni yaca hahulu, bakakenelwa ki bubotana, mi kuozela kukaapalisa mutu manjabila.”—LIPROVERBIA 23:21.

MUSIKE MWABILAEZWA HAHULU KI MASHELEÑI.

“Mutuhele kubilaela za bupilo bwamina, ka zemuka ca kamba zemuka nwa kamba kubilaela za mibili yamina, ka zemuka apala.”—MATEU 6:25.

MUAMBUKE MUNA.

“Mutu yanani muna ubata hahulu bufumu, asazibi kuli bubotana buka mukenela.”—LIPROVERBIA 28:22.