TABA YA KUITUTA 40
PINA 30 Ndate, Mulimu Waka, ni Mulikanaa Ka
Jehova “Ufolisa Babalobehile Lipilu”
“Ufolisa babalobehile lipilu; utama litombo zabona.”—SAMU 147:3.
ZEKAITUTIWA
Jehova uisa hahulu pilu kwa batu babalobehile lipilu. Mwa taba ye, lukanyakisisa mwaluomba-ombelanga haluikutwa kulembwala ni mwalutusezanga kuli lukone kuomba-omba babañwi.
1. Jehova uikutwanga cwañi ka za batanga bahae?
KI LIKA mañi zalemuhanga Jehova kwa batanga bahae ba fa lifasi? Halutabile ni haluutwa butuku, Jehova walemuhanga. (Samu 37:18) Watabanga hahulu halubona inze lumusebeleza ka molukonela kaufela, kusina taba kuli lulobehile pilu! Kono sa butokwa nikufita kikuli, ubata luli kulutusa ni kuluomba-omba.
2. Jehova utusanga cwañi batu babalobehile lipilu, mi lukona kutusiwa cwañi ki pabalelo yahae?
2 Samu 147:3 ibulela kuli Jehova ‘utamanga litombo’ za babalobehile lipilu. Liñolo le libonisa mo Jehova ababalelelanga batu babalobehile lipilu. Ki lika mañi zeluswanela kueza kuli lutusiwe ki pabalelo ya Jehova? Halunyakisiseñi mutala wo. Kunani lika zeñata zakona kueza mualafi yacuukile kuli atuse mutu yaholofezi kuli afole. Kono kuli mutu yaholofezi yo afole, uswanela kulatelela ka tokomelo litaelo zafiwa ki mualafi. Mwa taba ye, lukabona zabulela Jehova mwa Linzwi lahae kwa batu babalobehile lipilu, mi lukanyakisisa molukona kusebeliseza kelezo yahae yelilato.
JEHOVA ULUKOLWISA KULI LUBA BUTOKWA
3. Ki kabakalañi batu babañwi habaikutwanga kuli haki ba butokwa?
3 Ka bumai, batu babañata mwa lifasi kacenu hababonisi lilato kwa batu babañwi, mi taba yeo itahisize kuli babañwi baikutwe kusaba ba butokwa. Kaizeli yabizwa Helen a utalusa kuli: “Hane nihula, bashemi baka nebasa lubonisi lilato. Bo ndate neli ba mifilifili mi zazi ni zazi neba luhanyaukelanga ni kubulela kuli haluna tuso.” Ka kuswana ni bo Helen, mwendi ni mina mukile mwaezwa maswe, kunyazakiwa, kamba kubulelelwa manzwi atahisa kuli muikutwe kuli hamuba butokwa. Haiba ki cwalo, kukona kumibela hahulu taata kulumela kuli kunani mutu yamiisa pilu luli.
4. Ka kuya ka Samu 34:18, Jehova uikutwa cwañi ka za babalobehile lipilu mi usepisa kuezañi?
4 Kusina taba kuli muezizwe maswe ki batu babañwi, mwakona kukolwa kuli Jehova wamilata mi muba butokwa ku yena. “Ufakaufi ni babalobehile lipilu.” (Mubale Samu 34:18.) Haiba muikutwa ‘kuzwafa,’ muhupule kuli Jehova naaboni lika zende mwa pilu yamina, mi ki yena luli yamihohezi ku yena. (Joa. 6:44) Kamita uitukiselize kumitusa, kakuli muba butokwa ku yena.
