‘Mu Si Ke Mwa Zwafa’
‘Mu Si Ke Mwa Zwafa’
“Lu si ke lwa katala ku eza ze nde.”—MAGAL. 6:9.
MU KONA KU ALABA CWAÑI?
Mulimu u lu fa lika mañi kuli a lu tuse ku zwelapili ku mu sebeleza ka ku tukufalelwa?
Ku nahanisisa libaka le lituna le lu yelanga kwa mikopano ku lu susueza ku ezañi?
Haiba kuli lu bata ku itiisa ha lu nze lu sebeleza Mulimu ni ku zwelapili ku ba ni tukufalelo, lu swanela ku lika ka taata ku ezañi?
1, 2. Ku ziba mo i sebeleza kopano ya Jehova ku tiisa cwañi sepo ya luna?
KWA tabisa ku ziba kuli lu mwa kopano ye swalisani ku lapela Jehova. Lipono ze lu balile kwa Ezekiele kauhanyo 1 ni Daniele kauhanyo 7, li talusa hande mwa sebeleza Jehova kuli a taleleze mulelo wa hae. Jesu ki yena ya etelela kalulo ya fa lifasi ya kopano ya Jehova. Jesu u etelela mwa musebezi wa ku kutaza, mi u fa litaelo ni ku susueza ba ba sweli ku eza musebezi wo, mane ni ku tusa ba bañwi kuli ba be balapeli ba Jehova. Ku ziba taba yeo ku lu tusa kuli lu sepe kopano ya Jehova.—Mat. 24:45.
2 Kana lwa zamaelela ni kopano ya Jehova ka ku zwelapili ku pateha mwa sebelezo ya Mulimu? Ku cwañi haiba mu ikutwa kuli tukufalelo ye ne mu na ni yona sa pili ki kale i kala ku fukuzeha? Bakreste ba mwa linako za baapositola ni bona ne ba ikutwile cwalo. Muapositola Paulusi naa ba susuelize ku latelela mutala wa Jesu ya naa petile musebezi wa hae ka tukufalelo. Paulusi naa bulezi kuli ku eza cwalo ne ku ka ba tusa ku sa “katala ni ku fela pilu.” (Maheb. 12:3) Mwa taba ye felile, ne lu itutile ka za musebezi o munde o eziwa ki kopano ya Jehova kacenu. Sina feela mutala wa Kreste mo ne u susuelelize Bakreste ba mwa linako za baapositola, ku nahanisisa ze i peta kopano ya Jehova kwa kona ku lu tusa ku tiya ha lu nze lu sebeleza Mulimu ni ku zwelapili ku ba ni tukufalelo.
3. Lu swanela ku ezañi kuli lu si ke lwa ‘zwafa,’ mi lu ka nyakisisañi mwa taba ye?
3 Kuli lu si ke lwa ‘zwafa,’ kamba ku felelwa ki tukufalelo ya luna ha lu nze lu sebeleza Mulimu, lu swanela ku eza ze ñata ku fita ku nahana feela ze i peta kopano ya Mulimu. Paulusi naa bulezi kuli lu swanela ku zwelapili “ku eza ze nde.” (Magal. 6:9) Ha lu nyakisiseñi lika ze taalu ze lu swanela ku eza kuli lu zwelepili ku ba ni tukufalelo ni ku latelela ketelelo ya kopano ya Jehova. Ku eza cwalo ku ka lu tusa ku bona haiba luna kamba lubasi lwa luna lu tokwa ku eza licinceho ze ñwi.
