SETEFANI naayemi fapilaa sikwata sa baana babasituhu. Baana bao ba 71 neli baatuli mwa kuta ya Sanhedrini, mi nebanani maata amatuna kabakala kuli kuta yeo neli yona kuta yetuna mwa Isilaele. Nebakopanyizwe ki Kayafa Muprisita Yapahami, ili yena yanaatalimile taba ya Jesu hanaaatulezwi lifu likweli lisikai kwamulaho. (Mat. 26:57, 59; Lik. 6:8-12) Hane banze batisa lipaki za buhata alimuñwi ka alimuñwi, balemuha nto yeñwi yenekomokisa ka za Setefani—pata yahae neibonahala “inge pata ya lingeloi.”—Lik. 6:13-15.

Ki lika mañi zenetusize mulutiwa Setefani kusasaba hanaali mwa muinelo osabisa wo? Pili Setefani asika tiswa kale mwa kuta yetuna ya Sanhedrini, naapatehile hahulu mwa musebezi wanaafilwe mi naatusiwa ki moya wa Mulimu. (Lik. 6:3-7) Hanaazekiswa, moya wa Mulimu neu muomba-ombile ni kumuhupulisa litaba zeñwi. (Joa. 14:16, litaluso ze kwatasi) Setefani hanaanzaa icemela ka bundume, moya wa Mulimu neu mutusize kuhupula litaba za mwa Mañolo A Siheberu ze 20 kamba kufitelela, sina mokuboniselizwe kwa liñolo la Likezo kauhanyo 7. (Joa. 14:26) Kono tumelo ya Setefani hape neitiisizwe hahulu hanaaboni Jesu mwa pono inze ayemi kwa lizoho la Mulimu la bulyo.—Lik. 7:54-56, 59, 60.

Nako yeñwi, ni luna lwakona kubembiwa ni kunyandiswa. (Joa. 15:20) Haiba luzwelapili kubala Linzwi la Mulimu kamita ni kutukufalelwa mwa bukombwa, moya wa Jehova uka lutusa mwa bupilo bwaluna. Hape lukaba ni maata a kuitiisa halulwaniswa, mi lukazwelapili kuba ni kozo ya mwa munahano.—1 Pit. 4:12-14.