5. Luitutañi ku zanaaezize Jesu kwa batu bane baangiwa kuli haki ba butokwa?
5 Lwakona kuziba mwaikutwelanga Jehova ka kunyakisisa mutala wa Jesu. Jesu hanaali fa lifasi, naalemuhile batu bane baangiwa kuli haki ba butokwa mi naababonisize mukekecima. (Mat. 9:9-12) Nako yeñwi, musali yanaakula butuku bobutuna naasweli kwa siapalo sa Jesu ka kusepa kuli ukafoliswa, mi Jesu naamuomba-ombile ni kumubabaza kabakala tumelo yahae. (Mare. 5:25-34) Jesu ulikanyisa Ndatahe ka kutala. (Joa. 14:9) Kacwalo, mwakona kukolwa kuli Jehova umiinga kuba ba butokwa mi walemuhanga tulemeno twamina totunde, kukopanyeleza cwalo ni tumelo yamina ni lilato lamina ku yena.
6. Ki lika mañi zemukona kueza haiba muikutwa kuli hamu ba butokwa?
6 Ki lika mañi zemukona kueza haiba muikutwa kuli hamu ba butokwa? Mubale litimana za mwa Bibele zemikolwisa kuli muba butokwa ku Jehova mi mulinahanisise. b (Samu 94:19) Haiba mupalezwi kupeta sikonkwani sesiñwi kamba muzwafile bakeñisa kuli hamukoni kueza zeñata sina babañwi, musike mwaikutwa kuli hamuna tuso. Jehova haabati kuli mueze lika zemusa koni kueza. (Samu 103:13, 14) Haiba nemunyandisizwe ki mutu yomuñwi, musike mwaikutwa mulatu kabakala zanaaezize mutu yo. Naasaswaneli nihanyinyani kumieza cwalo! Muhupule kuli babaeza babañwi maswe ki bona babaka ikalabela ku Jehova, isiñi babaezwa maswe. (1 Pit. 3:12) Kaizeli yabizwa Sandra, ili yanaanyandisizwe kwa bwanana, utalusa kuli, “Nikupaga Jehova kamita kuli anituse kulemuha tulemeno totunde twabonanga ku na.”
7. Zeneezahezi ku luna kwamulaho likona kulutusa cwañi mwa sebelezo yaluna ku Jehova?
7 Musike mwakakanya kuli Jehova wakona kutusa babañwi ka kuitusisa mina. Umikutekile hahulu ka kumifa tohonolo ya kusebeza ni yena mwa bukombwa. (1 Makor. 3:9) Zeezahezi mwa bupilo bwamina mwendi limitusize kuba ni kutwelo-butuku ni kuutwisisa mobaikutwela babañwi. Kunani lika zeñata zemukona kueza kuli mubatuse. Bo Helen, bababulezwi kwamulaho, nebatusizwe ki batu babañwi mi ni bona sebakona kutusa babañwi. Batalusa kuli: “Neniikutwanga kuli hani wa butokwa. Kono Jehova unitusize kuikutwa kulatiwa mi uitusisa na kwa kutusa babañwi.” Bo Helen ki mapaina ba kamita, mi banani tabo.
JEHOVA UBATA KULI LULUMELE KULI ULUSWALEZI
8. Ki buikolwiso mañi bolufumana kwa Isaya 1:18?
8 Batanga ba Jehova babañwi baikutwa hahulu bumaswe kabakala mafosisa ane baezize kwamulaho, ili ane baezize pili basika kolobezwa kale kamba hase bakolobelizwe. Kono lukaeza hande haiba luhupula kuli Jehova naalufile tiululo kabakala kuli ululata hahulu. Kaniti luli, ubata kuli luamuhele mpo yeo yalufile. Jehova ulukolwisa kuli uka luswalela ka kutala hase ‘lulukisize litaba’ c ni yena. (Mubale Isaya 1:18.) Luitumela hahulu ku Ndataa luna yalilato, yena Jehova, kakuli hahupulangi libi zene luezize kwamulaho! Kono hape haalibalangi lika zende zene luezize.—Samu 103:9, 12; Maheb. 6:10.
9. Ki kabakalañi haluswanela kuikataza kuisa pilu kwa lika zelueza cwale ni zeluka eza kwapili, kufita kuisa pilu kwa mafosisa ene luezize kwamulaho?
