1. Ki lika mañi zetahanga mwa munahano wamina hamunahanisisa ka za Jehova?

 KANA mukile mwalika kunahana mwainezi Jehova? Ki lika mañi zetahanga mwa munahano wamina hamulapela ku yena? Nihaike kuli halukoni kubona Jehova, Bibele imutalusa ka linzila zeshutana-shutana. Jehova ubizwa kuli ki “ki lizazi mi ki tebe” ni kuli ki “mulilo ociseleza.” (Samu 84:11; Maheb. 12:29) Ezekiele naatalusize Jehova mwa pono kuli uswana sina licwe la safiro, sipi yebenya, ni sina liseli la nambwamutalati. (Ezek. 1:​26-28) Lika zeñwi zeitusisizwe kwa kutalusa Jehova likona kutahisa kuli lumukuteke hahulu kamba mane kukenelwa ki sabo.

2. Ki lika mañi zekona kupaleliswa batu babañwi kusutelela ku Jehova?

² Bakeñisa kuli halukoni kubona Jehova, kukona kulubela taata kulumela kuli walulata. Babañwi banahana kuli Jehova haakoni kubalata bakeñisa zeneezahezi ku bona kwamulaho. Mwendi bo ndataa bona nebasika babonisa lilato. Jehova wautwisisa moluikutwela mi waziba molukona kuamelwa ki maikuto ao. Kuli alutuse, uitusisa Bibele kulutaluseza kuli ki Mulimu yanani lilato lelituna.

3. Ki kabakalañi haluswanela kunyakisisa ka tokomelo ka za lilato lanani lona Jehova?

³ Lilato ki lona linzwi lelitalusa hande mwainezi Jehova. (1 Joa. 4:8) Jehova ki lilato. Lika kaufela zaezanga uliezanga kabakala lilato. Lilato la Mulimu ki lelituna hahulu kuli mane ulibonisa ni kwa batu babasa mulati. (Mat. 5:​44, 45) Mwa taba ye, lukanyakisisa hahulu ka za Jehova ni lilato lahae. Haiba luituta hahulu ka za Mulimu waluna, luka mulata hahulu.

 JEHOVA ULULATA HAHULU

4. Lilato lelituna lanani lona Jehova litahisa kuli muikutwe cwañi? (Mubone ni siswaniso.)

⁴ “Jehova unani lilato lelituna.” (Jak. 5:11) Mwa Bibele, uibapanya ku me yanani lilato. (Isa. 66:​12, 13) Mueze inge bababona me yababalela mwanaa hae ka lilato. Wamucikisa fa mañwele ahae mi uambola ni yena ka musa ni ka kuwa pilu. Haiba mwanaa hae walila kamba uutwa butuku, me yo uikatazanga kumufa zatokwa. Haiba luziyelehile, lwakona kukolwa kuli Jehova uka lubonisa lilato. Muñoli yomuñwi wa lisamu naañozi kuli: “Hane niimezwi ki lipilaelo, neu niomba-ombile ni kunikatulusa.”—Samu 94:19.

5. Lilato la Jehova lelisa feli limisusueza kuezañi?

⁵ Jehova wasepahala. (Samu 103:8) Haatuhelangi kulubonisa lilato niha lumufoselize. Maisilaele nebakuta-kutezi kufoseza Jehova; niteñi, naabonisize lilato lahae lelisa feli kwa batu bahae bane babakile, ka kubulela kuli: “Ubile wa butokwa mwa meeto aka, neukutekiwa, mi nikulatile.” (Isa. 43:​4, 5) Mulimu haasika cinca. Lwakona kukolwa kuli ukazwelapili kulubonisa lilato. Jehova haana kuluyubeka niha luezize sibi sesituna. Haiba lubaka ni kukutela ku Jehova, lukalemuha kuli usa lulata. Usepisa kuli ‘uka luswalela ka kutala.’ (Isa. 55:7) Bibele italusa kuli kuswalelwa ko, kuka lutahiseza “linako za kukatuluha . . . kuzwa ku Jehova yena kasibili.”—Lik. 3:19.

6. Liñolo la Zakaria 2:8 lilulutañi ka za Jehova?

⁶ Mubale Zakaria 2:8. Bakeñisa kuli Jehova walulata, ulemuhanga kapili moluikutwela mi ubata luli kulutusa. Uikutwanga bumaswe haluziyelehile. Kabakaleo, lwakona kulapela ka buikolwiso kuli: “Unisileleze inge taku ya liito lahao.” (Samu 17:8) Liito ki kalulo ya butokwa hahulu ya mubili, ili yebabalelwa hahulu. Kacwalo, Jehova halubapanya kwa taku ya liito lahae, kuswana feela inge kuli ubulela kuli, ‘Mutu kaufela yamieza maswe, ueza maswe nto ya butokwa hahulu ku na.’