MU KOPANE KULI MU LAPELE NI KU SUSUEZWA
4. Ki kabakalañi ha lu kona ku bulela kuli mikopano i zwezipili ku ba ya butokwa mwa bulapeli bwa niti?
4 Batanga ba Jehova ba zwezipili ku itebuha mikopano. Mwa lihalimu, Jehova ni mangeloi a hae ba kopananga. (1 Mal. 22:19; Jobo 1:6; 2:1; Dan. 7:10) Mwa miteñi ya kwaikale, Mulimu naa bulelezi Maisilaele kuli ba kopane hamoho ka mulelo wa “kuli ba utwe, mi ba itute.” (Deut. 31:10-12) Mwa miteñi ya baapositola, Majuda ne ba kopananga ka nako ni nako kwa libaka za mikopano ze ne ipitezi ili ko ne ba balanga mañolo. (Luka 4:16; Lik. 15:21) Mikopano ne i zwezipili ku ba ya butokwa ha ne ku tomilwe puteho ya Sikreste, mi ni kacenu i sa li ya butokwa mwa bulapeli bwa luna. Bakreste ba niti ba ‘isezana pilu kuli ba susumezane ku ba ni lilato ni misebezi ye minde.’ Bakeñisa kuli lu pila mwa mazazi a maungulelo, lu tokwa ku zwelapili ku ‘susuezana.’—Maheb. 10:24, 25.
5. Lu kona ku susuezana cwañi ha lu li kwa mikopano?
5 Nzila ye ñwi ya butokwa ye lu kona ku susueza ba bañwi ki ka ku alabanga ha lu li kwa mikopano. Ka mutala, lwa kona ku alaba ha ku buziwa puzo ya paragilafu, lwa kona ku ama kwa liñolo, kamba ku talusa ka bukuswani mo li lu tuseza likuka za mwa Bibele. (Samu 22:22; 40:9) Likalabo ze lu utwanga kwa mikopano, ze fiwanga ki ba bahulu ni banana, za lu susuezanga hahulu. Kaufelaa luna lwa susuezwanga ku si na taba ni nako ye se fitile ku zwa fo lu kolobelelizwe.
6. Mikopano i lu tusa mwa linzila lifi?
6 Mikopano ya luna ya puteho, mikopano ye minyinyani, ni mikopano ye mituna i lu tusa mwa linzila ze ñata. Ka mutala, mikopano ya luna i lu tusa ku ba ni bundume niha lu kutaza kwa batu ba ba lu lwanisa kamba ba ba sa tabeli ku utwa taba ye nde. (Lik. 4:23, 31) Lingambolo ni likalulo ze ñwi ze tomile fa mañolo li tiisa tumelo ya luna. (Lik. 15:32; Maro. 1:11, 12) Kwa lu tabisanga luli ni ku lu omba-omba ku ba mwahalaa mizwale ni likaizeli ba luna. (Samu 94:12, 13) Katengo ka Tuto ka Sitopa se si Etelela ka lukisanga mikopano ya batu ba Jehova. Kaniti luli lwa itebuha kwa litaelo ze nde ze lu amuhelanga sunda ni sunda mwa silimo!
7, 8. (a) Ki libaka lifi le lituna le lu fumanehelanga kwa mikopano? (b) Mikopano i mi tusa cwañi?
7 Mulelo o lu yelanga kwa mikopano haki wa kuli lu tusiwe feela luna beñi. Libaka le lituna le lu yelanga kwa mikopano ki ku yo lapela Jehova. (Mu bale Samu 95:6.) Ki tohonolo ye tuna ku lumbeka Mulimu wa luna yo munde ka ku mu opelela! (Makolo. 3:16) Hape lu lumbekanga Jehova ka ku fa likalabo ha lu li kwa mikopano. Jehova u na ni tukelo ya kuli lu mu lapele mwa linzila zeo. (Sin. 4:11) Bakeñisa ze lu nyakisisize, lwa kona ku utwisisa libaka ha ku li kwa butokwa kuli lu fumanehange kwa mikopano ka nako kaufela!—Maheb. 10:25.
8 Mikopano ya luna ki mpo ya lu file Jehova ye lu tusa ku itiisa ku fitela ha ka sinya lifasi le li maswe le. Kana kona mo mu ikutwela cwalo? Haiba lu ikutwa cwalo, lu ka ikataza ku fumanehanga kwa mikopano ka nako kaufela ku si na taba ni mipateho ye lu kana lwa ba ni yona. (Mafil. 1:10) Ha lu swaneli ku shuta mikopano konji haiba ku na ni libaka le lituna luli.