9 Haiba muikutwa hahulu bumaswe kabakala zene muezize kwamulaho, muikataze kuisa pilu kwa lika zemueza cwale ni zemuka eza kwapili, kufita kuisa pilu kwa mafosisa ene muezize kwamulaho. Halunyakisiseñi mutala wa muapositola Paulusi. Naaikutwile hahulu bumaswe kakuli kwamulaho naanyandisize hahulu Bakreste, kono naaziba kuli Jehova naamuswalezi. (1 Tim. 1:12-15) Kana naazwezipili kuikutwa bumaswe kabakala libi zanaaezize kwamulaho? Kusina kukakanya, naasika eza cwalo, sina feela hanaasika zwelapili kunahana za lika zanaapetile hanaatukufalezi hahulu mwa bulapeli bwa Sijuda. (Mafil. 3:4-8, 13-15) Kono Paulusi naaisize hahulu pilu kwa bukombwa bwahae ni kwa lika zeneka ezahala kwapili. Ka kuswana ni Paulusi, hamukoni kucinca zeneezahezi kwamulaho. Kono mwakona kulumbeka Jehova ni kumutabisa ka nako ya cwale ni kuisa pilu kwa limbuyoti zamisepisize ili zemuka ikola kwapili.
10. Ki lika mañi zelukona kueza haiba zene luezize kwamulaho neliutwisize babañwi butuku?
10 Mwendi muikutwa hahulu bumaswe kabakala kuli zene muezize kwamulaho neliutwisize babañwi butuku. Ki lika mañi zekona kumitusa? Muikataze kulukisa mafosisa, mane ni kukupa swalelo kwa batu bao. (2 Makor. 7:11) Mukupe Jehova kuli atuse batu bao bone muutwisize butuku. Wakona kumitusa ni kutusa batu bone muutwisize butuku kuzwelapili kumusebeleza ni kuba ni kozo.
11. Lukona kuitutañi kwa mutala wa mupolofita Jonasi? (Mubone ni siswaniso.)
11 Muitute kwa mafosisa ane muezize kwamulaho mi mulumeleze Jehova kuitusisa mina mwabatela. Halunyakisiseñi mutala wa mupolofita Jonasi. Mwa sibaka sa kuya kwa Ninive yeneli kwa upa sina mwanaa mulaelezi Mulimu, Jonasi abalehela kwa Tareshishi yeneli kwa wiko. Jehova naakalimezi Jonasi, mi Jonasi naaitutile kwa mafosisa ahae. (Jona. 1:1-4, 15-17; 2:7-10) Jehova naasika tuhela kuitusisa Jonasi. Mulimu naamufile kolo yeñwi ya kuya kwa Ninive, mi ka nako ye Jonasi naaezize cwalo kapili-pili. Nihaike kuli Jonasi naaikutwile bumaswe kabakala mafosisa anaaezize, naalumezi kueza musebezi wanaa mufile Jehova.—Jona. 3:1-3.
Mupolofita Jonasi hasaazwile mwa mba ya tapi yetuna, Jehova hape amutaluseza kuli aye kwa Ninive ni kuyo shaela lushango lwahae (Mubone paragilafu 11)
JEHOVA ULUOMBA-OMBANGA KA KUITUSISA MOYA OKENILE
12. Jehova ulutusanga cwañi kuba ni kozo nto yemaswe haiezahala ku luna? (Mafilipi 4:6, 7)
12 Nto yemaswe haiezahala ku luna, Jehova waluomba-ombanga ka kuitusisa moya wahae okenile. Halunyakisiseñi zeneezahezi ku bo Ron ni bo Carol. Ka bumai, mwanaa bona wamushimani naaipulaile. Batalusa kuli: “Nelukopani ni miinelo yetaata kwamulaho, kono wo neli otaata hahulu nikufita. Busihu hane lupalelwanga kulobala, nelulapelanga mi nelubanga ni kozo yetalusizwe kwa Mafilipi 4:6, 7.” (Mubale.) Haiba mulembwalile hahulu, mwakona kutaluseza Jehova ze mwa pilu yamina kaufela, hape mwakona kulapela ku yena ka kukuta-kutela mi tapelo yamina yakona kuba yetelele kamba yekuswani. (Samu 86:3; 88:1) Mukuta-kutele kukupa Jehova kuli amife moya wahae okenile. Kamita uka mitusa.—Luka 11:9-13.