7. Ki kabakalañi haluswanela kukolwa hahulu kuli Jehova walulata?

⁷ Jehova ubata kulukolwisa kuli walulata ka butu. Kono waziba kuli kabakala zeneezahezi ku luna kwamulaho, lwakona kukakanya ka za haiba wakona kululata. Kamba mwendi ka nako ya cwale kunani miinelo yetaata yelukopana ni yona yetahisa kuli lukakanye ka za haiba Jehova walulata. Ki lika mañi zeka lutusa kukolwa  kuli walulata? Kuituta mo Jehova aboniseza lilato lahae ku Jesu, kwa Bakreste babatozizwe, ni ku luna kaufela, kwakona kulutusa.

MO JEHOVA ABONISEZA LILATO LAHAE

8. Ki kabakalañi Jesu hanaakozwi kuli Ndatahe wamulata?

⁸ Jehova ni Mwanaa hae yalatwa babile balikani babatuna ka lilimo zeñata-ñata mi balatana hahulu. Ki bona feela bababile balikani ka nako yetelele hahulu mwa pupo kaufela. Jehova naabonisize hande lilato lahae ku Jesu, sina mokuboniselizwe kwa Mateu 17:5. Jehova naakona kubulela feela kuli, ‘Yo ki yena yanitabisa.’ Kono naabata kuli luzibe mwalatela hahulu Jesu; kacwalo, naamubizize kuli “Mwanaka, yalatwa.” Jehova naatabisizwe hahulu ki lika zanaaeza Jesu ni zanaatuha aeza. (Maef. 1:7) Mi Jesu naasa kakanyi kuli Ndatahe naamulata. Jesu naanani buikolwiso bobutuna bwa kuli Jehova naamulata. Naakuta-kutezi kubulela ka buikolwiso kuli Ndatahe naamulata.—Joa. 3:35; 10:17; 17:24.

9. Ki pulelo mañi yebonisa kuli Jehova ulata hahulu Bakreste babatozizwe? Mutaluse. (Maroma 5:5)

⁹ Jehova hape ubonisize kuli walata Bakreste babatozizwe. (Mubale Maroma 5:5.) Mulemuhe pulelo yeli “lisululezwi.” Hatiso yeñwi neitalusize pulelo yeo kuli “kutaha ku luna sina nuka.” Taba yeo ibonisa kuli Jehova ulata hahulu Bakreste babatozizwe! Bakreste babatozizwe baziba kuli ‘balatwa ki Mulimu.’ (Juda 1) Muapositola Joani naabonisize mobaikutwela hanaañozi kuli: “Hamunahane lilato leo Ndate alulatile ka lona, kuli lubizwe bana ba Mulimu!” (1 Joa. 3:1) Kana Jehova ulata feela Bakreste babatozizwe? Batili, Jehova ubonisize kuli walulata kaufelaa luna.

10. Jehova ubonisize cwañi kuli umilata hahulu?

¹⁰ Jehova ubonisize cwañi kuli ululata hahulu? Uezize cwalo ka kulufa Mwanaa hae sina tiululo, mi yeo ki kezo yebonisa lilato lelituna ka kufitisisa mwa pupo kaufela! (Joa. 3:16; Maro. 5:8) Jehova naafanile Mwanaa hae yalata hahulu kuli ashwele batu kaufela ilikuli libi zaluna liswalelwe ni kuli lukone kuba balikani bahae. (1 Joa. 4:10) Halunahanisisa buitomboli bwanaaezize Jehova ni Jesu, lukautwisisa mobalatela hahulu mañi ni mañi waluna. (Magal. 2:20) Jehova naasika lufa Mwanaa hae sina tiululo ka libaka feela la kuli unani katulo yelukile. Ki mpo yebonisa lilato. Jehova ubonisize kuli walulata ka kuitombola Mwanaa hae yalata hahulu, yena Jesu. Jehova naatuhelezi Mwanaa hae kunyanda ni kushwa kabakala luna.

11. Luitutañi kwa liñolo la Jeremia 31:3?

¹¹ Sina molubonezi, Jehova haikutwangi feela kuli walulata, kono hape ubonisanga kuli ululata hahulu. (Mubale Jeremia 31:3.) Jehova uluhohezi ku yena kabakala kuli walulata. (Mubapanye Deuteronoma 7:​7, 8.) Hakuna mutu kamba nto yekona kulukauhanya kwa lilato leo. (Maro. 8:​38, 39) Lilato leo litahisa kuli muikutwe cwañi? Mubale Samu 23, mi mubone mo lilato la Jehova ni pabalelo yahae nelituselize Davida ni molikona kulutuseza kaufelaa luna.