MU KUTAZE KA TUKUFALELO
9. Lu ziba cwañi kuli musebezi wa ku kutaza ki wa butokwa?
9 Kuli lu latelele ketelelo ya kopano ya Jehova, lu swanela ku kutaza ka ku tukufalelwa. Jesu naa kalile ku kutaza ha naa li fa lifasi. (Mat. 28:19, 20) Ku zwa feela ka nako yeo, musebezi wa ku kutaza ni ku tusa batu ku ba balutiwa u bile o muñwi wa misebezi ya butokwa hahulu mwa kopano ya Jehova. Ze ezahezi li bonisa kuli mangeloi a sweli a lu tusa mwa musebezi wa ku kutaza ni ku lu tusa kuli lu fumane batu ba ba ka amuhela niti. (Lik. 13:48; Sin. 14:6, 7) Mulelo o mutuna luli wa kalulo ya fa lifasi ya kopano ya Jehova ki wa ku onga-onga ni ku tusa mwa musebezi wa ku kutaza. Kana musebezi wa ku kutaza ni ona ki wa butokwa mwa bupilo bwa mina?
10. (a) Muzwale yo muñwi u zwelapili cwañi ku lata niti? (b) Bukombwa bu mi tusize cwañi ku zwelapili ku lata niti?
10 Ha lu kutaza ka ku tukufalelwa, lilato la luna la ku lata niti li ka zwelapili ku hula. Bo Mitchel, baana-bahulu ba ba yeziseli ili ba ba eza bupaina bwa kamita ba ikutwa cwalo. Ba bulela kuli: “Ni tabelanga hahulu ku bulelela ba bañwi litaba za niti ze fumaneha mwa Bibele. Ni nyakisisanga litaba ze nca ze mwa limagazini za Tawala ya Mulibeleli kamba Mu Zuhe!, mi ni lemuhanga kuli ye ñwi ni ye ñwi ya litaba zeo i lukisizwe ka butali, ka kutwisiso, ni ka nzila ye swanela. Ni nyolelwanga ku ya mwa simu kuli ni yo bona mo ba ka ezeza batu ha ba ka bona litaba zeo, ni ku yo lika ku zwisezapili cisehelo ya bona.” Bo Mitchel hape ba bulela kuli ku fumanehanga mwa bukombwa ku ba tusize ku zwelapili ku beya lika za butokwa hahulu ni ku fita mwa sibaka sa pili ni kuli ha ba lati ku tuhelela nto ifi kamba ifi ku ba cela nako ya bona. Ni luna lwa kona ku itiisa mwa mazazi a maungulelo a haiba lu zwelapili ku pateha mwa sebelezo ya Mulimu.—Mu bale 1 Makorinte 15:58.
MU TUSIWE KI LIHATISO
11. Ki kabakalañi ha lu swanela ku balanga lihatiso za luna ni ku nahanisisa ze lu bala?
11 Nzila ye ñwi ya lu tiisa ka yona Jehova ki ka lihatiso ze lu amuhelanga. Mwendi mwa hupula nako ye ñwi ha ne mu balile hatiso ni ku nahana kuli, ‘Kona litaba ze ne ni bata luli ze! Ku swana feela inge kuli Jehova u ñolezi na luli litaba ze!’ Ku na ni libaka le ne li tahisize kuli mu ikutwe cwalo. Jehova u itusisa lihatiso kuli a lu lute ni ku lu etelela. Jehova u bulela kuli: “Ni ka ku talifisa, ni ku lute nzila yo swanezi ku zamaya.” (Samu 32:8) Kana lwa balanga lihatiso kaufela ze lu amuhelanga ni ku nahanisisa ze lu balile? Ku eza cwalo ku ka lu tusa ku itiisa ni ku zwelapili ku sebeleza Mulimu ka tukufalelo mwa mazazi a maungulelo a taata a.—Mu bale Samu 1:1-3; 35:28; 119:97.