13. Moya okenile ukona kulutusa cwañi kuzwelapili kusebeleza Jehova ka busepahali? (Maefese 3:16)
13 Kana nemukopani ni muinelo otaata hahulu mi cwale muikutwa kuli hamuna maata a kueza nto ifi kamba ifi? Haiba ki cwalo, moya okenile wakona kumitusa kuba ni maata kuli muzwelepili kusebeleza Jehova ka busepahali. (Mubale Maefese 3:16.) Halunyakisiseñi zeneezahezi ku kaizeli yabizwa Flora. Bo Flora ni bakubona nebasebeza hamoho sina balumiwa, kono bakubona baeza bubuki ili nto yenetahisize kuli linyalo labona lifele. Batalusa kuli: “Neniikutwile hahulu bumaswe bakeñisa kuli bakuluna nebasika sepahala, mi nenisa zibi feela za kueza. Nenilapezi ku Jehova kumukupa moya wahae okenile ilikuli nikone kuitiisa. Jehova naanifile zene nitokwa kuli nitiyele muinelo wo, nihaike kuli kwa makalelo neubonahala kuba omutuna hahulu kuli mane nenisike nakona kuutiyela.” Bo Flora baikutwa kuli Mulimu ubatusize kumusepa hahulu mi bakozwi kuli uka batusa mwa miinelo yetaata kaufela. Baekeza kubulela kuli: “Manzwi a kwa Samu 119:32 naanitusize hahulu, ali: ‘Nikatukufalelwa kundongwama nzila ya milao yahao kakuli uilukiseza sibaka mwa pilu yaka.’”
14. Ki lika mañi zeluswanela kueza kuli moya wa Mulimu ulutuse?
14 Ki lika mañi zemuswanela kueza hase mukupile Jehova kuli amife moya wahae okenile? Mueze lika zekatahisa kuli moya wa Mulimu umituse. Lika zeo likopanyeleza kufumaneha kwa mikopano ni kukutaza ku babañwi. Mubalange Bibele zazi ni zazi ilikuli mube ni mubonelo wa Jehova wa lika. (Mafil. 4:8, 9) Hamunze mubala Bibele, mulemuhe batu bababulezwi mwateñi bane bakopani ni miinelo yetaata mi munahanisise mo Jehova naabatuselize kuitiisa. Bo Sandra bababulezwi kwamulaho, nebakopani ni miinelo yetaata ka kutatamana. Batalusa kuli: “Likande la Josefa linisusuezanga hahulu. Nihaike kuli naakopani ni miinelo yetaata mi naasika ezwa hande, naasika lumeleza lika zeo kufokolisa silikani sahae ni Jehova.”—Gen. 39:21-23.
JEHOVA WALUOMBA-OMBANGA KA KUITUSISA MIZWALE NI LIKAIZELI BALUNA
15. Ki bo mañi babakona kuluomba-omba, mi bakona kulutusa cwañi? (Mubone ni siswaniso.)
15 Halukopana ni miinelo yetaata, mizwale ni likaizeli baluna bakona ‘kuluomba-omba hahulu.’ (Makolo. 4:11) Nzila yeñwi yalubonisanga ka yona lilato Jehova ki ka kuitusisa mizwale ni likaizeli baluna. Mizwale ni likaizeli baluna bakona kuluomba-omba ka kuteeleza ku luna ka tokomelo kamba ka ku luina kwatuko. Mwendi bakona kulususueza ka kubala timana yeñwi mwa Bibele kamba kulapela ni luna. d (Maro. 15:4) Ka linako zeñwi, muzwale kamba kaizeli wakona kuluhupulisa mubonelo wa Jehova ka za nto yeñwi, ilikuli alutuse kuzwelapili kuba ni mubonelo oswanela. Mizwale ni likaizeli baluna hape bakona kulutusa ka linzila zeñwi, inge cwalo ka kululukiseza lico halulembwalile.