LILATO LA JEHOVA LITAHISA KULI MUIKUTWE CWAÑI?

12. Mukona kutalusa cwañi ka bukuswani Samu 23?

¹² Mubale Samu 23:​1-6. Samu 23 ki pina yelutusa kukolwa kuli Jehova walulata mi waluisa pilu. Davida, yena muñoli wa samu ye, utalusa swalisano yetuna yeneli mwahalaa hae ni Jehova, yena Mulisanaa hae. Davida naaikutwa kusilelezwa hanaa lumelelize Jehova kumuetelela, mi naaitingile ku yena ka kutala. Davida naaziba kuli Jehova naaka mubonisa lilato zazi ni zazi. Ki nto mañi yene mutusize kuba ni buikolwiso bo?

13. Ki kabakalañi Davida hanaakozwi kuli Jehova naamubabalela?

¹³ “Hanina kutokwa sesiñwi.” Davida naaikutwile  kuli naababalelwa hande bakeñisa kuli Jehova naazwezipili kumufa lika kaufela zanaatokwa. Davida hape naaziba kuli Jehova naali mulikanaa hae ni kuli naatabisa Jehova. Ki lona libaka hanaakozwi kuli kusina taba ni zanaaka kopana ni zona kwapili, Jehova naakazwelapili kumufa lika kaufela zanaatokwa. Bakeñisa kuli Davida naakozwi kuli Jehova naamulata mi naamubabalela, naasikaba ni lipilaelo kono naanani tabo mi naakozwi ka lika zanaanani zona.—Samu 16:11.

14. Jehova ukona kulubonisa cwañi lilato?

¹⁴ Jehova ulubonisanga lilato, sihulu halukopana ni miinelo yetaata. Kaizeli yabizwa Claire, a yasaasebelelize fa Betele ka lilimo zefitelela 20, naasazibi mwakutuseza lubasi lwahae hane bakopana ni miinelo yetaata. Bo ndatahe nebakulile butuku bobubatisa lineku la mubili, munyanaa hae wamusizana naazwisizwe mwa puteho, hape nebatuhezi kueza pisinisinyana yene baezanga sina lubasi mi nebaamuhilwe ndu yabona. Jehova naababonisize cwañi lilato? Bo Claire batalusa kuli: “Jehova naaboni teñi kuli lubasi lwaka lwafumana zelutokwa zazi ni zazi. Fokuñwi lika zanaa lufanga Jehova neli zeñata hahulu kufita zene lutokwa! Hañata ninahanisisanga linako zanaa nibonisize Jehova kuli wanilata, mi naitebuha linako zeo. Kuhupula linako zeo kunitusize kuzwelapili kuitiisa hanikopana ni miinelo yetaata.”

15. Ki kabakalañi Davida hanaaikutwile kukatuluha? (Mubone ni siswaniso.)

¹⁵ “Wanikatulusa.” Ka linako zeñwi, Davida naaikutwanga kuziyeleha kabakala miinelo yetaata kaufela yanaakopana ni yona. (Samu 18:​4-6) Kono lilato la Jehova lelituna ni pabalelo yahae ku yena neli mukatulusanga. Jehova naaetelezi mulikanaa hae yanaakatezi  hahulu yo kwa “mafulisezo a bucwañi bobuñata,” ni kwa “mapumulelo anani mezi amañata.” Kabakaleo, Davida naakutezwi ki maata mi azwelapili kusebeleza Jehova ka tabo.—Samu 18:​28-32.

16. Lilato la Jehova limikatulusize cwañi?

¹⁶ Ni kacenu, kusina taba kuli lukopana ni miinelo yetaata, “halusika yunda ki kabakala lilato la Jehova lelisa feli.” (Mali. 3:22; Makolo. 1:11) Halunyakisiseñi mutala wa kaizeli yabizwa Rachel. Naaikutwile hahulu bumaswe muunaa hae hanaa muyubekile ni kutuhela kusebeleza Jehova ka nako ya butuku bobuyambukela bwa COVID-19. Jehova naamutusize cwañi? Utalusa kuli: “Jehova naaboni teñi kuli naikutwa kulatiwa. Naanifile balikani bane batandanga nako ni na, kunitiseza za kuca, kunilumela tushango ni litaba za mwa Bibele zesusueza, kunimenyeza, ni kuzwelapili kunihupulisa kuli Jehova naaniisa pilu. Niitumelanga ku Jehova kamita kabakala kunifa lubasi lolutuna lolu nilata.”