12. Ki nto mañi ye kona ku lu tusa ku itebuha lihatiso za luna?
12 Haiba lu nyakisisa musebezi o eziwanga ilikuli lihatiso za luna li hatiswe, lu ka itebuha hahulu lihatiso zeo. Musebezi wo u kopanyeleza ku eza lipatisiso, ku ñola, ku kuta-kutela ku bala ze ñozwi, ku keta maswaniso a swanela, ni ku toloka hatiso ni hatiso ye hatiswanga kamba ye beiwanga fa webusaiti ya luna. Musebezi wo u etelelwa ki Katengo ka Bañoli ka Sitopa se si Etelela. Hamulaho, mitai ye hatisanga lihatiso i lumelanga lihatiso zeo kwa liputeho ze i okamela. Ki kabakalañi musebezi wo kaufela ha u eziwanga? Musebezi wo u eziwanga ilikuli batu ba Jehova ba amuhele litaelo ni liketelelo ze ba tokwa kuli ba zwelepili ku sepahala. (Isa. 65:13) Haike lu tusiwe ki lihatiso kaufela ze lu fiwa ki kopano ya Jehova.—Samu 119:27.
MU SEBELISANE NI KOPANO YA JEHOVA
13, 14. Ki bo mañi ba ba sebelisana ni kopano ya Jehova mwa lihalimu, mi luna lu kona ku sebelisana cwañi ni kopano ya Jehova?
13 Mwa pono, Joani naa boni Jesu inze a pahami fa pizi ye sweu ili ku yo tula mwa ndwa ya ku lwanisa bakwenuheli ba Jehova. (Sin. 19:11-15) Joani hape naa boni batoziwa ba ba sepahala ba ba zuselizwe kwa lihalimu, ni mangeloi a sepahala a pahami lipizi inze ba latelela Jesu mwamulaho. Ka ku latelela Jesu, batoziwa bao ni mangeloi a sepahala ba bonisa kuli ba sebelisana ni Jesu, yena Mueteleli wa bona. (Sin. 2:26, 27) Mutala o munde o boniswa ki batoziwa ni mangeloi a sepahala ao u lu luta kuli lu swanela ku sebelisana ni batu ba ba etelela mwa kopano ya Jehova.
14 Ka nzila ye swana, buñata bo butuna bu sebelisana ka ku tala ni banyani ba Kreste ba ba tozizwe ba ba sa pila fa lifasi. (Mu bale Zakaria 8:23.) Mu kona ku sebelisana cwañi ni kopano ya Jehova? Nzila ye ñwi ye lu kona ku sebelisana ni kopano ya Jehova ki ka ku utwa ba ba lu etelela. (Maheb. 13:7, 17) Kana ze lu bulelanga ka za baana-bahulu ba mwa puteho ya luna za susuezanga ba bañwi kuli ba ba kuteke ni ku itebuha musebezi o ba eza? Kana lwa lutanga bana ba luna kuli ba kuteke baana ba ba sepahala bao ni ku utwa likelezo ze ba fanga? Ku na ni linzila ze ñwi ze lu kona ku bonisa ka zona kuli lwa sebelisana ni kopano ya Jehova. Ka mutala, kana lwa lelisananga sina lubasi kuli lu fe nubu kwa musebezi wa ku kutaza? (Liprov. 3:9; 1 Makor. 16:2; 2 Makor. 8:12) Kwandaa zeo, kana lwa tusanga mwa musebezi wa ku kenisa ni ku babalela Ndu ya Mubuso? Jehova u ka lu fa moya wa hae o kenile ha ka bona kuli lwa sebelisana ni kopano ya hae mwa linzila zeo. Mi moya wa hae u ka lu fa maata a ka lu tusa ku itiisa mwa mazazi a maungulelo.—Isa. 40:29-31.