Balikani babasepahala ili babahulile kwa moya bakona kuluomba-omba ni kulutusa (Mubone paragilafu 15)
16. Lukona kuezañi kuli lutusiwe ki babañwi?
16 Kuli lutusiwe ki babañwi, mwendi lukatokwa kukupa tuso yabona. Mizwale ni likaizeli baluna balulata mi babata kulutusa. (Liprov. 17:17) Kono mwendi habazibi moluikutwela kamba zelutokwa. (Liprov. 14:10) Haiba muikutwa kulembwala, mutaluseze balikani bamina babahulile kwa moya momuikutwela. Mubataluseze mobakona kumituseza. Mwakona kuketa kutaluseza muuna-muhulu alimuñwi kamba bababeli bomulukuluhile kutaluseza litaba. Likaizeli babañwi balemuhile kuli kwatusa kuambola ni kaizeli yomuñwi yahulile kwa moya.
17. Ki miinelo mañi yetaata yekona kulupaleliswa kususuezwa ki babañwi, mi lukona kutula cwañi miinelo yeo?
17 Musike mwaikauhanya ku babañwi. Hamuutwa butuku kwa pilu, mwakona kukenelwa ki muliko wa kubata kuikambusa ku babañwi. Ka linako zeñwi, mizwale ni likaizeli bamina bakona kupalelwa kumiutwisisa kamba kupalelwa kuketa hande manzwi a kuitusisa. (Jak. 3:2) Musike mwalumeleza miinelo yeo kumipaleliswa kufumana susuezo yemutokwa. Muuna-muhulu yabizwa Gavin, ili yakula butuku bwa kulembwala, utalusa kuli: “Hañata naikambusanga kwa balikani baka, mi hanitabelangi kuambola ni bona.” Nihakulicwalo, bo Gavin baikatazanga kuswalisana ni babañwi, mi kueza cwalo kwabatusanga. Kaizeli yabizwa Amy utalusa kuli: “Kunibelanga taata kusepa batu kabakala zeneezahezi ku na kwamulaho. Kono nisweli kuikataza kulikanyisa Jehova ka kulata mizwale ni likaizeli baka ni kubasepa. Naziba kuli kueza cwalo kutabisa Jehova, mi kwanitabisa ni na.”
LISEPISO ZA JEHOVA KA ZA KWAPILI ZAKONA KULUOMBA-OMBA
18. Ki lika mañi zekaezahala kwapili zelunyolezwi, mi lukona kuezañi ka nako ya cwale?
18 Honacwale-cwale fa, Jehova ukafelisa lika kaufela zekona kutahisa kuli luutwe butuku ni kuli lulembwale. (Sin. 21:3, 4) Ka nako yeo, lika kaufela zeluutwisa butuku “halisana kukutela mwa lipilu.” (Isa. 65:17) Sina molunyakisiselize, Jehova ‘watamanga litombo zaluna’ nihaiba ka nako ya cwale. Jehova ulufile lika zeñata kuli aluomba-ombe ni kulutusa; kacwalo, muamuhele tuso yamifa. Musike mwakakanya nihanyinyani kuli “wamiisa pilu.”—1 Pit. 5:7.
PINA 7 Jehova, Maata Aluna
a Mabizo acincizwe.
b Mubone mbokisi yeli, “ Jehova Umiinga Kuba ba Butokwa.”
c Kuli “lulukise litaba” ni Jehova, luswanela kubonisa kuli lubakile ka kumukupa kuli aluswalele libi zaluna ni ka kucinca muzamao waluna. Haiba luezize sibi sesituna, hape lutokwa kukupa tuso kwa baana-bahulu mwa puteho.—Jak. 5:14, 15.
d Ka mutala, munyakisise mañolo a mwatasaa taba yeli, “Lipilaelo” ni yeli, “Kuomba-Omba,” ze mwa hatiso ya Mañolo Atusa Bakreste Mwa Bupilo.