17. Ki kabakalañi Davida ‘hanaasa sabi sesiñwi’?

¹⁷ “Hanisabi sesiñwi, kakuli wena uinzi ni na.” Bupilo bwa Davida hañata nebubanga mwa lubeta, mi naanani lila zeñata zemaata hahulu. Kono naaikutwanga kusilelezwa kabakala kuli Jehova naamulata. Davida naaikutwanga kuli Jehova naali ni yena mwa miinelo kaufela, mi taba yeo nei mutiisanga. Ki lona libaka hanaaopezi kuli: “[Jehova naanilamulezi] ku zenee nisabisa kaufela.” (Samu 34:4) Nihaike kuli Davida ka linako zeñwi naabanga ni sabo, naakonile kufelisa sabo yeo bakeñisa kuli naaziba kuli Jehova naamulata.

18. Kuziba kuli Jehova wamilata kukona kumitiisa cwañi hamukenelwa ki sabo?

¹⁸ Kukolwa kuli Jehova walulata kukona kulutiisa cwañi halukopana ni miinelo yelutahiseza sabo? Kaizeli yabizwa Susi, yali paina, utalusa mo yena ni muunaa hae nebaikutwezi mwanaa bona wamushimani hanaa ipulaile, uli: “Hakuezahala nto yemaswe ka sipundumukela mwakona kufelelwa ki maata ni kuikutwa kuli hamuna tuso. Kono kuziba kuli Jehova ululata hahulu kulutusize kuikutwa kusilelezwa.” Kaizeli Rachel, yabulezwi kwamulaho, hahupula zeneezahezi kwamulaho, uli: “Zazi leliñwi busihu, neniutwile hahulu butuku kwa pilu mi neniikalezwi hahulu ni kukenelwa ki sabo; kacwalo, nalapela ku Jehova. Honafo feela naaikutwa kukatuluha ni kuwa pilu, sina moiikutwelanga mbututu mwa mazoho a bo maa yona, mi nalobala. Hanina kulibala lizazi lani.” Muuna-muhulu yabizwa  Tasos, naapikile lilimo zeene kabakala kuhana kukena busole. Ki lika mañi zenetusize muzwale yo kulemuha kuli Jehova wamulata ni kuli naamubabalela? Utalusa kuli: “Jehova naanifile lika zeñata hahulu kufita zene nitokwa. Taba yeo neitahisize kuli nimusepe hahulu. Hape Jehova ka kuitusisa moya wahae, naanitusize kuba ni tabo kusina taba kuli nenili mwa sibaka sesimaswe hahulu. Taba yeo nei nitusize kulemuha kuli haiba nisepa hahulu Jehova, nikaikutwa kuli unilata hahulu. Kacwalo, naba paina wa kamita inze nisali mwa tolongo.”

MUSUTELELE KU MULIMU WAMINA YANANI LILATO

19. (a) Kuziba kuli Mulimu walulata kukona kuama cwañi zelubulela mwa litapelo zaluna? (b) Kwa litaba zetalusa mwainezi Jehova, ki ifi taba yemifitile hahulu kwa pilu? (Mubone mbokisi yeli, “ Manzwi Abonisa Kuli Jehova Ululata Hahulu.”)

¹⁹ Lika zeneezahezi kwa mizwale ni likaizeli belunyakisisize, kaufelaa zona libonisa kuli Jehova, yena ‘Mulimu ya lilato,’ uinzi ni luna! (2 Makor. 13:11) Uisa pilu mañi ni mañi waluna. Lunani buikolwiso bwa kuli “[uluapesize] lilato Lahae lelisa feli.” (Samu 32:10) Kunahanisisa mwaluboniselize lilato, kuka lutusa kumuunga kuli ki wa luli mi lukasutelela hahulu ku yena. Lwakona kumuatumela ka kulukuluha ni kumutaluseza kuli lutokwa hahulu kuli alubonise lilato. Lwakona kumutaluseza lika kaufela zelubilaeza bakeñisa kuli lwaziba kuli waluutwisisa mi ubata kulutusa luli.—Samu 145:​18, 19.

20. Lilato la Jehova lilusuteleza cwañi ku yena?

²⁰ Sina feela mulilo hau lutusanga kufutumalelwa hakubatile hahulu, lilato lanani lona Jehova laluomba-ombanga halukopana ni miinelo yetaata. Kacwalo, mulumeleze Jehova ku mibonisa lilato lelikona kumiomba-omba ni kumitusa kuba ni kozo. Mi haike kaufelaa luna lubonise buitumelo kwa lilato lahae, ka kubulela kuli: “Nalata Jehova”!—Samu 116:1.