Swalisano Mwa Lubasi I Tahisa Zwelopili ya Kwa Moya

MOYA wa swalisano wa tokwahala haiba lu bata ku ba ni lubasi lo lu tiile kwa moya. Jehova ha na bupile muuna ni musali ba pili, na koñomekile butokwa bwa ku swalisana hamoho. Eva na bulelezwi kuli a belekisane ni Adama sina ‘mulikanaa hae.’ (Gen. 2:18) Muuna ni musali ba ba nyalani ba swanela ku swalisana hamoho ni ku tusana. (Muek. 4:9-12) Kuli bashemi ni bana ba pete buikalabelo bwa bona hande, ni bona hape ba na ni ku swalisana.

Ku Lapela Sina Lubasi

Bo Barry ni bo Heidi ba na ni bana ba ketalizoho. Ba fumani kuli ku swalisana hamoho ku eza tuto ya Bibele ya lubasi ku ba tusa ku eza zwelopili. Bo Barry ba li: “Fokuñwi ni felanga cimo bana ba ka lika za ku batisisa pili lu si ka kopana kale kwa tuto ya lubasi. Fokuñwi ni ba kupanga ku itukiseza Mu Zuhe! ilikuli kwa tuto ya lubasi ba yo talusa ze ba balile. Mi fokuñwi lu ezanga liponiso za mwa ku kutaleza ilikuli mwana ni mwana a itukiseze taba ya ku ambola ni batu mwa simu.” Bo Heidi ba ekeza kuli: “Kaufela luna lu na ni mukoloko wa likonkwani za kwa moya ze lu itomezi, mi lu nyakisisanga likonkwani zeo ka linako ze ñwi mwa tuto ya lubasi kuli lu bone mo lu sweli ku ezeza.” Bo Barry ni bo Heidi hape ba fumani kuli ka ku sa tukisa TV fa mazazi a mañwi, lubasi lu banga ni nako ya ku bala inze ku kuzize hande.

Mikopano ya Puteho

Bo Mike ni bo Denise ba na ni bana ba bane. Lubasi lwa bona ne lu fumani cwañi tuso ka ku swalisana hamoho? Bo Mike ba li: “Ka linako ze ñwi ne lu fumananga kuli niha lu ezize milelo ye minde, ne lu palelwanga ku fita kwa mikopano ka bunako. Kono ne lu fumananga kuli ha lu swalisana hamoho, ne lu konanga ku eza cwalo.” Bo Denise ba li: “Bana ba luna ha ne ba hula, ne lu fanga musebezi ku mañi ni mañi wa bona. Kim, mwanaa luna wa musizana, na tusanga kwa ku apeha ni ku lukisa fa tafule.” Michael, mwanaa bona wa mushimani, u hupula kuli: “La Bubeli ne lu banga ni mukopano mwa ndu ya luna. Kacwalo ne lu kenisanga mwa ndu ni ku lukisa hande lipula.” Matthew, mwanaa bona yo muñwi, u ekeza kuli: “Fa mazazi a mikopano, bondate ne ba zwanga kwa musebezi ka ku itahanela kuli ba to lu tusa ku itukiseza ku ya kwa mikopano.” Ki lifi ze ne zwile mwa buikatazo bwa bona?

Limbuyoti ze Zwile Mwateñi

Bo Mike ba li: “Ka 1987, na ni bo Denise ne lu kalile ku sebeza sina mapaina. Ka nako yeo, ba balalu kwa bana ba luna ne ba sa pila fa lapa. Ba babeli ku bona ne ba bile mapaina ni bona, mi ba bañwi ku bona ne ba ilo tusa kwa misebezi ya ku yaha fa Betele. Nto ye ñwi ye ekelize kwa tabo ya luna sina lubasi kikuli lu konile ku tusa batu ba 40 ku fita fa ku ineela ni ku kolobezwa. Hape lubasi lwa luna lu bile ni tohonolo ya ku yo tusa kwa misebezi ya ku yaha, mane ni mwa linaha li sili.”

Kaniti ku swalisana hamoho sina lubasi ku tahisa limbuyoti. Kana ku na ni linzila ze ñwi ze mu kona ku swalisana hamoho sina lubasi? Mu be ni buikolwiso bwa kuli ku ba ni moya wa swalisano ku ka mi tusa sina lubasi ku eza zwelopili ye tuna ya kwa moya.

[Siswaniso se si fa likepe 28]

Ku ezanga liponiso sina lubasi ku tahisa zwelopili mwa bukombwa bwa mwa simu