MU PILE KA NZILA YE TABISA MULIMU
15. Ki kabakalañi ha lu swanela ku zwelapili ku lika ka taata ku eza ze lukile?
15 Haiba lu bata ku itiisa ni ku latelela ketelelo ye lu fiwa ki kopano ya Jehova, lu swanela ku pila ka nzila ye mu tabisa. (Maef. 5:10, 11) Bakeñisa ku sa petahala kwa luna ni kukuezo ye zwa ku Satani ni kwa lifasi le li maswe le, ku taata hahulu ku luna ku eza ze lukile. Ba bañwi ku mina mizwale ni likaizeli ba ba latiwa, mu lika ka taata zazi ni zazi ku zwelapili ku tiisa bulikani bwa mina ni Jehova. Jehova wa mi lata bakeñisa buikatazo bwa mina. Mu si ke mwa zwafa! Ha lu pila ka nzila ye tabisa Jehova, lu ka ikola bupilo bo bunde mi lwa kona ku kolwa kuli Jehova u ka lu shemuba.—1 Makor. 9:24-27.
16, 17. (a) Lu swanela ku ezañi haiba lu ezize sibi se situna? (b) Lu kona ku itutañi kwa mutala wa Anne?
16 Kono mu swanela ku ezañi haiba kuli mu ezize sibi se situna? Mu si ke mwa lika ku si pata. Mu kupe tuso kapili-pili. Mu hupule mwa naa ikutwezi Davida ha naa likile ku pata sibi sa hae. Naa ize: “Ha ne ni sa ikuzelize, masapo a ka naa lenga; mi ne ni tonga lizazi kaufela.” (Samu 32:3) Haiba lu pata libi za luna ze tuna, ha lu na ku ba ni tabo mi mane nihaiba bulikani bwa luna ni Jehova bwa kona ku fela. Kono haiba lu bulela libi za luna, lu ka “shemubiwa.”—Liprov. 28:13.
17 Ha lu nyakisiseñi mutala wa Anne. * Anne ha naa sa nonoboka inze a li paina wa kamita, a kalisa ku eza lika ze maswe. Ka lona libaka leo, lizwalo la hae la mu sisita maswe. Anne u talusa kuli: “Ne ni sa bangi ni tabo mi ne ni lembwalile ka nako kaufela.” Zazi le liñwi ha naa li kwa mikopano, ne ku nyakisisizwe liñolo la Jakobo 5:14, 15. Anne a lemuha kuli naa tokwa ku tusiwa. Naa ezizeñi? A latelela kelezo ye kwa liñolo leo mi a ambola ni baana-bahulu. Ne si nto ye bunolo, kono Anne u talusa kuli naa ikutwa inge ya kula mi Jehova naa mu file mulyani wa naa tokwa. Anne u li: “Ne ku li taata ku na ku nwa mulyani wo, kono ne u ni folisize.” Anne cwale sa sebeleza Jehova ka tukufalelo inze a na ni lizwalo le li kenile.
18. Lu swanela ku lika ka taata ku ezañi?
18 Lu swanela ku hupulanga ka nako kaufela kuli ki tohonolo ye tuna ku ba mwa kopano ya Jehova mwa mazazi a maungulelo a! Haike luna ni lubasi lwa luna lu likange ka taata ku fumaneha kwa mikopano ya luna kamita, ku kutaza ka ku tukufalelwa, ni ku tusiwa ki lihatiso za luna kaufela. Ku zwa fo, haike lu sebelisane ni ba ba lu etelela mi haike lu pile ka nzila ye tabisa Jehova. Haiba lu eza cwalo, lu ka latelela ketelelo ye lu fiwa ki kopano ya Jehova mi ha lu na ku zwafa!
[Litaluso za kwatasi]
^ para. 17 Libizo li cincizwe.
[Lipuzo za Tuto]
[Mbokisi fa likepe 29]
KALULO YA FA LIFASI YA KOPANO YA JEHOVA I KOPANYELEZA:
1. Sitopa se si Etelela
2. Tutengo Twa Mitai
3. Baokameli ba Maeto
4. Litopa za Baana-bahulu
5. Liputeho
6. Muhasanyi ni muhasanyi
[Siswaniso se si fa likepe 31]
Mu like ka taata ku tusa ba bañwi kuli ba lemuhe kuli ni bona ba kona ku ba mwa kopano ya Jehova ye tuna
